Normal Kino

adam kimi kino axtaranlar üçün

[normal-kino]

Sürünən Bağça (2014)

Tim Grabham, Jasper Sharp | Birləşmiş Krallıq | 1 saat 21 dəq | İngilis dilində Azərbaycan dilində subtitrlərlə

Tarix: 2 Noyabr, 2018, 19:00

Məkan: Baku Idea Lab

Məkan və zamanın böyüdüldüyü, intellektin yeni formada ortaya çıxdığı, ayağımızın altındakı dünyanı araşdıran, real elmi-fantastika filmi. Sürünən Bağça (Creeping Garden) elmin kənarlarında çalışan alimləri, mikoloqları (göbələkləri öyrənən alimləri), sənətçiləri və onların heyrətamiz selikli göbələklərlə əlaqəsini araşdırır. Selikli göbələklər biologiyadan ilhamlanmış dizayn üçün, yaranma nəzəriyyəsini (qeyd: yaranış nəzəriyyələri ilə səhv salınmamalı), qeyri-adi hesablamaları və robot kontrollerlərini hazırlamaq və öyrənmək üçün istifadə olunur ki, bu sahələrin çoxu elmlə fantastikanın sərhəddində yerləşir. Lakin film bu orqanizmləri təkcə laboratoriyada deyil, həm də təbiətə üz tutaraq,  təbii mühitlərində də göstərir. Filmdən öncə bioloq Araz Zeyniyev tərəfindən "Seliklilər - bu kifəbənzər mikrobların "ağıl" ilə əlaqəsi nədir?" mövzulu mühazirə oxunacaq. Giriş: Pulsuz

[normal-kino]

Köpək Dişi (2009)

Yorgos Lanthimos | Yunanıstan | 1 saat 37 dəq | Yunan dilində Azərbaycan dilində subtitrlərlə

Tarix: 27 Oktyabr, 2018, 18:00

Məkan: Baku Idea Lab

Şəhərkənarında ana, ata və üç uşaqdan ibarət ailə yaşayır. Ev hündür hasarla əhatələnib və uşaqlar oradan heç vaxt kənara çıxmayıblar. Uşaqlar xarici təsirlər olmadan valideynlərinin doğru hesab etdiyi formada böyüyür, əylənir, nələrsə öyrənir, oynayırlar. Səmada görünən təyyarələrin isə oyuncaq olduğunu zənn edirlər.

Kənar dünyadan evə daxil ola biləcək tək insan Kristinadır. Ailə onu oğullarının seksual tələbatını ödəmək üçün çağırırlar. Evin böyük uşaqları ailənin əsas qanununa yaxşı bələddirlər: Köpək dişin düşməmiş evi tərk etmək qadağandır.

Giriş: Pulsuz

[normal-kino]

Qırmızı Bağ (film, 2016)

Tarix: 25 Oktyabr, 2016, 19:00

Məkan: YARAT Müasir İncəsənət Məkanı, Bayıl qəsəbəsi (Dövlət Bayraq meydanına yaxın), Bakı.

Giriş: pulsuz

Rejissor: Mirbala Səlimli | 1 saat 22 dəq. | Azərbaycan dilində

Müasir Azərbaycan kinosunu görə biləcəyiniz çox təəssüf ki, yeganə məkana çevrilmiş YARAT-ın Film Klubunda Azərbaycan və Rusiya ortaq istehsalı olan  Mirbala Səlimlini Qırmızı Bağ filminin nümayişi olacaq. Film vaxtilə babaları bəy olmuş, özü isə vilayətdə məktəb müəllimi işləyən Abbasın həyatından bəhs edir. Əlacsız doğma oğul arzusu onu öhdəçiliyində olan yetim uşağa və hətta sevimli həyat yoldaşı Vəfanın çıxılmaz vəziyyətinə qarşı kor edir. Lakin hər şey onun öz əlləri ilə Vəfanı ölüm ayağına sürüklədikdən sonra dəyişir. İndi Abbas bu dünyada qoruya bilmədiklərini o biri dünyada qaytarmaq istəyir.

[normal-kino]

yağış, yağış, yağış (mono tamaşa)

Tarix: 23 Oktyabr, 2016, 19:00

Məkan: ADO Teatrı, Bəşir Səfəroğlu 155, Nəsimi rayonu, Bakı

Giriş: 5 AZN (biletləri teatrın özündən almaq olar)

Fransanın məşhur, modern, tabuları sındıran dramaturqu kimi tanınan Bernard-Marie Koltès’in Meşələrin Astanasındakı Gecə (La Nuit juste avant les Forêts) pyesi müstəqil ADO teatrında nümayiş olunacaq. Fransanın Azərbaycandakı Səfirliyi və Azərbaycan Fransa İnstitutunun təşəbbüsü və dəstəyi ilə “Meşələrin astanasındakı gecə” pyesi Azərbaycan dilinə Gülnarə Sadıxova tərəfindən tərcümə olunub. “Həddən artıq narkotik maddə qəbulu nəticəsində psixoloji çöküş və intihar cəhdi sonrası yazılmış tamaşa, həyatını və bir xarici kimi sahib olduğu kənar şəxs statusunu başa düşməyə çalışan bir adamın gecə vaxtı şəhərin təhlükəli yerlərindən səyahətidir. Bu qonaqsevməz şəhərdə o, özünü başqalarının mərhəmətinə buraxmalıdır.” (Guardian)

[normal-kino]

Yaz, yay, payız, qış... yenə yaz (film, 2003)

Tarix: 30 Oktyabr, 2016, 18:00

Məkan: Başla Kafe, Xaqani Ticarət Mərkəzi (4-cü mərtəbə, British Town Kursları), Xaqani küçəsi 1, Bakı.

Giriş: 2 AZN

Rejissor: Kim Ku-Duk | 1 saat 46 dəq. | Koreya dilində Azərbaycanca subtitrlərlə

Ölkədəki qeyri-kommersial kino boşluğunu (daha doğrusu, quyusunu və ya çökəkliyini) təkbaşına əjdaha kimi doldurmağa çalışan Başla Cinemanın üçüncü kinosu. Cənubi Koreyalı rejissor Kim Ku-Duk’un filmi təcrid olunmuş göldə üzən Buddist monastırı haqqındadır. Filmin süjet xətti uşaqlıqdan qocalığa qədər həyatının müxtəlif fəsillərindən keçən Buddist rahib ətrafındadır. Kino orijinal səsləndirmədə və Azərbaycanca subtitrlərlə göstəriləcək.