جربت قبل كده ترتب حياتك على شخص،
وفي الآخر، كل اللي رتبته ضاع ومبقاش ليه وجود!
هي كانت دي حياتي من سنين فاتت،
طيب أكيد عارف وسمعت قبل كده عن العوض، يعني جُمل بتتقالك من القريب والغريب زي:
"عوض ربنا كبير متقلقش..".
وجُمل من دي كتير، كنت اسمعها من هِنا، ومع إن قلبي عنده يقين بـ كل ده، إلا إن عقلي كان رافض فكرة التعويض نفسها، ومكنش قدامي أي باب ادخله علشان ارجع الأمل تاني لحياتي، واتفائل بيها كما لو كنت لسه طالعة من بطن أمي!
جه وأنا مكنتش عاملة حسابه.. لأ الحقيقة، كنت رافضة إنه ييجي، مكنش لازمني، كنت دايمًا بشوف إن البني آدم بيكون عنده قدرة بصرية رهيبة تقدر تشوف اللي جاي، اللي مستنيه من بعد وقعات كتير، لحد مايقع وميبانلوش قومة!
بس الحقيقة إن الإنسان معندهوش علم بأي شئ، وجاهل قصاد اللي مرتبهوله ربنا..
وزي ماتقول كنت دايمًا بقفش نفسي وانا بقول ولو حتى من غير صوت عالي.. "تمام يارب أنا راضية.. بس ارحمني، وهونها، وقويني، لحد ما اجيلك..".
طبعًا ناس كتير هتفتكر العوض جه على شكل "راجل" وبس!
وده مش صح.. ولا غلط في نفس الوقت.
الحقيقة إن العوض جه من أصل الفكرة نفسها..
لسه قدامي حياتي اللي ضيعت كتير فيها وانا باصة تحت رجلي، وانا مش عارفة انسى الماضي، ودايمًا معتقدة إني لازم اعيشه حتى لو عدى!
لأ الحقيقة الماضي دايمًا جزء من حياتك، لكن مش حياتك كلها.
الماضي عدى علشان لما تفتكره تبتسم،
يا على نصاحتك وقراراتك اللي خدتها في يوم من الأيام ف وقت صح،
يا أما على خيبتك بس اللي أكيد بتحاول وهتفضل تحاول طول حياتك تتعلم إنك متخيبش تاني أو عالأقل مش زي الخيبة الأولى.
يا إما علشان لما تفتكره تدمع، وتبتسم في نفس الوقت.
والوقت الصعب اللي نَفسك مرت بيه ونجت منه. "الحمدللَّه".
من فكرة لقيت نفسك فيها، وهي كمان كانت مستنية دماغ عبقرية تستاهلها.
جه في صحة اللي من أهم وأول الحاجات اللي تحمد ربنا عليها كل ثانية .. واللي لو عندك كنوز الدنيا وهي مش عندك، يبقى كإنك ولا حاجة.
العوض جه في العيلة والصحاب،
اللي بتشوف حياتك بيهم غير،
ده حتى المطبخ شاهد على الحكايات!
العوض جه في شخص، بيحبك وبيخاف عليك، ومهما حصل بينكم إنتوا ونس وملجأ لبعض.. يعني مفيش مفر، وده بمزاجك، وبقلبك، وبعقلك.
وكمان في اللحظات والمواقف الصعبة،
ماهو مش معنى إنك حزنت يبقى خلاص على كده!
انت عارف كويس إن مفيش حاجة بتقف على حاجة ولا على حد،
بس انت هتقوم علشان أسباب كتير أوي، صدقني
مش علشان هي ماشية ف انت لازم تسبقها، لأ..
مش حرام برضو يبقى معاك حاجة غالية أوي وتضيعها في الأرض كده!
افتكر قرأت جُملة اتقالت من ممثل أجنبي مشهور إسمه "روبن ويليامز" في لقاء ليه في برنامج، المذيع بيحاوره وبيسأله:
- أخاف من أن أكف عن التوهج.
فأنا بس النهاردة جاية أفكرك، إنك لسه عايش.. عندك فرصة متخافش.
jacobvanloon
izzy806
dededos
kianamaiart
stormborns
pixelskylines
