Weird Thinker

[weirdthinker-me-blog]

அண்ணாந்து பார்க்க வைத்த சிறுமை

A city is not gauged by its length and width, but by the broadness of its vision and the height of its dreams.

Herb Caen

ஏறத்தாழ 3000 கோடி செலவில் படேலுக்கு நர்மதா நதியில் உலகிலேயே உயரமான சிலையை நிர்மாணித்து உள்ளது பாரதிய ஜனதா அரசு.

இந்த 3000 கோடிக்கு வேறு என்ன என்ன செய்ய முடியும் என்று அனைவரும் ஏற்கனவே பட்டியலிட்டு விட்டார்கள்.

இப்படி ஒரு செலவீனம் இந்தியா போன்ற வளர்ந்து வரும், 70% ஏழைகளை கொண்ட நாட்டிற்கு கண்டிப்பாக தேவை இல்லைதான்.

அது ஒரு பக்கம் இருக்கட்டும்.

ஆர்எஸ்எஸ் என்பது கண்டிப்பாக தடை செய்யப்படவேண்டிய இயக்கம் என்று கூறிய படேலுக்கு இந்த அரசு சிலை அமைத்து தான் இங்கு நகைமுரண்.

பாவம் ஆர்எஸ்எஸ் நிறுவனத்தில் எவரேனும் ஒரு படேல் போலவோ ஒரு அம்பேத்கர் போலவோ அல்லது ஒரு பகத்சிங் போலவோ யாராவது இருந்தால் அவர்கள் ஏன் மாற்றுக் கருத்துள்ள பழந்தலைவர்களை இன்று தூக்கிப்பிடிக்க போகிறார்கள்.

மன்னிப்பு கடிதம் எழுதுவதற்கும் மதவெறியை பரப்புவதற்கும் காலத்தை செலவழித்த நிறுவனத்திற்கு வேறு எந்த வாய்ப்பும் இல்லை. இது காலம் தந்த தண்டனை.

[weirdthinker-me-blog]

மாத்தியோசி

திருக்குறள்:

செய்க பொருளைச் செறுநர் செருக்கறுக்கும்

எஃகதனிற் கூரிய தில்.

பகைவரின் செருக்கை அழிக்கும் தகுதியான கருவி பொருளைத் தவிர வேறொன்றும் இல்லாததால் அதனைச் சேமிக்க வேண்டியுள்ளது.

இந்தக் குறளை இன்று தற்செயலாக படிக்க நேர்ந்தது.

உடனே மனதில் தோன்றியது ஒரு எண்ணம்.

நம்முடைய பொது புத்தி சொல்வது என்னவென்றால் ஒருவன் பணக்காரன் என்றால் அவன் நல்லவன் அல்ல. ஒருவன் பணத்தைத் தேடினால் அவன் அதேநேரம் அறத்துடன் இருக்க இயலாது.

அதனால்தான் நம்முடைய கதைகளில் எல்லாம் பணக்காரன் ஒரு வில்லனாகவே சித்தரிக்கப்படுகிறான். இதில் முரண் என்னவென்றால் நாம் யாரும் பணத்தை தேடாமல் இருப்பதில்லை.

உழைக்கும் ஒவ்வொருவருமே பணத்தை நாடி, அந்தப் பணம் தரும் வசதிகளை நாடி போராடுபவர்களே!

அப்படியாக, ஏன் பணத்தை வெறுக்க வேண்டும்?

இந்த அடிப்படை மனோபாவத்தை மாற்றிக்கொள்வதன் மூலம் நாம் சில அடிப்படை தவறுகளை திருத்த முடியும் என்று நினைக்கிறேன்.

இதே போன்ற இன்னொரு முரண் - கார்ப்பரேட் கம்பெனிகளில் வேலை பார்த்துக்கொண்டே முதலாளித்துவத்தை அவதூறாக பேசுவது அல்லது எண்ணுவது.

அதற்காக முதலாளித்துவத்தில் எந்தக் குறையும் இல்லை என்று நான் சொல்லவில்லை.ஆனால் பொருள் ஈட்டுவது ஒரு சமூகத்தின் அடிப்படை தேவைகளை பூர்த்தி செய்ய கண்டிப்பாக தேவையான ஒன்றாகும்.

முதலாளித்துவம் அதற்கான ஒரு கருவிதான். அதன் பக்க விளைவுகளான பிரச்சனைகளை நாம் தனியாக தீர்க்க வேண்டி உள்ளது. ஆனால் நாம் ஒரேடியாக தவிர்க்க முடியாது.

கம்யூனிசம் சோஷலிசம் capitalism என்று வரையறுத்து நாம் அந்தந்த கோட்டுக்குள் நிற்க வேண்டியது இல்லை. ஆங்கிலத்தில் best of the both worlds என்பார்கள்.அதுபோல ஒவ்வொரு சித்தாந்தத்திலும் உள்ள சிறந்த விஷயத்தை நாம் எடுத்துக்கொள்ள வேண்டும்.

கம்யூனிசம் பேசும் சைனா போன்ற நாடுகளில் எப்படி பொருளீட்டுவது முனைப்புடன் நடக்கிறதோ, அது போல free மார்க்கெட் பற்றி பேசும் அமெரிக்கா பிரிட்டன் போன்ற நாடுகளில் இடதுசாரி கட்சிகள் அண்மை காலத்தில் சிறந்த அரசியல் வெற்றிகளை பெற்று வருவதை நாம் காண்கின்றோம். எவ்வளவுக்கெவ்வளவு ஒரு சித்தாந்தத்தில் ஊறுகிறோமோ அவ்வளவுக்கவ்வளவு மாற்று சித்தாந்தங்கள் தேவைப்படுகிறது.

[weirdthinker-me-blog]

மாற்றங்களே வினா மாற்றங்களே விடை

இது ஒன்றும் 96 படத்தை பற்றிய பதிவு இல்லை. கேரளாவில் சபரிமலை கோவிலில் பெண்கள் நுழைவது குறித்த சர்ச்சை கடந்த சில நாட்களாக சூடுபிடித்துள்ளது. இதில் மதவாதிகள் அரசியல் ஆதாயம் அடைய பலவகைகளில் போராட்டத்தை தூண்ட முயன்று வருகின்றனர். அது ஒரு பக்கம் இருந்தாலும் அரசியல் சார்பின்றி மேலும் மத சார்புமின்றி இந்தப் பிரச்சினையை அணுக வேண்டியுள்ளது. மத வழக்கங்களில் அரசு தலையிடக் கூடாது என்பதை ஏற்க இயலாது. அப்படி எனில் எல்லா மதங்களும் பற்பல கொடூரமான பழமையான காலத்திற்கு ஒவ்வாத பழக்க வழக்கங்களை கொண்டு உள்ளது. மதப் பழக்க வழக்கங்களை தாண்டி, நாட்டு மக்களுக்கு எது நல்லது கெட்டது என்று முறைப்படுத்த வேண்டிய பொறுப்பு அரசுக்கும் நீதிமன்றங்களுக்கும் கண்டிப்பாக உள்ளது. அப்படி விடாப்பிடியாக இந்த வழக்கத்தை கடைபிடிக்க வேண்டிய காரணம் என்ன? பெண்களின் மாதவிடாயை ஒரு காரணமாக கொள்ளும் ஒரு வழக்கம் கண்டிப்பாக பிற்போக்கானது. இதை எல்லா சார்பு மக்களும் தயக்கமின்றி ஒதுக்கி வைத்து ஒரு முற்போக்கான சமூகம் உருவாக கை கொடுக்க வேண்டும். அதை செய்தால் கண்டிப்பாக நாளைய சமூகம் நமது தலைமுறையை நன்றியுடன் பார்க்கும்.

[weirdthinker-me-blog]

அரசியல் பழகு

"The more you read about politics, the more you got to admit that each party is worse than the other." - Will Rogers

என்னுடைய முதல் பதிவு அரசியல் பதிவாக இருக்க வேண்டும் என்று எனக்கு ஒரு ஆவல். அரசியல் பற்றி நமது மக்களுக்கு ஒரு மிகப்பெரிய தவறான புரிதல் இருக்கிறது

நம்முடைய குழந்தைகளை படிக்கும் காலத்திலிருந்தே நாம் அரசியல் பற்றி பேச விடாமல் தொடர்ந்து தவிர்த்து வருகிறோம். இது இந்தியாவில் மட்டும் இருக்கும் சூழல் அல்ல.

எனக்குத் தெரிந்து ஒரு பருவம் வரும் வரை, அதாவது ஒரு முப்பது வயது வரும் வரை யாருக்கும் சரியான அரசியல் புரிதல் இருப்பதில்லை.

அதற்கு முக்கிய காரணம் நாம் அரசியல் பற்றி பேச ஆரம்பிக்க வெகு காலம் ஆகின்றது.

ஒருவர் எந்த சார்பும் இன்றி அரசியலை பார்க்க ஆரம்பிக்க ஒரு வயது அல்லது ஒரு முதிர்ச்சி தேவைப்படுகிறது.

பள்ளிக்காலங்களில் இருந்து அரசியல் பழகுவதன் மூலம் வெகு விரைவாகவே அரசியல் தெளிவு ஏற்படும் என்பது என்னுடைய திண்ணம்.

நாம் வெறுமனே அரசியல்வாதிகளெல்லாம் வயது முதிர்ந்தவர் களாகவே உள்ளனர் என்று குறைகூறுவது மூலம் எந்த மாற்றமும் வரப்போவதில்லை.

எப்படி புதிய தலைமுறையினர் பல்வேறு துறைகளில் புதிய modern மனப்பாங்கோடு சாதித்து வருகின்றனரோ அதுபோலவே அரசியல் களத்திலும் இளைய தலைமுறைகள் பெரிய மாற்றத்தை கொண்டுவர இயலும். அதற்கு குறைந்தபட்ச அரசியல் அறிவது மிகவும் முக்கியம்.

சரி அப்படி என்னதான் குழந்தைகளுக்கோ, அல்லது கல்லூரி பருவத்தினருக்கோ அரசியலை அறிமுகப்படுத்த முடியும் என்று எண்ணுகிறீர்களா?

நாம் அன்றாடம் பார்க்கும் விஷயங்களில் மறைமுகமாக அரசியல் பின்புலத்தில் உள்ளது. அதை நாம் போட்டு உடைத்து வெளிப்படையாக இளைய தலைமுறைக்கு சொல்லித் தரும்போது அவர்கள் சிந்திக்க ஆரம்பிப்பார்கள்.

எதையும் மாற்ற முடியாது என்ற அவநம்பிக்கையுடன் அவர்களை வளர்ப்பதை விட ஏன் ஒரு விஷயம் ஒரு விதமாக நடக்கிறது என்பதை அவர்களை சிந்திக்க வைப்பது நாம் சமூகத்திற்கு செய்யும் மிகப்பெரிய தொண்டாகும்.

யாராக இருந்தாலும் அவர்கள் சிந்திக்க ஆரம்பித்து, ஒரு அரசியல் பார்வை உருவாக அவர்கள் சுய சிந்தனையுடன் இருக்க வேண்டியது மிகவும் முக்கியம்.

[weirdthinker-me-blog]

அறிமுகம்

வெகு நாட்களாய் மனதில் தோன்றியதை அப்படியே எழுத வேண்டும் என்று ஒரு ஆவல். பல யோசனைகளுக்குப் பிறகு, இப்படி ஒரு வலைப்பக்கத்தை ஆரம்பித்துவிட்டேன்.

இந்த தளத்தில் நான் என்னுடைய அனுபவங்களையும் நான் படித்து ரசித்தவைகளையும் பகிர எண்ணியுள்ளேன்.

இப்படித்தான் எழுத வேண்டும் என்றோ, இல்லை இவரைப் போல் எழுத வேண்டும் என்றோ நான் எந்த முன்முடிவும் கொள்ளவில்லை.

ஆனால் நான் எழுத ஆரம்பிக்க, அதுவும் ஒரு கட்டுரை வடிவில் எழுத முக்கியமான ஒரு inspiration சுஜாதா அவர்கள்.

ஏனெனில் எனக்கு கதை கற்பனை போன்றவற்றில் அவ்வளவு நாட்டமில்லை. சுஜாதாவின் கற்றதும் பெற்றதும் போன்று பொதுவான விடயங்களை கருத்து சுதந்திரங்களுடன் எழுதப்போகிறேன்.

இப்போதைக்கு இப்படியான ஒரு அறிமுகம் போதும் என்று நினைக்கிறேன். என்னுடைய எழுத்துகளை படித்து உங்களுடைய கருத்துகளை பின்னூட்டத்தில் பகிருங்கள். தொடர்ந்து பேசுவோம்.