薰：「歌都唔多揀到，幾好聲都假啦」 QP1R 是個發開口夢的一帶一路中國夢
味就2015 年底推出的 player 多不勝數，隨口講就已經有近年少見地性價比高的 Pioneer XDP-100R，遲遲未有現身的 Onkyo DP-X1，機仔細細的 Cowon Plenue D 同埋未知價錢的 Plenue S，平返小小的 Astell & Kern AK320，據聞不會有限定版的 VentureCraft VALOQ 以及 FiiO X7、iBasso DX80 之類的中國磚頭機，實在花多眼亂。
其中一部從未聽過的國磚 Questyle QP1R 似乎有些微不同：定價高、流線型機身、大路的操控設計和毫不令人意外的發燒硬件，至底會帶來什麼聲音，that is the question.
Questyle 是哪門子的品牌？中國是也，正確來說是中美合資的品牌。以往產品多為耳擴、DAC、Wi-Fi 音響系統、前後級等等，QP1R 是 Questyle 旗下第一部 protable player。
中國品牌在中國製造是常識吧？QP1R 由富士康負責生產，機身 CNC 鋁合金一體成型，正、背面玻璃就用到 Gorilla Glass 3，的確比一般國磚 player 的廉價膠感少一份山寨味。
▲真係已經好耐無見過轉盤設計，對用過 iPod Classic 一段時間的小弟而言，見返當然好開心：不過用落先知，呢個真係好睇唔好用，因為好用力襟落去都無反應，揀首歌都搞到我成個傻仔咁，等我仲一度以為自己收到次貨工廠樣版機....
機身正面的大轉盤令薰聯想起當年陪伴小弟渡過幾個秋冬的 iPod Classic，不過連 Apple 自己都半放棄 iPod 的時候，都沒有致不致敬的問題了：將好設計延續落去反而是一件好事。
中國品牌出品的 player 最令人放心的當然是硬件用料，因為除了所有中國品牌都傾向將最好的硬件投入到旗艦產品上，所有原材料都近水樓台，盡用地理和環境優勢輕鬆在規格表上砌低對手，何樂而不為？
QP1R 的解碼採用 Cirrus Logic CS4398 晶片，內置建旗艦檯機 CAS192D 的 3X 時鐘架構，支援 24bit/192kHz PCM 及 DSD128 的音樂檔案之餘，獨立供電的時鐘又可以降低播放不同檔案時的誤差。隨着硬件普及、生特產成本下降，支援原生 DSD 而非 DoP 似乎將會是 2016 年 Portable Audio Player (DAP) 的發展趨勢？
▲「Assembled in China」，唔通唔係 Made in China？我得到的答案係：「少年，你想多了。」因為有 Hi-Fi 零件由歐美製造，所以唔可以寫 Made in China， 都算 Questyle 幾老實。
耳擴線路設計就以自家旗艦家用檯機 CMA800R 做藍本，用全分立設計 Class A 放大器，加上 Nichicon F95 音響級電容、德國 Wurth 電感、NDK 的訂制低噪晶振等發燒元件，再加埋 Questyle 專利電源模式放大器 CMA (Current Mode Amplifier)，所以 QP1R 可以做到高輸出、低失真，聲音準確自然。
雖然定價偏高，但設計、用料和造工至少都有一定水準，買嚟用至少都唔不會揼心口。
中國品牌出品的 player 最令人放心的當然是硬件用料，但最令人擔心的就是硬件調配和控制。所謂耳聽為實，今次就聽首閃靈的《共和》聽下亮麗成績表下的 QP1R 實際上表現如何。
台灣樂團閃靈 2013 年的專輯《武德》主要透過回顧台灣自建立後，歷史上數百年間的種種暴力場面，反省文明社會和暴力行為之間的關係與責任。
外國人聽英文版，被閃靈吸引的地方可以是東方金屬 (當然還有團長 Doris)，但對本土台灣人 (或者任何使用華語的人) 來說，閃靈的歌曲是一段又一段被忽略在正史之外的本土史事。不沉淪在小確幸，關心台灣本土社會發展，提倡共和、平等、反核比樂器的聲音更代表閃靈。
▲閃靈團長 Doris (已婚) 歷年來被 N 咁多本外國雜誌選為「No.1 辣妹」，所以除左東方金屬呢個因素之外，Doris 大概都係閃靈長期閃盡全球的原因之一。
有人會話台語聽唔明，實情是咁的，無論你英文有幾好，黑金屬化的英文連土生土長的西方人都未必會聽到幾多，所以各位 (偽) ABC/BBC/CBC/嘜嘜C 唔好再同我講聽唔明啦，你話聽唔到都仲合理啊哥哥姐姐。自言英文好同唔多識中文唔會顯得突別高雅，只會表示你學識少，讀書 1999，OK？
其實《共和》兩隻字都沒有什麼好解釋，雖然講台灣歷史革命的歌詞有點土，但老土依然不減一分熱血。因為「氣勢拼山河石獅嘛喝振動」，有拼一翻事業的人就有「意志撼天地虎爺嘛來護航」的氣勢，無論建立新國家、新共和、新社會、還是新時代，靠的就是知道「雨總會停，霧會散」的人：因為只有永遠可以堅持到最後的一群人才會見證到新世代的來臨。如果沒有雜音、繁榮安定的和諧社會就是共和，說出口的人似乎在以自己方式理解世界；或者妄想自己就是世界。
聽旋律黑金屬 (Melodic Black Metal) 講求的不是解析力，是爆發力、狠勁、層次以及控制力。如何揣摩、演繹歌曲的神韻就是 player、耳機、耳擴之類適合與否的關鍵。
用到 Hi-Fi 級硬件的 QP1R 在驅動力 (推力) 方面當然無問題，阻抗 40Ω 左右的耳機都可以推得好，50Ω 以上的就未試過，大家試左的話敬請同小弟分享下。(90度
▲呢個介面好搞鬼，當你不斷轉個轉盤想睇晒成個 menu，你就會發現你 loop 極都只係同一頁果 6 個選擇，要睇下一頁？請先襟另一個掣跳去下一頁，再玩下個轉盤：咁要個轉盤嚟做嘜？
但控制力呢.. 唔，就有如大部分的國磚一樣，不是十分理想。雖然 QP1R 力水確實充足，聽《共和》時的爆發力和氣勢充沛，主音 Freddy 林昶佐的嘶吼勁度十足、乾而不澀，但就因為收放速度未夠快，所以欠缺些少狠勁，就是 player 的演繹追不上樂器飆的速度。
以國磚而言，QP1R 的清晰度算是不錯，失真情況亦不明顯，但就依然脫不了那股中國味。加上控制力不見得特別優秀，令層次感都受到「力大而聲粗」的問題影響：唔係聲音未夠仔細，而是有時會有啲亂。就算是背景尚算寧靜、沒有雜音，但播出來的聲音就係唔自然，更莫講和諧。
薰在 QP1R 上看到 Questyle 想製造一部符合全球大眾標準的 player，但完成品 QP1R 說的是 Questyle 的工藝仍需努力的同時，定價不要太大想頭。似乎所有中國品牌理解世界時都有一套自己方式？我只知道在一片「抵玩」、「收你三千蚊有萬三蚊質素」的呼聲之下，我依然未見到一部全面而有水準的中國品牌 DAP。
▲內置 32GB，機底有兩個 microSD 卡槽，每個最高支援 128GB，加埋就有 280GB 左右用，短期內都應該夠用啦。
另外一樣不得不提的是，機頂的音量旋鈕設計原意大概是更方便在袋中「盲操作」？實際使用成日都會遇到「自動盲操作」：即是行行下路突然好大聲，令到我都曾經在地鐵上因此問題而大聲講粗口。雖然有防撞欄叫做減少誤觸、碰撞的機會，實際上我都相信防撞欄是機上最優秀的設計之一，如果唔係我可能已經會因為保護雙耳而將部 QP1R 摔爛。
▲機頂由左至石分別有 3.5mm 耳機插頭，駁耳擴用的 LO (Line Out) 插頭，同埋有防撞欄保護的音量旋鈕。
如果只因為 Questyle 係中國牌子就斥其不是，的確不公道。平心而論，作為第一部隨身 player，QP1R 三頻平均，分析力算中上，推力優異在只講硬道理的「硬件」世界的確無得輸。
但音樂世界講的是感覺，唔是規格表勁過人就可以，好似金屬樂套鼓不一定要 double bass，8 弦結他、6 弦 bass 又未必真係有用。一味大力其實唔係好實際，因為又係果句，「推得到唔代表推得好」，雖然 QP1R 推大部份耳機都夠晒力，但唔好聽已經係致命傷。
更準確地講，聲粗，控制力唔夠好：駁用混合單元耳機聽時情況更加明顯。另外一樣重要的是，QP1R 明顯地不是「雜食」系 player，所以如果自己本身已經有偏好耳機，真係要落街聽下夾唔夾先：因為用不同耳機，效果同聽感真係可以有好大分別。又，如果想揾部推力大、雜食可以唔駛成日換的一體 player，舖頭大概會有更多比 QP1R 好的選擇。
其實 QP1R 整體不錯，但如果要我掏出 7000 個大洋去買一部 player，我會對部機的內、外在都有更高的要求。
講左咁耐，其實如果 QP1R 不是「Made in China」而係「Made in Korea」，大概標價貴多一倍都會有人搶住買，賣到斷貨，開返個 Club 都仲得。
