أنا وبابا ١
بعد يوم طويل في الشغل بقالي اسبوع تعبان من كتر السهر أكلت أكلة جميلة مع حبيبتي وقضينا وقت جميل سوا
وبالصدفة جت سيرة الأكل وقعدنا نخطط لأكلة بكرة ونجيب منين العجينة وهنحط إيه على الوش وفجأة كأن في منطقة في دماغي كانت مضلمة فيها ذكرياتي وانا صغير وأول مكان ذوقت فيه بيتزا برغم قد إيه كان متواضع الذكرى فتحت باب ذكريات كتير فكرتني بأبويا الله يرحمه وفكرتني قد إيه كان كريم معايا وكان مدلعني وكان مصاحبني وبياخدني ألف معاه الدنيا
والدموع بقت قد الذكريات وكل ذكرى تجيب دمعه وانا مش حزين على حاجة غير إن كل اللي فاكرهوله أيام حلوه وكلها اتحولت ذكريات حزينة عشان مبقاش موجود ودموعي كترت كمان لما افتكرت آخر أيامه وقد إيه سفري وبعدي عنه خلى بينا مسافة كل ما افتكرها بكره نفسي إني كنت مش شايفها وإنه كان علطول يقول لي كلمني يا حبيبي احنا ملناش غيرك كلمني كل شوية محدش عارف احنا في الدنيا لحد امتى
بس انا كنت عبيط كنت فاكر إنه لسه بدري وإني مسيري هرجع من السفر وأشوفه وأقعد معاه ونتكلم في أى حاجة
فاكر آخر مره شوفته وفاكر نظرات عينه ليا وهو فخور بيا ومليانه حب وهو نفسه يجيبلي الدنيا كلها تحت رجلي حتى وانا راجل كبير وآطول منه
لو هنتكلم بصراحة انا عمري ما عدى عليا حد في حنيته وطيبته طيبته اللي كانت كتير بتستفزني لما يكون حد يستغله وهو عارف ومطنش عشان بيقول الناس غلابه وانا ربنا مش حايجني
انا بكتب عشان مش عايز أنساه أبدا مهما كلفتني الذكريات من حزن وعياط بكتب عشان حاسس إني ملحقتش أوريه قد إيه هو كان أحسن أب وقد إيه انا بحبه بكتب عشان كان امنيته يشوف ولادي بس القدر مكتبهلوش وبكتب عشان ولادي لما يجوا الدنيا يقروا ويفتكروه ويعرفوه ويحسوا اللي انا بحسه
لو فشلت إني كل ما افتكره اجيب سيرته وأدعيله بالرحمه وأتكلم عنه وأكتب ذكرياتنا معاه مش هسامح نفسي
ومكنتش أتخيل إن بداية حكايتي عن أبويا يكون سببها سؤال تحب تحط إيه على البيتزا؟
