Lemúrinn @lemurinn - Tumblr Blog

Bandaríski ljósmyndarinn Josephine Powell ferðaðist um sléttur Anatólíu í Tyrklandi á sjötta og sjöunda áratugnum. Það voru umbrotatímar í Tyrklandi — efnahagur landsins óx hratt og fólk flykktist úr sveitum til borganna í leit að vinnu.

Merki þess eru þó varla að sjá á myndum Powells. Hún myndaði helst hirðingja og bændur, þá sem urðu eftir í sveitinni og lifðu áfram eins og forfeður þeirra höfðu gert öldum saman.

#Tyrkland #Josephine Powell

Leonid Rogozov herlæknir í leiðangri Sovétmanna á Suðurskautslandinu vissi að babb væri komið í bátinn hinn 29. apríl árið 1961. Hann fann fyrir slæmum verkjum hægra megin í kviðnum og var kominn með hita. Rogozov þreifaði á maganum á sér. Þetta gat ekki þýtt nema eitt: Hann var kominn með botnlangabólgu.

Hann var eini læknirinn í Novolazarevskaya-stöðinni, um hávetur á Suðurskautslandinu. Það var engin leið til að kalla á flugvél eða annan lækni. Næsta rannsóknarstöð var í um 1.500 kílómetra fjarlægð. Eina leiðin til að bjarga manni með botnlangabólgu var að skera hann upp sem fyrst. Rogozov neyddist því til að hefja botnlangaskurð á sjálfum sér.

#Leonid Rogozov #Sovétríkin #Suðurskautslandið

Höfuðstöðvar Þjóðarlýðræðisflokksins, fyrrverandi stjórnarflokks Egyptalands, brenna í miðri byltingunni í janúar 2011. Reykinn leggur yfir egypska þjóðminjasafnið til vinstri.

Lemúrinn segir sögu Frelsistorgsins í Kaíró, en það var í ársbyrjun 2011 miðpunktur alheimsins.

Þáttur úlfalda í Íslandssögunni er vafalaust mjög lítill, enda veit Lemúrinn ekki til þess að nokkur úlfaldi hafi búið hér á landi. Hinsvegar hafa að minnsta kosti tveir af æðstu ráðamönnum Íslands stigið á bak úlfalda.

Hinn búlduleiti fjólufroskur (nasikabatrachus sahyadrensis) býr í fjöllunum á vesturhluta Indlands. Hann verður að meðaltali um 7 cm langur og hljóðin sem hann gefur frá sér líkjast gaggi í hænu.

Vísindamenn uppgötvuðu ekki tilvist hans fyrr en í október 2003, þar eð froskurinn eyðir nánast öllu árinu neðanjarðar, fyrir utan þær tvær vikur sem monsúnrigningarnar standa yfir, en þá er fengitími hans.

Fjólufroskurinn á fáa að á sjálfu Indlandi en nánustu ættingja hans er að finna á Seychelle-eyjum, sem ku færa frekari sönnur fyrir þeirri kenningu að Indland, Madagaskar og Seychelle-eyjar hafi eitt sinn tilheyrt sama landflæmi.

Auglýsing í Morgunblaðinu 19. júní 1946. Skordýraeitrið DDT kom til sögunnar árið 1939 og reyndist hið árangursríkasta sem framleitt hafði verið. En fáum áratugum síðar kom í ljós að efnið var stórskaðlegt dýrum. Baráttan gegn DDT hófst fyrir alvöru árið 1962 þegar bandaríski líffræðingurinn Rachel Carson sendi frá sér bókina Silent Spring.

Í henni vakti Carson athygli á umhverfis- og eituráhrifum DDT. Hún varð fyrir vikið fyrir árásum því framleiðendur efnisins höfnuðu hugmyndum hennar alfarið. Árið 1972 var DDT loks bannað í Bandaríkjunum og á svipuðum tíma í öðrum löndum.

Enski leikarinn Roddy McDowall fór með hlutverk hins skynsama apa Corneliusar í hinni klassísku bíómynd Apaplánetunni frá 1968.

Cornelius var fornleifafræðingurinn sem, ásamt kærustu sinni Ziru, aðstoðaði mennska geimfarann Taylor, sem Charlton Heston lék, og hlífði honum fyrir hinum grimma og íhaldssama yfirapa þeirra, Dr. Zaius.

Roddy McDowall tók upp skemmtilegt myndefni á tökustað Apaplánetunnar sem sýnir leikarana breytast úr mönnum í apa í hjólhýsum.

Við sjáum McDowall hitta hina leikarana, Kim Hunter, Maurice Evans og Charlton Heston á ströndinni í Malibu, þar sem hinn frægi endir Apaplánetunnar var kvikmyndaður.

Leikararnir þurftu að sitja tímunum saman í stóli förðunarmeistarans og liðu svo miklar kvalir í löngum tökum myndarinnar því þeim var afar heitt undir apagervinu.

Roddy McDowall lét það þó ekki aftra sér frá því að leika í þremur framhaldsmyndum og sjónvarpsþáttaröð um Apaplánetuna.

Þann 28. október eru sveitastjórnarkosningar í Finnlandi. Á blogginu Per-Looks hefur einhver safnað saman myndum af hluta af frambjóðendahópi hægriflokksins Sannra Finna. http://per-looks.tumblr.com/

Fyrstu ár kvikmyndasögunnar var nær eingöngu notast við víðar tökur. Kannski hafa kvikmyndagerðarmennirnir haldið að minni fjarlægð við viðfangsefni myndavélarinnar myndi rugla áhorfandann í rýminu – enda flestir vanir leikhúsinu þar sem maður situr ákveðna fjarlægð frá sviðinu og kemst hvorki nær né fjær. Eða þeim kom einfaldlega ekki til hugar að færa myndavélina nær.

Loks tók Bretinn George Albert Smith (1864–1959) af skarið. Árið 1903 gerði hann kvikmyndina The Sick Kitten (Veiki kettlingurinn). Myndin er 35 sekúndna löng og í henni eru tvö börn í gervi fullorðna stumrandi yfir veikum kettlingi. Sjónsviðið er vítt fyrst um sinn en svo, eftir 15 sekúndur, er klippt yfir í nærmynd af öðru barninu gefa kettlingnum meðal með skeið. Kettlingurinn lepur meðalið með áfergju og 15 sekúndum síðar er klippt aftur í víðara skot af börnunum.

Í umsögn Bresku kvikmyndastofnunarinnar um myndina segir: „Milliatriðið kann að vera fyrsta skipti sem nærmynd var notuð einfaldlega til þess að beina athyglinni að atburðarás, í stað þess að líkja eftir sýn í gegnum stækkunargler eða smásjá.“

Nærmyndir skipa nú mikilvægan sess í flestum kvikmyndum og eigum við það George Albert Smith og veika kettlingnum að þakka.

„Kínverski apinn, Simia sinica“. Þessi býr á Sri Lanka og er í dag þekktur undir latneska heitinu macaca sinica.

Teikning úr furðulegri bók, General and Particular Descriptions of the Vertebrated Animals, Arranged Conformably to the Modern Discoveries and Improvements in Zoology. Order Quadrumana, sem kom út í London árið 1821. Bókina setti saman breski lög– og náttúrufræðingurinn Edward Griffith (1790–1858). Fleiri myndir hér.

Lemúrinn var stofnaður 8. október í fyrra og er því eins árs í dag! Ritstjórn þakkar lesendum sínum innilega fyrir frábærar móttökur. Hér er yfirlit yfir vinsælustu greinar ársins og aðrar eftirminnilegar færslur.

Silungapollur, 1934.

Hollenski meistarinn Willem van de Poll ljósmyndaði Ísland í bak og fyrir sumarið 1934.

#iceland

Hér heyrum við annað hvort í Gísla Ólafssyni að herma eftir Oddi sterka af Skaganum eða þetta er Oddur sjálfur.

Til er ljósmynd frá 1934 eftir hollenska meistarann Willem van de Poll sem sýnir Jón Leifs hljóðrita raddir kvæðamanna og Odds sterka af Skaganum, sem var kynlegur kvistur í íslensku samfélagi á fyrri hluta tuttugustu aldar.

Margar slíkar upptökur Jóns Leifs hafa varðveist. Hins vegar er til annað vaxhólkasafn sem Jón Pálsson tók upp 1903-1912 og þar er skráð upptaka þar sem sagt er að verið sé að herma eftir Oddi. Uppi er tilgátur um að söfn Jónanna tveggja hafi ruglast saman þegar þau voru send til afritunar til Bretlands á sjöunda áratugnum. Því er þetta hugsanlega upptaka af Oddi sjálfum.

Oddur sterki er á tveimur myndum í hollenska safninu sem Lemúrinn birti í vikunni.

En hér önnur stórglæsileg ljósmynd af þessum kynlega kvisti.

Sænski fræðimaðurinn Berit Wallenberg var á Íslandi árið 1930 og tók nokkrar frábærar ljósmyndir.

Þeir skipta hundruðum, leikararnir sem hafa farið í búning Jósefs Stalín í gegnum tíðina.

Og á listanum leynast ýmsir furðufuglar. Á meðan Stalín var á lífi gat leikari sem lék hann „illa“ verið sendur í gúlagið, en aðrir mökuðu krókinn á að leika ekkert nema Stalín aftur og aftur. Þá hafa vestrænir stórleikarar eins og Robert Duvall og Michael Caine tekið að sér þetta vandasama hlutverk með misjöfnum árangri.

#stalin

Mellekaleah examibirien rounyet?

Einu sinni fyrir langa löngu, og löngu á undan Stellan Skarsgård, Noomi Rapace og Alexander Skarsgård starfaði sænskur leikari í Hollywood sem hét því fagra nafni Tor Johnson. Hann talaði Swenglish og keppti í fjölbragðaglímu undir viðurnefninu The Super Swedish Angel.

Hollenski meistarinn Willem van de Poll ljósmyndaði Ísland í bak og fyrir sumarið 1934.

Van de Poll þessi var í raun einn víðförlasti og merkasti blaðaljósmyndari Hollendinga — nokkuð sem sést glöggt á myndum hans frá Íslandi.

Lesendur eru eindregið hvattir til að aðstoða Lemúrinn við að merkja myndirnar. Þekkið þið fólk og staði á þessum mögnuðu myndum?

Trending Blogs

Recently Viewed Blogs

Lemúrinn