وانا فى رابعة طب كنت بحاول اسافر برا مصر بكل طريقة و مكنش الموضوع بينجح معايا لحد ما سألت وعرفت شخص فى اسكندرية بيهرب شباب لليونان و فعلا روحتله و اتفقت و سافرت تهريب فى ظروف متتحكاش ووصلت اثينا و قعدت بالظبط ٩ ايام كنت خلالهم بحاول ادور على شغل وسكن مناسب وطبعا مش معايا اى أوراق قانونية واللى حصل ان بعد ٩ ايام اترحلت لمصر .. ووقتها دى كانت قضية؛ كل اللى اترحلوا معايا شباب كان فى منهم تعليم متوسط و فى مش متعلمين اصلا وانا الوحيد اللى كنت فيهم طالب جامعي ويومها الظابط اللى كان بيحقق معانا استغرب جدا ازاى اعمل فى نفسى كده واغامر فى السفر عن طريق البحر اللى عادى ممكن نغرق واترحل بشكل أصعب وقالى حرفيا انت كمان طالب طب يعنى كم سنة وتبقى دكتور ازاى تعمل كده .. الظابط ده اخدنى على جنب وقالى انت شكلك محترم وابن ناس وانا هعتبر نفسى مشوفتكش ولا اسمك موجود ..شوف مستقبلك وحرام انت كم سنة وهتكون دكتور ؛ رجعت طبعا اسكندرية و فكرة السفر مفارقتيش بس كنت خلصت الجامعة واتخرجت وبعدها مباشرة جاتلى هجرة لكندا وسافرت المرة دى وانا دكتور رسمى بشكل قانونى ومرتب .. وعلى مدار ١٥ سنة اللى هم وجودى فى كندا انا عمرى ما نسيت الظابط ده ولا اسمه ولا جدعتنه فى موقف أسهل حاجة كان ممكن ميعملهوش لولا انه عنده ضمير وانسان ومرضاليش بالبهدلة ..
من سنتين فتحت شركتى الخاصة و كنت بستقبل طلبات عمل من مختلف الدول لوظائف معينة و صادف انى كنت براجع بعض ال c.v بالذات اللى بتيجى من دول عربية ومصر خصوصا .. وقابلت اسم لمهندس برمجة شاب عمره ٢٣ سنة و اسمه مش غريب عليا فعلا .. طلبت من مكتبى نتصل بالمهندس ده ونحدد مقابلة اونلاين.. وهو كمهندس خبرته لسه ضعيفة و فى افضل منه للوظيفة فعلا ؛ قولتله انت اسمك مش غريب عليا لانى شكيت فى اسم والده والتشابه .. وسألته على مهنة والده قالى بابا لواء شرطة على المعاش و حاليا متقاعد ..
هل فى حد يصدق ان نفس الظابط ده هو اللى ابنه فى اسكندرية بيقدم طلب عمل ليا تحديدا فى كندا ..هو ميعرفنيش ولا اعرفه ..هو شاب عادى بيبحث عن فرصة ..
انا للحظة سكت تماما ..ولقيته بيقولى انا كده متقبلتش صح ؟!
قولتله انت كده اتقبلت جدًا .. و قول لبابا انك اتقبلت وسلم عليه ..هو استغرب جدا انى اقوله سلم على بابا .
انا بس علشان انفعلت بالموقف والصدفة فبكتب بسرد من غير تفكير لكن عاوز اقول ان كل اللى افتكرته ..أن الشاب ده اخد فرصة هو نفسه مش مصدقها مش بمجهوده ولا شطارته لكن بطيبة أبوه اللى قابلت ابنه بعد سنين بشكل القدر رتبه .. فالخير عمره ما بيروح ولا بيترمى فى البحر والله .. الخير اللى عملته هيقابلك و يسلم عليك كمان .
tangentwithtanner
kaledo-art
vaporwave
areudirty
discoholicmusic
ellievsbear
turnnoffyourmind
dailybridgerton
blakekathryn
