Lihim Liham Tinta

Mga tula at kwentong walang pagsasabihan

[lihimlihamtinta]

Hindi kahibangan ang kakayahan mong magmahal ng lubos sa isang taong gusto lang manatili ngunit hindi ka pinili

.

Walang mali sa pag ibig na kaya mong ibigay ng lubos habang ang sukling natatamo ay tipak ng panloloko

.

Dahil kailan man ay hindi magiging sapat ang iyong sobra sa taong ang naghahanap ng ibang ligaya

[lihimlihamtinta]

Ikaw ay sapat para sa taong matapang na harapin ang bawat bukas kasama ka

Ikaw ay sapat para samahang lumakad ng mabagal sa tuwing ang paghinga ay mahirap

Hindi para magtiis sa pagpipigil ng iyong hikbi habang sya ay mahimbing sa iyong tabi

Hindi para pumikit sa tuwing ang panlilinlang ay sumasapaw sa panginginig ng iyong mga daliri

[lihimlihamtinta]

Ang pagkawala nya ay hindi trahedya

Ito ang iyong bagong simula

Malalanghap mo rin ang sariwang kapayapaan

Baon mo ang lakas na dinulot ng nakaraan

[lihimlihamtinta]

At kahit alam kong ang lakarin ay akin lang

Hindi ko maiwasang maghanap ng aagapay

Dahil kahit yakapin kong pilit ang lahat ng sakit

Tila ang nais ng puso ay mayakap ng mahigpit

[lihimlihamtinta]

At kung sakaling maramdaman muli ang lungkot

Hindi ang pagbalik sakanya ang solusyon

Hindi ang sumaksak ang gagamot

Hindi patalim ang bubuo

[lihimlihamtinta]

Ang pangarap natin ngayon ay ang umusad

Kasama ang ating sarili na dala ang natutunan

Lilingon upang magpasalamat

Hindi para manatili sa pighati at dusa

[lihimlihamtinta]

Malalim ang sugat

ngunit 'di imposible ang paghilom

[lihimlihamtinta]

Masyado na atang malalim ang tubig

Hindi na ata ako kaya sagipin ng langit

Wala na akong makitang pag asa sa sinapit

Hanggang dito nalang ata ang lakbayin

[lihimlihamtinta]

Pahiran ang luha pagkat ang lahat ay tapos na

Hindi ito ang pag ibig na iyong pinangarap

Hayaan mong lumigaya ang mga taong masama

Damhin nilang pilit ang kanilang kahalayan

[lihimlihamtinta]

Hindi patalim ang maghihilom ng iyong sugat

At hindi rin imposible ang iyong paglaya

Marahan mong lapatan ang iyong nakaraan

Kalagan ang sarili sa gapos ng kasinungalingan

[lihimlihamtinta]

Oras na para isara ang iyong paboritong pahina

Hindi luha ang tintang gagamitin sa iyong aklat

Masyadong maganda ang bukas para mamatay

Hayaan mong lumisan ang minsan mong buhay

[lihimlihamtinta]

Masyadong malawak ang kaya mong ibigay

Para ipasalo sa isang lagayang butas

Huwag mo piliting makitang ang iyong halaga

Ng mga matang bulag at sa iba nakatanaw

[lihimlihamtinta]

Ikaw ay nasa kumunoy ng lumang pahina

Matamis man ang simula ay hindi ito sapat

Para manatili sa mga letra ng kasinungalingan

Masdan mo ang dulo dahil hindi ito ang wakas

.

Oras na para itigil ang iyong pagbuklat

Sa mga sandaling ikaw lang ang nagmahal

Hindi sa panlilinlang matatapos ang aklat

Malayo pa ang tuldok na Kanyang akda

.

Kaya halina't lisanin ang maruming pahina

Tanggapin mo ang lunas na dala ng bukas

Hindi ka uusad kung tititig ka lang

Sa masamang panaginip na sila ang nagsimula

.

Langhapin mo ang amoy na bagong simula

Kung saan ang pag ibig ay hindi huwad

Hindi man tanaw ang mga susunod na kabanata

Aahon ka sa kumunoy na hindi sila ang kasama

[lihimlihamtinta]

Hindi ito ang pangarap mong pag ibig

Masyado ka nang madaming nilisan

Naibuhos mo na ang lahat ng iyong pagsinta

Hindi ka para manatili sa huwad na pag ibig

[lihimlihamtinta]

Patuloy na nilakaran ang mga bubog ng kahapon

Malalim na bumabaon ang bawat dulo

Ngunit di mapigil ang magpatuloy

Hinihintay ka sa bawat hakbang kahit malumpo

[lihimlihamtinta]

Yakapin mong mabuti ang iyong sarili

Paniwalin ang langit na walang ginawang mali

Taasan mo pa ang lipad ng iyong ganda

Ipatikim sakanya ang iyong lasa

[lihimlihamtinta]