芙芙little kitchen

深信努力練習烹飪，上天就會賜下良緣，如今美夢成真，成為準人妻之時，更享受煮食樂趣，記錄著美食與我的一點一滴。

[fufulittlekitchen]

#派對小食 #簡易白汁製作 之前網購過一款白汁小食，就是用可愛的小杯盛著， 兩姊妹都很喜歡吃，4小杯都被她們吃光了🤪， 正想下次自己煮，剛巧有朋友來作客， 用少少簡單食材就可以煮出6個錫紙杯份量🤩， 味道跟那個即食小吃一樣呢😋。 🌟在底層鋪薯蓉便可變成白汁薯蓉杯🌟 🌟以下食譜白醬底份量較多，可留下一半製作其他美食 📝白汁粟米香腸杯 食譜 材料： 粟米半條 芝士腸10條 小薯仔2隻 芝士碎適量 水1碗 鹽適量 雞粉半茶匙 胡椒粉適量 白醬底材料： 麵粉40g 牛油15g 牛奶280ml 1️⃣切出粟米粒備用；小薯仔去皮切小粒；芝士腸切半備用。
2️⃣牛油小火煮溶，放入麵粉炒成麵糊，逐少倒入牛奶，煮成白醬。
3️⃣將一半白醬盛起，倒入1碗水、鹽、雞粉及胡椒粉，煮成白汁。
4️⃣倒入粟米粒、薯仔粒及芝士腸，與白汁炒勻後煮一會。
5️⃣把4.盛在錫紙杯中，撒上芝士碎。
6️⃣預熱焗爐180度，以180度烤10分鐘即可。 圖文食譜：http://fufulittlekitchen.blogspot.com/2022/05/blog-post_24.html?m=1 FB: https://www.facebook.com/fulittlekitchen #簡易食譜 #小食食譜 #白汁 #小食 #partyfood #teatime #大食會 #蒸焗爐食譜 #芙芙littlekitchen #teatimesnacks #snack #foodideas #foodoftheday #hkrecipe #recipeshare 
https://www.instagram.com/p/CeFu2HrJtP_/?igshid=NGJjMDIxMWI=

[fufulittlekitchen]

<蒸焗爐食譜> 原汁原味-檸檬香草焗雞腿

自從有咗小朋友，屋企煮咩都會諗佢哋先， 小菜苗而家快3歲，都會食好多大人餸， 盡可以我哋會煮得淡味少少，有時會加蔬菜烤下雞肉， 通常咁樣煮菜苗都會食好多架。

以往用傳統嘅焗爐烤，今次就轉用美的蒸氣焗爐嘅熱風對流烘烤， 估唔到烤出嚟嘅雞肉嫩滑多汁，比一般焗爐更有效鎖住肉質水份， 唔會咁易令肉變硬變乾，真係唔錯架，下次試下用嚟烤春雞先。

檸檬香草焗雞腿 食譜

材料：雞下髀3隻、甘筍1條、紫洋蔥半個、蒜粒8粒、檸檬片5片、橄欖油及鹽適量

醃料：鹽1.5茶匙、黑椒適量、意大利綜合香草適量

1. 雞下髀洗淨後抹乾，用刀切開雞肉，用醃料均勻塗抹後醃2小時備用。

2. 甘筍去皮滾切成塊，紫洋蔥去皮切塊，加入橄欖油及鹽拌勻。

3. 將甘筍及紫洋蔥放在碟中，再放上雞下髀、蒜粒，檸檬片放最表面。

4. 預熱蒸焗爐210度，以200度熱風對流烤焗40分鐘即可。

📺影片食譜：https://youtu.be/ZUfLuu8I-4c

歡迎訂閱及讚好 芙芙little kitchen： Facebook: www.facebook.com/fulittlekitchen

醃肉時將調味均勻塗抹在雞腿上，幫助入味。

Convert Preheat Mode預熱，完成後會有咇咇聲響提示。

然後再選擇Convert Mode熱風對流烘烤。

烘烤出嚟嘅雞肉好嫩，雞汁及蔬菜汁混合一起， 非常鮮味，仲有陣陣檸檬清香。

呢部蒸焗爐仲特設「腔體清潔」同「除味」嘅清潔模式， 對於烤肉呢啲好大味同多油嘅菜式，焗完之後機內一定好油， 利用腔體清潔可以蒸走哂啲油，再用抹布一抹就乾淨哂， 非常方便好用呢。 

[fufulittlekitchen]

<送飯菜食譜> 醬油牛肋肉

前排芙媽同我心有靈犀地都買咗牛肋肉，左諗右諗點煮好呢， 前排先食完番茄燉牛肋，想轉轉口味， 正苦惱之際，芙媽竟然煮咗道超好味， 亦超好送飯嘅牛肋肉菜式，味道好似肉燥咁， 但又比肉燥有咬口，因為好濃味，少少已經好好送飯， 勁想加多隻蛋做蓋飯，一定好正。

醬油牛肋肉 食譜 材料：牛肋肉半斤、紫洋蔥碎1/3個、蒜蓉2湯匙調味料：甜豉油2湯匙、生抽2湯匙、鹽少許、水1/2碗

1. 牛肋肉切成小粒，汆水備用。

2. 燒熱油放入蒜蓉及紫洋蔥碎炒軟，再倒入牛肋肉炒一會，再加入調味料炒勻。

3. 將2.倒入電飯煲中，按下煲飯鍵炆煮。

4. 完成炆煮後，再加適量甜豉油及生抽調味即可。

今次用嘅係印尼ABC甜豉油，質感比較濃稠。

將牛肋肉切成小粒，再汆水備用。

除咗可以加洋蔥，仲可以加入冬菇粒架。

放入電飯煲，當煲飯咁煮就OK。

最後一定要試味，再加點甜豉油同生抽，色澤同味道就更好，更濃郁。

第二日用嚟帶飯食都仲係好好食呢。

[fufulittlekitchen]

<簡易糖水食譜> 紅棗雪耳燉桃膠

近來天氣炎熱，有時工作到個人都燥燥哋， 一於煲返碗糖水雪凍飲下，慰勞下自己先。

紅棗雪耳燉桃膠 食譜

材料：桃膠1抓 約少半碗)、雪耳1件、紅棗10粒、冰糖適量、水2L

1. 桃膠用水浸過夜，將雜質去除，再用水清洗備用。

2. 雪耳浸軟後洗淨撕成小塊，紅棗剪半去核備用。

3. 水滾後，將桃膠、雪耳放入以大火煲滾，轉小火煲40分鐘。

4. 將紅棗及冰糖倒入，煲15分鐘即可。 歡迎訂閱及讚好 芙芙little kitchen： Facebook: www.facebook.com/fulittlekitchen

乾桃膠份量少少已經可以發到好多，今次冇磅到實際重量， 大約係1手抓落去嘅份量，記得要俾多啲水去浸。

喜歡膠啲可以用大雪耳，喜歡稀啲用一小朵雪耳就夠。

反正都係煲，梗係要煲啲養顏又滋潤嘅糖水啦。

雪凍後會變杰身啲，我就好喜歡呢種少少杰又清甜嘅口感， 飲完成個人透心涼呀。

[fufulittlekitchen]

<三步驟快煮食譜> 蒜油拌茄子

芙芙家一向都係大魚大肉嘅家庭，可能因為係客家人， 最怕人唔夠食就住就住，每餐啲餸都係大大碟， 所以食到我哋成家都咁肥(哈哈)。 自從嫁咗人之後，間中都要就返老公口味嘅， 占士哥好喜歡食菜，每次佢放假，我都會煮多少少蔬菜俾佢食， 但成日都係炒菜、上湯煮都好悶下， 今次轉一轉整個蒜油拌茄子， 將茄子蒸熟，另外煮個蒜油淋上面，做前菜一流。

蒜油拌茄子 食譜 材料：茄子1條、蔥花適量汁料：油1/4碗、蒜蓉2湯匙、醬油2湯匙、糖0.5茶匙、水約1/4碗、檸檬汁數滴

1. 茄子去頭切半，隔水蒸15分鐘後取出，待涼後手撕成茄條。

2. 燒熱鑊1/4碗油後，把蒜蓉放入小火炒香，倒入其餘汁料材料煮滾。

3. 將汁料倒於茄子條上，撒上蔥花即可。

以往係將蒜蓉同茄子一齊蒸，清淡得嚟又夠香，今次試下分開煮先。

而家將蒜頭煮成蒜油，加啲豉油調味，比蒜蓉蒸茄子更好味。

加咗少少檸檬汁取代醋，有丁點酸味就夠了。

雖然話係前菜，其實邊食都會邊想食飯， 可能個汁太香，唔覺意又整咗個送飯菜出嚟。 

[fufulittlekitchen]

<三步驟快煮食譜> 汁燒帆立貝

補一補父親節時煮嘅一道簡單小食食譜，汁燒帆立貝， 帆立貝係一樣必定會出現在芙家雪櫃嘅食材，多數用牛油蒜蓉煎， 今次搞搞新意思，扮日本料理用燒汁煮下先。

汁燒帆立貝 食譜

材料：帆立貝6隻燒汁：生抽3湯匙、味醂1.5湯匙、米酒1.5湯匙、糖1湯匙

1. 帆立貝洗淨後抹乾備用，燒汁材料拌勻備用。

2. 燒熱油，中火煎帆立貝至兩個金黃。

3. 倒入燒汁與帆立貝拌勻，小火煮至汁料收乾即可。

=== === === === === === === === ===

歡迎讚好 芙芙little kitchen：

Facebook: www.facebook.com/fulittlekitchen

=== === === === === === === === ===

一倒入燒汁就要轉小火，燒汁好快就會煮乾。

沾滿燒汁嘅帆立貝好好味，用嚟搭冷麵食一流呀。

[fufulittlekitchen]

<簡易家常版> 忌廉蘑菇湯

妹妹菜蜜初初加固時，芙家買咗盒手提攪拌套裝，

主要用來處理加固食物，到而家妹妹已經可以食粗一點嘅食物，

呢個攪拌棒就變成我哋煮湯嘅好幫手，早幾日煮咗個忌廉蘑菇湯，

非常簡單，大人小朋友都岩食架。

忌廉蘑菇湯 食譜

材料：蘑菇200g、紫洋蔥1/3個、高湯250ml、水300ml、忌廉100ml、麵粉2湯匙、牛油10g

1. 蘑菇切片，紫洋蔥去皮切碎備用。

2. 熱油後放入洋蔥碎炒軟，再倒入蘑菇及牛油，炒至蘑菇軟身。

3. 轉小火倒入麵粉快炒混合，倒入水及高湯煲滾。

4. 用攪拌器打碎食材，大火煲5分鐘，倒入忌廉再煲至濃湯狀即可。

如覺得太稀，有需要可加適合生粉水煮至合適濃度。

📺影片食譜：https://youtu.be/HLXNQI9gONA

=== === === === === === === === ===

歡迎讚好 芙芙little kitchen：

Facebook: www.facebook.com/fulittlekitchen

=== === === === === === === === ===

炒軟洋蔥需要慢慢炒。

蘑菇炒出水後，很快會變軟，再炒一會水份就會揮發。

加入麵粉要快速炒，很快燶底，原意加入麵粉為打麵糊， 令湯更濃，但芙芙今次加多咗水， 最後要加生粉水去煮濃啲。(食譜份量係岩嘅)

如果想菇味更濃，可以再添多啲蘑菇或其他菌類。

如家中冇手提攪拌器，可以將湯及食材倒入攪拌機中攪碎。

慢慢煲到想要嘅濃度即可，亦可好似我咁加生粉水去煮，

不過一定要逐少逐少落呀。

[fufulittlekitchen]

<自家製食譜> 吉列豬扒

每次要炸食物都覺得很浪費食油，所以兩年前去北海道時，

路經一間賣家品的商店，找到一個16cm的小炸鍋，

以不到1000yen的價錢入手，到了兩年後的早幾日，

芙芙終於開了它來用啦。

吉列豬扒 食譜

材料：豬扒2塊、麵包糠適量、麵粉適量、蛋液2隻、 鹽及胡椒粉適量、椰菜半個(切絲伴碟用)

1. 豬扒抹乾水份，輕輕𠝹開脂肪邊，再以鹽及胡椒粉抹勻，醃10分鐘。

2. 將麵粉均勻抹上豬扒，再沾蛋液，然後沾麵包糠，再重複沾蛋液及麵包糠。

3. 中火燒熱油，將豬扒放入以中小火炸熟，中途要翻轉，炸至兩面金黃即可。

4. 取出後放吸油紙上吸油，再切件，放於椰菜絲上即可享用。

更多簡易食譜 ↓ Follow and like ↓

Facebook：芙芙little kitchen

IG: fufu_littlekitchen

記著沾粉順序：麵粉→蛋液→麵包糠→蛋液→麵包糠

沾兩層麵包糠，炸出來的表面就會更脆。

可用木筷子測試熱油溫度，筷子放入時有氣泡黏著筷子即可。

小炸鍋SIZE剛剛好放到一塊豬扒，

千萬不要心急用大火炸，外面變焦裡面都未熟，

芙芙是用中小火炸，途中大概翻了三次。

如果油溫仍太熱，轉小火繼續炸即可。

炸到表皮變金黃就剛好了。

炸好就用吸油皮吸走多餘油份。

加上上次介紹的豬肉味噌湯，和大量椰菜絲， 吃時伴日式豬扒醬或沙津醬也很美味啦。

[fufulittlekitchen]

<簡易食譜> 日式料理-豚汁

早幾晚在家自製吉列豬扒，怕太過油膩， 於是配上清淡的豬肉味噌湯，用紅白蘿蔔煮出來的湯很清甜， 喝罷立即覺得中和了炸豬扒的熱氣，加上過程只需幾個步驟， 非常容易上手，比起煲中式湯水又節省很多時間。 

豚汁食譜

材料：紅蘿蔔半條、簡蘿蔔半條、薯仔1個(小)、豚肉片400g、 白味噌1大湯匙、味醂2湯匙、水1000ml

1. 紅蘿蔔、白蘿蔔、薯仔塊皮，切成角形薄片。

2. 豚肉片切小塊，用少許鹽及胡椒粉醃10分鐘。

3. 於鍋中燒熱油，將紅蘿蔔、白蘿蔔及薯仔逐一放入炒至半熟。

4. 將豚肉倒入炒熟後，把材料倒入煲中。

5. 加水1000ml，大火煲滾後隔去泡沫。

6. 加入味醂、味噌，小火煲15分鐘即可。

更多簡易食譜 ↓ Follow and like ↓

Facebook：芙芙little kitchen

IG: fufu_littlekitchen

喜歡可以改用豬腩片代替豚肉片。

煲蔬菜的湯滾起就會有泡沫，隨走後會令湯更甜。

[fufulittlekitchen]

<派對超簡單系列> 牛油果蝦肉一口小食(附食譜)

雖則聖誕節已經過去，但緊接住就係大除夕，

相信大家已經約好哂家人朋友，一齊踏入2019，

而芙芙都好急不及待同大家分享呢款一口小食，超級簡單易整，

主要食材牛油果同蝦都係超健康食物，想開Party跨年不妨清新啲，

試下整呢款小食啦。

牛油果蝦肉一口小食 食譜

材料: 蝦12隻、餅乾12塊、牛油果(小)3隻、紫洋蔥半個、車厘茄8粒、青檸半個、鹽、黑椒適量、牛油25g、黑松露醬2茶匙

1. 紫洋蔥及車厘茄切碎備用。

2. 牛油果去核去皮後壓成蓉，加入紫洋蔥碎及車厘茄、半個青檸汁、少許鹽拌勻。

3. 蝦去殻取出蝦肉，去腸後洗淨抹乾，以少許橄欖油及鹽醃10分鐘。

4. 平底鍋燒熱牛油，放入蒜粒爆香。

5. 倒入蝦肉煎熟，撒上黑椒及黑松露醬炒勻後關火備用。

6. 預備餅乾，將2.牛油果醬放餅乾上，再於上面放置蝦肉即可。

↓ Follow and like ↓

Facebook：芙芙little kitchen

IG: fufu_littlekitchen

蝦肉同蒜頭牛油真係好夾，如果唔喜歡黑松露，唔落都可以架。

因為太忙嘅關係，忘記咗影低牛油果醬嘅製作過程，

占士哥好厲害將啲牛油果人手攪到一啲顆粒都冇，勁幼滑好味。

芙芙試味時係夾咗粒蒜頭食，點知味道都十分之突出，

早知咁好食就爆多幾粒蒜啦，咁好味一定要快手同大家分享下。

[fufulittlekitchen]

<派對之選-泰式好滋味> 泰式肉碎生菜包 (附食譜)

芙芙喜歡泰國菜嘅原因，除咗因為香料嘅味道好清新之外， 就係大部份菜式都用好多蔬菜，無論係湯品，抑或係肉類嘅菜式， 就連整咖哩都要落好多蔬菜，所以泰國菜好少會食到好膩，一般都會越食越開胃。

今次為大家推介簡單易煮嘅泰式肉碎生菜包， 絕對係派對食物嘅好主意之一，仲未諗到整咩開party， 可以試下呢道菜式呀。

泰式肉碎生菜包 食譜 材料：免治豬肉500g、蕃茄半個、生菜1棵、蒜蓉2湯匙、辣椒1條(切粒)、九層塔1棵 調味汁：生抽1湯匙、老抽1湯匙、魚露1湯匙、糖1茶匙

1. 生菜洗淨備用，蕃茄洗淨後切小塊，九層塔拔下葉子洗淨備用。 2. 於平底鍋中加少許油，放入免治豬肉炒熟，再加入蒜蓉、辣椒及調味料同炒。 3. 加入蕃茄炒一會後，把九層塔倒入炒至葉子變軟即可。 ↓ Follow and like ↓ Facebook：芙芙little kitchen IG: fufu_littlekitchen

有生菜包住肉碎嚟食，絕對可以平衡肉類同蔬菜嘅攝取量。

食之前加點青檸汁，清新得嚟又開胃呢。

[fufulittlekitchen]

<簡易3步驟> 韓式薯絲煎餅 (附食譜)

韓式煎餅有好多配搭，喜歡香味嘅可以放韭菜，

喜歡食海鮮可以放蝦肉、魷魚，食素嘅可以只放蔬菜，

芙芙今次就以最簡單嘅材料製作小朋友都岩食嘅煎餅，

簡單3個步驟搞掂，絕對係下午荼點嘅好選擇呀。

韓式薯絲煎餅 食譜 材料: 薯仔1個、甘筍半條粉漿: 韓式煎餅粉1杯、水1杯、鹽少許、雞粉少許

1. 薯仔及甘筍去皮洗淨，切絲備用。 2. 粉漿材料混合好，將薯絲及甘筍絲倒入拌勻。 2. 燒熱油，將薯絲粉漿倒於平底鍋， 以中小火煎至定形，反覆煎至兩面金黃即可。

想睇最新食譜及小菜苗週記，歡迎到Facebook like下芙芙little kitchen

喜歡鹹香啲，可以加點芝士一齊煎架。

[fufulittlekitchen]

明太子薯仔蛋沙津 (附食譜)

明太子味道咸香，直接拿來送飯，加多碗麵豉湯就是一餐， 這個食法就是芙芙在日本旅行時，每天的早餐餐單， 回到香港很想念明太子的味道，這次用來做個沙津還是很美味。 

明太子薯仔蛋沙津 食譜

材料：明太子30g、薯仔3隻、雞蛋2隻、蛋黃醬2大湯曬、牛奶2湯匙、牛油少許、鹽少許

1. 雞蛋煮熟後，去殻切碎備用。

2. 明太子去衣，取出20g與蛋黃醬拌勻備用。

3. 薯仔去皮後切件，放入加鹽的滾水中煮熟後盛起，加一小塊牛油壓成薯蓉，再倒入牛奶拌勻。

4. 將雞蛋碎、明太子蛋黃醬與薯蓉一同拌勻，即可上碟。

5. 於沙津上放上剩餘的明太子，即可。

最新芙芙與小菜苗親子資訊，食譜發佈與美食分享，Please Follow: www.facebook.com/fulittlekitchen/

明太子真係好好味，芙芙成日話每餐淨係食明太子加個白飯都OK， 感覺就好似芙媽好欣賞食咸魚加白飯咁，真不愧係兩母女。

[fufulittlekitchen]

韓式辣煮豆腐 (附食譜)

最近好喜歡喺誠哥間超市買一隻叫硬豆包嘅豆腐， 佢同一啲聲稱硬豆腐，但切出嚟都係一掂即爛嘅唔同， 呢款硬豆包堅係用嚟煎炒都唔會爛，而且亦有豆味嘅。

芙芙一向好喜歡食辣嘢，所以韓國菜一定走唔甩， 以往煮嘅韓國料理都以肉居多，今次整個素菜，辣得嚟又食得健康啲。

韓式辣煮豆腐 食譜 材料：硬豆包2件、洋蔥0.5個、芽菜1/4斤、蔥2條

調味醬料：韓國辣椒醬1.5湯匙、韓國辣辣粉1茶匙、糖稀1.5茶匙、醬油2湯匙、蒜蓉2湯匙、水3湯匙

1. 洋蔥去皮切塊，芽菜洗淨，蔥斜切段備用。 2. 硬豆包切成豆腐片(1開8)，印乾水份後，放於平底鍋中煎至兩面金黃，盛起備用。 3. 燒熱油，中火炒洋蔥至軟身後，倒入豆腐及調味醬料炒勻。 4. 最後倒入芽菜炒至軟身，再撒上蔥段炒勻即可。

想睇最新食譜及小菜苗週記，歡迎到Facebook like下芙芙little kitchen

調味醬料一早拌勻備用，豆腐煎至兩面金黃就可以。

睇下呢款豆包，煎完又炒又唔爛，岩哂芙芙心意， 而且又好方便，普通超市就買到。 

加點芽菜食落多個口感，令呢道菜食落清新點。

話咁快就煮好，韓國嘅醬料一向都好惹味，用嚟送飯一流。

[fufulittlekitchen]

<在家吃大餐系列> 芝士焗大蝦伊麵 (附食譜)

為了迎接在娘家的焗爐，前陣子芙芙將廚房大執位， 辛苦芙爸將焗爐送來，芙媽則不斷嚷著要吃芝士焗大蝦伊麵， 因為芙爸爸之前在家煮過，現在焗爐送來了這邊， 芙媽只有在這裡才可吃了，所以芙芙做了一次練習， 煮得好食才可以煮給媽媽吃麻。

在家煮這個菜式其實很容易，伊麵只需煮1分鐘就可以盛起， 最複雜只就是煮個芝士汁(其實也很容易)， 試過一次就會明白，大家都來試試吧。

芝士焗大蝦伊麵 食譜 材料：大蝦8隻、伊麵2餅、mozzarella芝士碎100g、黑椒適量、鹽少許

芝士汁材料：牛油適量、蒜蓉1小碗、紫洋蔥半個(切碎)、車打芝士3片、牛奶半碗、雞湯200ml、生粉3茶匙

1. 伊麵放滾水中煮1分鐘盛起，再放於烤盤中備用。 2. 大蝦剪去鬚後，開邊去腸，除去蝦身的殻，於平底鍋中煎熟備用。 3. 燒溶牛油，小火爆香蒜蓉，再放入洋蔥碎炒軟。 4. 將雞湯、牛奶、車打芝士片加入3.中，中火煮至芝士溶化。 5. 倒入生粉水收乾醬汁，將大蝦倒入拌勻，再加少許鹽及黑椒調味。 6. 將大蝦夾起排於伊麵上，再把芝士汁倒於上面，再撒上適量mozzarella芝士碎。 7. 尚放入焗爐200度焗15分鐘，再轉220度焗多5分鐘即可。

*每個焗爐爐溫都有偏差，請自行調較溫度，焗至表面芝士變金黃帶點焦即可。

想睇最新食譜及小菜苗週記，歡迎到Facebook like下芙芙little kitchen

大蝦留下頭和尾，開邊開得深一點，煎出來就是一個個蝦球樣子。

炒軟洋蔥要少少時間，耐心慢慢炒。

芝士溶掉後，逐少加入生粉水收杰醬汁。

放入大蝦撈一撈，蝦肉都沾到芝士醬就OK。

伊麵一煮就軟，所以不需煮太耐，一兩分鐘就可以盛起。

將大蝦排好，放上至愛嘅芝士。

好喜歡睇住焗爐將食材慢慢變成金黃色，成日都忍唔住走去望。

家中有焗爐真的很美好，準備大餐的時間快一倍。

基本上呢道菜嘅食材都係快熟類，主要係煮汁時要少少時間， 喜歡的話換上意粉底都可以架。

[fufulittlekitchen]

<美的破壁機BL1188> 炎炎夏日透心涼_草莓藍莓雪芭 (附食譜)

準備踏入8月份，氣溫開始越嚟越高， 望住藍天白雲，實在好想食返杯冰凍嘅甜品。

街外買嘅冰品，通常都加咗好多糖， 想食得健康一啲，唯有自家製， 芙芙今次選用草莓同藍莓整雪芭，酸酸甜甜嘅味道又降溫又解喝。

早前介紹過美的破壁機BL1188，除咗可以煮湯煮豆漿煮粥， 仲可以當作攪拌機咁使用，佢嘅超高速轉動，可以將食物嘅營養好好保留， 今次用嘅水果營養咁豐富，如果用美的破壁機嚟攪打， 就唔駛怕營養流失哂啦。

草莓藍莓雪芭 食譜

材料: 草莓200g、藍莓100g、草莓果醬80g、水60ml、檸檬1/3個

1. 草莓及藍莓洗淨備用，檸檬榨汁備用。

2. 將草莓、藍莓、水、草莓果醬及檸檬汁放入美的破壁機中，將機蓋蓋好。

3. 用2檔攪打10秒，將其倒入一個扁平的碟上。

4. 包好保鮮紙後放入冰格雪藏至少3-4小時。

5. 取出水果雪芭，放室溫待雪芭較軟身時即可享用。

想睇最新食譜及小菜苗週記，歡迎到Facebook like下芙芙little kitchen

草莓味道酸甜，令人開胃，亦蘊含豐富維他命C， 可增強抵抗力預防感冒，而且亦有豐富膳食纖維， 可以幫助消化，預防便秘。

藍莓抗氧化能力強，可有效減慢老化，仲可以增強免疫系統， 而藍莓中嘅花青素仲有助保護腦部神經，係超級食物之一。

放入破壁機用2號力攪打，好快就打碎哂。

放入扁平嘅器皿，可以加快雪芭凍結。

一般雪3-4小時就可以食，芙芙因為太夜整， 變成雪過夜先食，所以雪芭面雪到結霜， 放返室溫待雪芭暖返少少，就會好易刮出嚟。

用呢兩種咁有營養嘅水果整出嚟嘅甜品，食多幾啖都唔怕啦。

占士哥吃這個雪芭時，喜歡加上原味乳酪一起吃， 大家都可以試下呀。

Midea 1.75L 冷熱全能破壁機 (BL1188) HK$ 2,799 (現有優惠推廣)

銷售點： 祟光百貨、千色、實惠、UNY、先施 等各大零售商

產品查詢： 3669-4888

詳細產品資料: https://goo.gl/R9x65K

這產品仲享有30個月保養架! =]

[fufulittlekitchen]

<美的榨汁寶MJ-JE2802> 炎炎夏日_甘筍石榴藍莓汁 & 甘筍提子汁(附食譜)

自從做咗媽媽，真係連病都唔敢病， 最怕病咗會傳染仔女，芙芙曾經同同事講過， 以前病會請假留喺屋企休息，而家病更加要返工， 因為唔想阿女同病菌困獸鬥，自己辛苦啲都唔緊要啦。

正所謂唔想病不如增強自身抵抗力， 最近工作太忙煮唔到健康餐，唔緊要嘅，可以飲下蔬果汁， 食多啲蔬果除咗冇咁易病，仲可以加強腸道健康添。

美的榨汁寶MJ-JE2802可以將蔬果直接榨汁，並將果渣完全隔住， 整部機大部份配件都可以拆出嚟清洗，非常方便， 而且安裝亦十分簡易。

榨汁寶操作非常簡單，只需要將蔬果放入引槽筒中， 選好力度再用推壓棒將蔬果壓落去，就可以輕鬆榨出果汁， 每榨完一次要按停機後再添加生果。

裝果渣嘅器皿容量好足夠，如榨一JAR約1L嘅果汁， 果渣隔剛好會裝滿。

這個就是內部嘅濾網組件，都可以拆出嚟清洗，好方便。

今日同大家介紹兩款以甘筍為主題嘅果汁，甘筍含有胡蘿蔔素同多種維生素， 可以延緩人體衰老，仲可以保護視力，增強抵抗力， 而且味道清甜，大人小朋友都好適合飲架。

甘筍石榴藍莓汁 食譜

材料(1杯份量): 紅石榴1個、藍莓500g、甘筍1條、蘋果1個

1. 紅石榴洗淨表面切去頭尾，用刀直切開4份(要視乎石榴粒的分佈)， 再預備一個碗，將石榴粒拍落碗中備用。

2. 藍莓洗淨後備用，甘筍、蘋果洗淨後切件備用。

3. 將石榴、藍莓逐少放入美的榨汁寶，選用1度榨出果汁。

4. 將甘筍、蘋果放入榨汁寶，選用2度榨出果汁即可。

想睇最新食譜及小菜苗週記，歡迎到Facebook like下芙芙little kitchen

紅石榴含豐富的抗氧化物質，仲可以降三高，有效預防心臟病。 而藍莓可以保護視力，同樣係抗老化嘅生果之一。

每粒紅石榴都有小核，用美的榨汁寶可以輕鬆將小核隔走，榨出純石榴汁。

甘筍提子汁 食譜

材料(1杯份量): 甘筍1條、青提子800g、橙1個

1. 青提子洗淨後備用，甘筍洗淨後切件備用。

2. 橙去皮後，將白色部份除出取出果肉。

3. 將青提子及橙肉放入美的榨汁寶，選用1度榨出果汁。

4. 將甘筍放入榨汁寶，選用2度榨出果汁即可。

如生果有白衣，建議要先除去，否則果汁會有苦味。

如表皮較厚嘅水果，例如西瓜、蜜瓜， 需要先去皮先可以放入榨汁， 好似甘筍、蘋果呢啲生果，就可以連皮連核咁榨。

如果生果較多汁，榨出嚟嘅果汁亦會較濃味， 芙芙試過淨係榨提子汁，出嚟嘅果汁非常甜， 用嚟溝梳打水飲very good啦。

Midea 美的榨汁寶 (MJ-JE2802) HK$ 398 銷售點： 全線日本城 產品查詢： 3669-4888

這產品仲享有30個月保養架! =]