MIR

[ghoulnextdoor]

にしざかひろみ ホームページ／ KODAMA- 4 HIROMI NISHIZAKA

[mirjam1972]

13 oktober 1790, de begraffenis fan foarâlder Lourens Ritskes

Lourens Ritskes (9 generaasjes) is in foarâlder fan memmeskant fia Geertje Minks Sijtsema, dy't yn myn foarige bloch foarkomt.

Lourens is de soan fan arbeider Ritske Gerrits en Aeltje Martens en hy is berne yn Beetstersweach. Hy waard op 26 novimber 1718 doopt yn de Herfoarme Tsjerke dêr. Dy tsjerke stiet der net mear. Op dat plak stiet no in oare tsjerke dy't yn 1804 boud is.

Tekening fan J. Stellingwerf fan de âlde tsjerke.

Foar safier't ik neigean kin wie Lourens it jongste bern en hie er  4 broers en susters: Wijts, Gerrit, (Albertie), Marten, en Albertien (it oare earder berne suske mei deselde namme, sil nei alle gedachten ferstoarn wêze).

Lourens trout mei Janke Douwes, wannear is net krekt bekend. Mei it each op de berte fan de bern sil dat earne yn 1739 west hawwe.

Lourens en Janke krije 9 bern tusken 1740 en 1759, 5 jonges en 4 famkes. Dochter Aaltje doopt op 26 aug 1742 is ús direkte foarâlder. Sy wie it 2e bern.

Lourens is arbeider en timmerman en is neffens de folkstelling fan 1744 'insolvent', ûnfermogend.

Folkstelling 1744, Lourens stiet rjochts 2e fan ûnderen.

Beetstersweach stiet bekend as in ryk doarp mei in soad aadlike famyljehuzen,: ‘Beetsterzwaag, een aangenaam en vermaaklyk Dorp, is van rondom met allerlei geboomte beplant, en heeft een zeer schoone en bestraate buurt, waar in verscheiden treflyke huizen gevonden worden.

Men heeft hier omstreeks zeer vermaaklyke wandelwegen, onder den lommer van ’t bladryk geboomte, alwaar men, op zynen tyd, door ’t aangenaam geluid van allerlei gevogelte, en vooral door den helklinkenden Nachtegaal vervrolykt wordt.’

Der  wennen lykwols ek in soad arbeiders en der wie yn dy streken ek in soad earmoede. Lourens en Janke sille net in maklik libben hân hawwe. Sy sille grif yn in lyts húske wenne hawwe en Lourens sil al it wurk oannommen ha, dat er krije koe. Syn âldste broer Gerrit stuts oars yninoar (al soe dat mei Lourens fansels ek it gefal west hawwe kinne).

Yn it diakonyboek wurdt Gerrit beskuldige fan 'luiheid, lediggang, verzuim van godsdienstbeoefening, boosaardige bejegening van vrouw en kinderen.'Dat soks optekene is hâldt nei alle gedachten yn dat Gerrit ôfhinklik wie fan de diakony en de earmesoarch. Fan Lourens ha ik gelokkich sokke karakter-oantekens net fûn.

Op 13 oktober 1790 wurdt Lourens begroeven yn Beetstersweach. Hy is ca. 70 jier wurden. Yn it rekkenboek fan de Diakony komme in tal saken oer syn begraffenis tsjin. By it begraven is  £1:6:,- ophelle tidens de kollekte. "Op de Swaag bij het bekken ontvangen bij het begraven van Louwerens Ritsches."

De diakony wie bot ôfhinklik fan frijwillige jeften en dêrom besocht de diakony by alle mooglike gelegenheden jild yn te sammeljen. Kollektes yn 'e gewoane tsjinsten, mar ek by dopen, trouwen en begraffenissen. Soms waard ynstee fan in kollekte in skaal, it bekken, pleatst om jild te stoarten. Yn in soad plakken waard by de begraffenis ek in bekken op it tsjerkhôf pleatst. Faak is de registraasje fan de kollektes algemien, mar yn in tal gemeenten de ferstoarne neamd, lykas by Lourens Ritskes.

Oan begraffeniskosten is £ 8:- betelle foar in 'deadsfet' oan Anne Hedmans en £ 1:15 foar in 'fandel' bier oan Hans Markes, brouwer yn Drachten, 'gebruikt op de leed van Louwerens Ritsches'. Dat bier waard ek wol leedbier neamd. In begraffenis sûnder bier of drank en iten wie yn dy tiid ûntinkber, dat sels by de begraffenis fan de earmsten earde dat oanwêzich te wêzen. Sjoch hjir foar wat mear ynfo. 

Dat de diakony betelle foar de begraffenis jout ek oan dat Lourens earm wie. It wie in ûnderdiel fan de earmesoarch dy't troch de diakony útfierd waard.

Hjir in ôfbylding fan lettere tiid fan in earmebegraffenis (út de Camera Obscura fan Nicolaas Beets):

Sjoch foar mear ynfo oer de funksje fan de diakony dit artikel oer de diakony fan Bûtenpost yn de 18e ieu. 

Boarnen: 

- AlleFriezen.nl - FrieslandWonderland.nl (Beetsterzwaag, Tegenwoordige Staat van Friesland)

[mirjam1972]

4 oktober 1869 , de stjerdei fan Mink Lucas Sytsma

Mink Lucas Sytsma is de oerpake fan myn pake Atte, fan memmeskant. Hy is de jongste soan fan Lukas Klazes Sytsma en Sijke Simons Terpstra en waard berne op 30 septimber 1828 yn Lytsewierrum, al stiet der op de befolkingsregisterkaarten ek gauris Rien as berteplak. Yn de oanjefte fan syn broers en susters stiet ek gauris 'wonende in Rien onder Lutkewierum'. Dat ik tink dat se yn Rien wennen.  

Syn heit wie, lykas syn pake, slachter. Earst yn Boazum, letter yn Lytsewierrum/Rien.  

It plak fan de slachterij fan heit Lukas yn Rien.

De mem fan Mink kaam te ferstjerren doe't er 16 wie.

Mink is net slachter wurden, lykas syn broers Sijmon en Sietse, mar hat altyd by de boer wurke en gie fan kontrakt nei kontrakt like it. Hy hat û.o. yn Lytsewierrum, Wommels, Britswert, Easterlittens, Easterein en Goaiïengea wurke. Hy wie Ned. Herv.

De Herfoarme Tsjerke fan Lytsewierrum.

Fan 1852-1853 wie er yn tsjinst by boer Douwe Sytse Rienstra yn Lytsewierrum

Op 6 febrewaris 1856 trout er mei Pietje Jans Vermaning yn Wommels. Sy is de dochter fan Jan Louwes Vermaning en Geertje Wolters Jetten en is berne yn St. Jansgea.. Pietje wie al 7 moanne swanger doe't se troude mei Mink. Mink en Pietje ûndertekenje de trou-akte beide, dat se koene (in bytsje) skriuwe. Se hawwe ek beide in sertifikaat fan ûnfermogen. Dat hâldt yn dat se net genôch jild hawwe om foar de akten te beteljen dy't nedich binne foar harren houlik.

Pietje is tsjinstfaam en hat tusken 1850 en 1853 yn Lytsewierrum wenne en wurke. Soene se inoar dêrfan kenne? Mink en Pietje krije twa famkes: op 1 april 1856 Sijke en op 9 novimber 1857 Geertje. Geertje is de beppe fan myn pake Atte.

In pear moanne nei de berte fan Geertje komt Pietje te ferstjerren op 2 febrewaris 1858 yn Wommels yn it hûs nr. 26. Se is noch mar 27 jier. Mink jout har dea oan en ûndertekenet de akte.

Hantekening Mink Lucas Sijtsma

Mink bliuwt dus allinnich achter mei twa lytse bern. De famkes wurde ûnderbrocht by omke Symon en muoike Jetske yn Rien. Symon is in âldere broer fan Mink.

Mink is fan 12 maaie oant 1858 oant 12 maaie 1859 arbeider yn Easterein, nr 69 by boer Ymte Heeg. Hy giet dêrnei wer nei Wommels.

Op 16 maaie 1860 trout Mink mei Fokje Klazes Pasma.  Sy is de dochter fan Klaas Pieters Palsma en Aaltje Jorrits Hiemstra. Se is lykas Mink berne yn Lytsewierrum en se is tsjinstfaam. Mink en Fokje wurken fanôf 12 maaie 1859 by deselde boer; Dirk Tides Bylsma yn Wommels. Foarsafier't se inoar noch net kenden, sille se dêr better mei-inoar yn 'e kunde kaam wêze. Mink en Fokje wenje nei harren houlik mei de beide famkes fan Mink yn Wommels. Al gau slacht it needlot wer ta. Fokje komt in lyts jier nei har houlik te ferstjerren op 7 april 1861. Mink jout har dea ek wer sels oan en wer bliuwt Mink achter mei de twa lytse famkes.

Op 22 septimber 1862 is Mink ynskreaun yn Hennaard, nr 19. Hy is yn tsjinst as boerefeint by boer Klaas Jans Wiersma, en hy kaam fan Goënga. Fan 12 maaie 1863 oant 12 maaie 1864 wie er  by boer Louw Hendriks Palsma nr. 11 yn Easterlittens.

It plak dêr’t foarhinne de pleats fan Louw Hendriks Palsma stie.

De famkes steane net op deselde befolkingskaart as Mink, sy wenje wer by harren omke Symon en muoike Jetske yn Rien.

Fan Easterlittens giet Mink nei Britswert. Dêr trout er op 18 maaie 1865 mei Grietje Rauwerda/Jellema. Grietje is de dochter fan Hinke Wybes Jellema en Sytse Rauwerda. Doe't se berne waard wiene har âlders noch net troud. Se hat earst de achternamme Jellema hân en letter brûkte se dy fan har heit. Grietje is tsjinstfaam en wennet yn Boazum. Grietje en Mink hawwe beide in sertifikaat fan ûnfermogen. 

Nei harren houlik wenje se noch in skoftke yn Britswert. Dêr wurdt dochter Hinke berne op 18 sept. 1866. Dêrnei ferhúzje se nei Rien, nr. 102 nk.  

Soan Lucas wurdt dêr op 30 novimber 1868 berne. De beide âldere famkes Sijke en Geertje wenje dan ek by heit. In lyts jier nei de berte fan Lucas, op 4 okt 1869, komt Mink te ferstjerren. Hy wurdt mar 41 jier.

Nei de dea fan harren heit Mink giet dochter Sijke nei Zijpe, sy sil dêr ek trouwe en Geertje wurdt tsjinstfaam by Minne Sjoerds Feitsma, kastelein yn Rien. Sy trout letter mei Botte van der Weg, myn betoerpake.

Boarnen:

www.allefriezen.nl https://archisarchief.cultureelerfgoed.nl/Beschermde_Gezichten/BG1340/TOELICHTING_aanwijzing_1340.pdf

[mirjam1972]

27 septimber 1640, bertedei fan Michael van Doem

Michael is ien fan myn foarâlders (10) fan memmekant. Hy is de soan fan Jan Hendrix en Sibbeltje Michielsdochter en wurdt berne yn Ljouwert.

Fan 1659 oant 1664 studearret er teology oan de Universiteit fan Frjentsjer. Hy trout op 23 maart 1664 mei Baetie Wopkes Tallum/Talma. Se wenje dan  oan de Hoogstraat yn Frjentsjer en Michael is 'candidaat theologie'.

Universiteit fan Frjentsjer, mear ynfo hjir.

Tusken 1667 en 1678 is er predikant yn Augsbuert-Kollumersweach. Tusken 1676 en 1678 komme der klachten oer him binnen by de classis fan Dokkum fanwege dronkenskip. Hy skynt sels syn frou slein te hawwen. Hy wurdt yn 1678 ôfset en komt yn earmoedige omstannichheden terjochte. Hy wurdt skoalmaster yn Dantumawâld.

Sulveren beker mei in ôfbylding fan de tsjerke út deselde tiid dat Michael dêr predikant wie.

Hy krijt yn dy tiid fjouwer bern: Andreas, Johannes, Lysbet en Bati. By de berte fan Bati komt syn frou Baetie te ferstjerren. Dat is nei 1678.  

Nei in skoftke kriget er wer goede tsjûgeskriften en hy wurdt yn 1682 oansteld as predikant yn Terkaple-Eagmaryp.

List fan Predikanten Sevenwouden op het Heeren-Veen.

Hy trout of is dan troud mei Jelske Pieters.

Mei Jelske kriget er tusken 1684-1693 yn alle gefallen noch 5 bern: Sibbeltje, Pieter, Saco, Mayke en Cornelis. Fia Mayke giet ús famyljeline wer fierder.

Yn 1718 giet Michael mei emeritaat en koart dêrnei komt er te ferstjerren. Op 26 jannewaris stiet der yn 'e tsjerkeboeken by Jelske Pieters dat se nei de Jouwer ferhuze is en widdofrou is fan ds. M. van Doem.

Boarnen:

www.allefriezen.nl Ruurd Koopmans , "De macht van twee" Het voorgeslacht van de kinderen van Hendirk Koopmans en Minke Jager., GoogleBooks.

[mirjam1972]

19 septimber 1758, bertedei fan Antje Robijns, Harns.

Antje Robijns is ien fan myn foarâlders fan myn heites kant. Se is de dochter fan Robijn Harmens en Grietje Taekes út Harns. Se is doopt op 19 septimber 1758 yn de Grutte Tsjerke yn Harns. Se wennen oan de Rozegracht.

Foarsafier’t ik neigean kin, is Antje it iennichst bern fan Robijn en Grietje.

At se 25 jier is (11 april 1784) trout se mei Rinnert Johannes Zijlstra út Warkum (wennet yn Harns). Hy is mr. blokmakker.

Hy koe dêrmei goed brea fertsjinje yn Harns. Se hiene in tal huzen oan de Zuiderhaven/Vijverstraat/Ossenmarkt yn harren besit.

Zuiderhaven

Se krije 5 bern. It earste jonkje stjert jong, mar alle oare bern helje de folwoeksen leeftiid, trouwe en krije bern, al wurde se allegear net sa âld as harren âlders. De âldste soan, Robijn, wurdt ek blokmakker. Robijn is de folgjende yn myn line fan direkte foarâlders.

By de taheakken fan de trou-akte fan Robijn fyn ik de hantekening fan Antje Robijn.

Antje fertsjert op 67 jierrige leeftiid op 9 jannewaris 1828 yn Harns. It adres is Wijk F nr. 105. = Vijverstraat/Ossenmarkt (Zuiderhaven 27). Har man Rinnert ferstjert op 3 maaie 1834. Hy wurdt 73.

Boarnen:

www.allefriezen.nl www.kleinekerkstraat.nl

[mirjam1972]

Freed 13 septimber 1946. Troudei pake en beppe Van der Weg

It is hjoed de troudei fan myn pake en beppe. Se trouden op freed 13 septimber 1946. Op harren troudei gie it net allegear sa’t it gean moast. Yn Snits hiene pake en beppe in breidsboeket besteld, dat -sa wie mei de blommist ôfpraat - mei de reguliere autobustsjinst fan de Z.W.H. (autobedriuw de Zuidwesthoek) yn Tsjerkgaast ôflevere wurde soe. Mar alles wat der dy dei ek kaam, gjin breidsboeket. Dat wie tsjinfaller nûmer ien.

Op de foto ien fan de bussen fan de ZWH.

Ek it bestelde autobuske, dat pake en beppe en oare famyljeleden - oerbeppe Hieke, âldomke Sjoerd, âldmuoike Piertje en âldomke Siebe - fan Tsjerkgaast nei it gemeentehûs yn Langwar ferfiere soe, kaam net opdaagjen. Dat wie tsjinfaller nûmer twa. Yn sân hasten waard in buske regele dat op Spannenburg stie te wachtsjen en dat normaalwei ried tusken Spannenburch en St. Nyk. Pake en beppe kamen noch krekt op ‘e tiid oan op it gemeentehûs yn Langwar. De amtners hiene har al ôffrege wêr’t it breidspear bleau.

Gemeentehûs Langwar, 1948 (Fries Fotoarchief)

It sluten fan it houlik ferrûn fierder gelokkich sûnder problemen.

Trouboekje pake en beppe.

Om’t beppe yn ferwachting wie, mochten se net foar de tsjerke trouwe. In resepsje of soks hawwe se ek net hân. Se wennen nei de trouwerij yn by oerbeppe Hieke. Pake en beppe hawwe 46 jier troud west, oant beppe ferstoar yn 1992. Pake is yn 2006 ferstoarn.

Troufoto pake en beppe

[mirjam1972]

Om’t it hjoed wer freed 13 septimber is, diel ik dit blochje nochris.

[mirjam1972]

6 septimber 1614

6 septimber 1614 is de troudei fan myn direkte foarâlders fan heiteskant Hidde Sjoerds en Swob Jacobs.

Hidde en Swob sille letter in jonkje krije dat de namme Tjerk krijt. En Tjerk wurdt letter bekend as Tjerk Hiddes de Vries. Tjerk Hiddes is net in direkte foarâlder fan my, mar syn âldere sus Trijntje (it 1e bern fan Hidde en Swob) wol.

Neist Trijntje (1615) en Tjerk (1622) hawwe Hidde en Swob noch 10 bern krigen. It lêste bern, Antje, wurdt berne yn 1643. Swob hat dus sawat 30 jier 'swanger west'.

Hidde en Swob wennen yn Seisbierrum dêr't se fanôf 1624 nôtmûnders wiene. Hidde wie dêrfoar nei alle gedachten skipper. Se hierden de mûne fan Jarig van Liauckema fanôf 19-7-1624 foar 92 Karolusgûnen it jier.

Jarich van Liauckema (1558-1642)

It plak fan de mûne (de mûne stiet der no net mear).

Nei de dea fan Hidde yn 1645 sil Swob fierder gien wêze as mûnder mei harren soan Sjoerd, it 2e bern fan Hidde en Swob.

Soan Tjerk giet op syn 12e nei see en groeit út ta de ferneamde seeheld Tjerk Hiddes de Vries.

Swob krijt nei it ferstjerren fan soan Tjerk en syn frou Nanneke  yn 1666 mei-fâdij oer de 3 lytse bern fan Tjerk Hiddes. Swob ferstjert yn 1667, se is dan ca. 70 jier.

Boarnen:

www.allefriezen.nl www.simonwierstra.nl/VRIES.htm https://oudbarradeel.nl/?p=763 http://molenaarworden.nl/wp-content/uploads/De-Utskoat-134-juni-2009.pdf wikipedia

[mirjam1972]

Stjerdei oerbeppe Anetta Mathilda Petronella Roest

It is hjoed 46 jier lyn dat myn oerbeppe Anetta Roest ferstoarn is (Kralingen, 14 oktober 1893 - Rotterdam, 18 jannewaris 1970). Se wie de dochter fan Arie Roest en Annigje de Jager. Op 8 maaie 1918 troude se mei Heinrich Franz Wilhelm van Stokkem. Hy wurke by de Holland Amerika Lijn en wie in soad fuort. Se krigen 4 bern: twa famkes (werûnder myn oma) en twa jonges.

Oerbeppe Anetta Mathilda Petronella Roest en oerpake Heinrich Franz Wilhelm van Stokkem.

Roubrief

[mirjam1972]

Betoerbeppe Annigje de Jager

It wie juster de bertedei fan myn betoerbeppe Annigje de Jager (8 jan 1859 - 9 juny 1941). Se is de beppe fan myn 'oma' fan heiteskant. Fannewike fûn ik op ien fan myn digitale syktochten in fotootsje fan har fia in digitale stambeam fan fiere famylje yn Amearika. It is net dúdlik en ek net hiel flatteus, mar it is yn alle gefallen wat.

Annigje de Jager

Annigje is berne yn Lekkerkerk en hie in twalingsus Cornelia. Har heit wie boer. Foar har wurde noch fiif bern berne:

Cornelis 31/7/1849

Jan Adrianus 21/11/1850. Jan Adrianus komt twa moanne letter te ferstjerren.

Jan Adrianus 9/1/1852

Neeltje Maria 3/9/1854

Anthonij 5/12/1856

en nei har komme noch in pear bern, de twaling:

Arie, 22/5/1861 en Marinus 22/5/1861 - 10/6/1861 (sawat 3 wike)

suske Pietertje 19/7/1863

broerke Marinus 26/6/1865 - 10/3/1866 (9 moanne)

broerke Marinus 26/4/1867 - 23 /8/1867 (4 moanne)

suske Maria Paulina 15/11/1868

Annigje trout op 12 jannewaris 1882 yn Lekkerkerk mei keapman Arie Roest. Ek har twalingsuske trout yn Lekkerkerk op dy datum en wol mei Eliza Horsman. Se binne wat dat oanbelanget dus in echte twaling!

Annigje en Arie krije 10 bern, 5 yn Lekkerkerk:

Johanna, 10/5/1882 (Lekkerkerk) - 21/2/1947

Cornelia, 7/6/1883 (Lekkerkerk)

Hendrika, 2/5/1885 (Lekkerkerk)

Arina, 10/12/1886 (Lekkerkerk)

Arie, 10/1/1889 (Lekkerkerk)

As ik it goed begrepen ha, hiene Annigje en Arie in winkel yn Lekkerkerk. Op de foto de winkel dêr't it nei alle gedachten om giet.

De winkel fan Arie Roest en Annigje Jager yn Lekkerkerk. 

Dêrnei ferhuzet it gesin nei Kralingen. Arie is dêr foarman. Se krije dêr:

Hendrik, 16/7/1891 en myn oerbeppe Anetta Mathilda Petronella op 14/10/1893.

Yn 1895 wenje se yn Rotterdam. Dêr ferstjert spitigernôch lytse Arie op 1 jan 1895. Yn Rotterdam hawwe Annigje en Arie in winkel oan de Steven Hoogendijkstraat 55 yn benammen suvel: tsiis en bûter.

Se krije dêr noch trije bern:

Annigje 27/8/1895

Adriana Johanna 17/11/1897

Arie 23/3/1900

Heit Arie ferstjert al yn 1901 op 41-jierrige leeftiid en Annigje nimt de saak oer.

Yn 1905 trout se mei Marinus Kasseband. Se wenje dan ek noch oan de Steven Hoogendijkstraat allinnich dan op nr. 42 en 23a. Hy is masinist en se hawwe ek noch hieltyd in winkel.

Yn 1921 ferstjert Marinus. Dêrnei kin ik har spoar efkes net mear folgje. Op 9 juny1941 ferstjert Annigje, 82 jier, yn Rotterdam.

[mirjam1972]

Us heit wûn yn 1960 it Leanekeatsen yn Harns

Tusken it guod fan ús heit fûn ik in âlde foto en in bekerke. Op de beker stiet: 1e plaats lanenkaatsen 1960. A.G.B.D F. de Jager.  Op de foto steane trije jonges mei krânsen om en prizen yn de hannen. It grutske jonkje rjochts is ús heit: Franz Vellinga. Hy wie doe 13 jier. Hy hat ea wolris ferteld dat er de 1e priis wûn hie mei it leanekeatsen, mar it wol my net heuge dat ik dy foto ea sjoen ha. Hy hat de priis wûn yn groep 1 (leeftiid 11-17 jier). Yn it partoer sieten fierder M. Huizinga en Siepie Spoelstra. Siepie wie de Kening.

Heit is ek werom te finen op de website fan it Leanekeatsen. Hy hie nûmer K30173.

Fan links nei rjochts: M. Huizinga, Siepie Spoelstra en ús heit Franz Vellinga.

It bekerke fan ús heit. It knopke is spitigernôch weirekke.

Yn de Leeuwarder Courant fan 18 juny 1960 stie ek in koart stikje oer it Leanekeatsen mei in foto. Der wurde fierder gjin útslaggen neamd, mar út it stikje wurdt wol dúdlik dat it Leanekeatsen altyd in hiele ‘happening’ is. It sil grif in hiele grutte yndruk op ús heit makke hawwe. It artikeltsje is fia dizze link te lêzen.

Dit jier wurdt der fansels ek wer leanekeatst, fan 15 juny o/m 19 juny op de Lanen yn Harns.

De Lanen yn earder tiden.

[mirjam1972]

Myn betoerpake Heinrich Franz Wilhelm van Stokkem (Rotterdam, 14 maart 1865 - Rotterdam 22 novimber 1921), diel 2

Sjoch hjir foar diel 1

Heinrich trout op 30 desimber 1885 mei Catharina Johanna Jansen. Hy is dan 20 jier en Catharina is 21 jier. Sy komt ek út Rotterdam.  Se is de dochter fan Leendert Jansen en Catharina Johanna Gal. In katolike húshâlding (Heinrich is NH). Har âlders hawwe 13 bern krigen dêr't úteinlik mar 5 de folwoeksen leeftiid helle hawwe.

Catharina Johanna Janssen

Heinrich is pakhûsfeint en merkfeint.  Se wenje op ferskillende adressen yn Rotterdam, û.o. oan de Verlaatstraat en de Gaffelstraat. It langste wenje se oan de Lijnbaanstraat 24a.  

Se krije 9 bern. Neist de bern wenje ek (tydlik)  in broer fan Catharina: Leendert dy't biezemmakker is, en de earder neamde broer fan Heinrich: Matthijs yn by de húshâlding.  In drokke boel dus en in fetpot sil it grif net west hawwe.

Trije moanne nei it houlik fan Heinrich en Catharina wurdt de earste soan berne:

1. Jacobus Wilhelmus op 22 desimber 1885. Jacobus wurdt havenarbeider en trout mei Ida Hoesman op 8 juli 1914. Hy skiedt fan har yn 1921 en trout yn 1922 mei Catharina van Loenen. Catharina is widdofrou en hat by har foarige man 7 bern krigen. Fiif dêrfan ferstjerre al op jonge leeftiid, de twa oare bern, Aartje fan 15 en Reinirus fan 12 komme nei har houlik mei Jacobus mei har mei. Fiif jier letter komt der noch in bernsbern bij, Pieter Hermanus, nei alle gedachten in soan fan Aartje. Jacobus hat sels gjin bern krigen.

Jacobus wurdt 65 jier en ferstjert op 3 april 1951 yn Rotterdam.

In dik jier letter komt soan nr. twa:

2. Leendert, 2 febrewaris 1887. Leendert trout op 28 april 1915 mei  Adriana Adolphina Dorothea Groeneveld. Leendert is beursfeint en se krije 3 bern: Heinrich Franz Wilhelm, Antoon Johannes en Adolphina Catharina. Se hawwe yn 25 jier tiid op 11 ferskillende adressen wenne. Leendert komt al jong te ferstjerren op 13 jannewaris 1931, 43 jier. De bern binne dan 11, 7 en 5 jier. Aldolphina ferstjert yn 1966 yn Amersfoort, se is dan 83 jier.

Oardel jier letter komt it earste famke:

3. Catharina Johanna, 8 augustus 1889. Catharina trout op 21 maaie 1919 mei Frederikus Cleveringa.  Se binne beide 29 jier. Frederikus is vischopdrager by de gemeentlike fiskôfslach yn Rotterdam. Se krije 4 dochters: Johanna Carolina (1919), Hendrika Catharina (1922), Catharina Johanna (1928) en Adolphina (1930). Catharina ferstjert op 4 juni 1968, 78 jier oan de Spangesekade 15a. Dêr wenne de famylje fanôf 1930.

 De fiskôfslach, ynterieur, 1933.

Trije jier letter komt der wer in famke:

4. Wilhelmina Elizabeth, 26 septimber 1892. Se trout op 6 juni 1917 mei Izaak de Bruin. Izaak is 37 en Wilhelmina 24 jier. Izaak is molkebesoarger.  Izaak en Wilhelmina krije  4 bern. Trije famkes en ien jonkje. It earste famke dat trije moanne nei harren houlik op de wrâld komt, Cornelia Wilhemina, wurdt mar trije jier (1917-1921). Izaak wie yn 1914 'varensgezel' en hat doe 2 jier ûnderweis west, û.o. nei New York. Wilhelmina ferstjert op  28 jannewaris 1941, 48 jier âld.

Dan wurdt myn oerpake berne:

5. Heinrich Franz Wilhelm, 17 maart 1895

Myn oerpake.

Dik twa jier letter komt der wer in jonkje:

6. Antoon, 18 juli 1897, trout mei Cornelia Charlotte Hageman (modiste) op 17 novimber 1937. Antoon is merkfeint yn tsjinst fan de gemeente. Se krije in soan: Theodorus Hendrik op 19 novimber 1938. Se hawwe oan de Spangeschekade wenne en binne yn 1939 ferhuze nei Hilligersberg. 

Trije jier letter komt it tredde famke:

7. Hendrika Francisca Wilhelmina, 24 september 1900 sy trout mei Theodorus Leonardus Bianchi. op 5juni 1930. Theodorus is 18 jier âlder as Hendrika (Riek). Sy is de 3e frou fan Theodorus. Hy is Controleur bij het bevolkingsregister, adjunctcommies en hoofdcommies bij de gemeentesecretarie sociale zaken. Se krije 1 soan: Theodorus Leonardus II Bianchi. Hy wurdt directeur fan in skipfeart en ekspedysjeûndernimming. Theodorus I ferstjert yn 1972. Wannear't Hendrika ferstoarn is is net dúdlik. Yn alle gefallen nei 1960.

Wer trije jier letter komt it 5e jonkje:

8. Matthijs Wilhelm, 26 maart 1903 trout mei Johanna Cornelia Elisabeth Schilt op 24 juli 1929. Matthijs is bontwurker. Se krije yn alle gefallen ien dochter: Catharina Johanna, op 8 april 1932.

En de benjamin fan de húshâlding wurdt wer trije jier letter berne:

9. Cornelis,  27 augustus 1906 trout mei Marie Los. Se krije 4 bern.

Cornelis mei syn frou Marie.

Op 22 novimber 1921 ferstjert myn betoerpake Heinrich. Hy wurdt goed 56 jier.

Rou-advertinsje betoerpake Heinrich.

Myn betoerbeppe Catharina wennet yn 1939 noch oan de Spangesekade 14c. Yn it Rotterdamsch Nieuwsblad fan 15 desimber 1943 stiet dat se ferstoarn is. Se is 79 jier wurden.

[mirjam1972]

Hendrikus Bernardus Franciscus Brand. Tún fan de Stoarmen.

Hjoed wie ik dwaande mei in stikje famyljeskiednis fan de Rotterdamse tûke. Ien fan myn hiele fiere achterneven hjitte Hendrikus Bernardus Franciscus Brand. Soan fan Antonie Andries Brand en Catharina Johanna Willemse. Hy waard berne op 26 maaie 1862 yn Rotterdam en troude mei Geertruida Petronella Decker op 26 jannewaris 1893. Ik koe gjin bern fine en fierder ek neat gewaar wurde oer syn libben oant ik in advertinsje fan syn frou tsjinkaam út 1897. Yn dy advertinsje stiet dat Hendrikus as 1e masjinist wurke op de SS Utrecht, in frachtskip dat op 28 febrewaris 1897 ôfset wie nei Java. It skip is op 3 maart yn in orkaan terjochte kaam by Bretanje, yn de buert fan it eilân Ouessant. Dêr is it skip mei man en mûs fergien. It eilân hat de bynamme 'Tún fan de stoarmen'om't der hûnderten skippen fergien binne fanwege ferriedlike streamingen, benammen de Passage de Fromveur is dêr ferneamd om. In âlde siswize fan de Bretonske seelju is dan ek: Nul n’a passé Fromveur sans connaître la peur.

Op it eilân, yn de haadstêd Lampaul, wurdt alle jierren yn augustus in literêr festival hâlden oer eilânliteratuer: Salon International du Livre Insulaire. Auteurs oer de hiele wrâld dy't op in eilân wenje of der berne binne komme dan nei Ouessant (yn it Bretons Eusa). En sa kom ik fia in fiere achterneef en myn hobby famyljeskiednis út by trije oare leafhawwerijen: eilannen, lytse talen en boeken. En in nije reisbestimming: Ouessant.

Boarnen:  http://advanderzee.com/…/03/28/ouessant-de-tuin-der-stormen/ Koninklijke Rotterdamse Lloyd Museum: http://www.krlmuseum.nl/schepen.html Centraal Bureau voor Genealogie: http://www.cbg.nl Salon du Livre Insulaire: http://www.livre-insulaire.fr

[mirjam1972]

Freed 13 septimber 1946. Troudei pake en beppe Van der Weg

It is hjoed de troudei fan myn pake en beppe. Se trouden op freed 13 septimber 1946. Op harren troudei gie it net allegear sa't it gean moast. Yn Snits hiene pake en beppe in breidsboeket besteld, dat -sa wie mei de blommist ôfpraat - mei de reguliere autobustsjinst fan de Z.W.H. (autobedriuw de Zuidwesthoek) yn Tsjerkgaast ôflevere wurde soe. Mar alles wat der dy dei ek kaam, gjin breidsboeket. Dat wie tsjinfaller nûmer ien.

Op de foto ien fan de bussen fan de ZWH.

Ek it bestelde autobuske, dat pake en beppe en oare famyljeleden - oerbeppe Hieke, âldomke Sjoerd, âldmuoike Piertje en âldomke Siebe - fan Tsjerkgaast nei it gemeentehûs yn Langwar ferfiere soe, kaam net opdaagjen. Dat wie tsjinfaller nûmer twa. Yn sân hasten waard in buske regele dat op Spannenburg stie te wachtsjen en dat normaalwei ried tusken Spannenburch en St. Nyk. Pake en beppe kamen noch krekt op 'e tiid oan op it gemeentehûs yn Langwar. De amtners hiene har al ôffrege wêr't it breidspear bleau.

Gemeentehûs Langwar, 1948 (Fries Fotoarchief)

It sluten fan it houlik ferrûn fierder gelokkich sûnder problemen.

Trouboekje pake en beppe.

Om't beppe yn ferwachting wie, mochten se net foar de tsjerke trouwe. In resepsje of soks hawwe se ek net hân. Se wennen nei de trouwerij yn by oerbeppe Hieke. Pake en beppe hawwe 46 jier troud west, oant beppe ferstoar yn 1992. Pake is yn 2006 ferstoarn.

Troufoto pake en beppe

[mirjam1972]

Hoe't ús mem Dieuwke oan har namme kaam is (diel 1)

Dieuke Teijes (ca. 1640)

De alderearste Dieuwke dy't ik efterhelje koe is  Dieuke Teijes. Wat wy fan har witte, witte wy foar it grutste part út it trouregister. Se komt fan Reduzum en op 1 jannewaris 1663 is har houlik befêstige mei Mirck Douwes.

Reduzum, 18e ieu (in stik letter as 1663)

Mirck komt út Sniksweach. It houlik is befêstige yn de Herfoarme Gemeente fan De Jouwer, Westermar en Sniksweach.

De âlders fan Dieuke hjitte nei alle gedachten Teije Tyalles en Tiescke Taekes, mar dat is net wis. Om't se yn 1663 troud is, is se sa om 1640 berne tink ik.

Mirck en Dieuke krije foar safier bekend 3 soannen: Tiebbe, Gerben en Douwe. De earste jonge, Tiebbe, wurdt doopt op 22 febrewaris 1663. Krapoan twa moanne nei de befêstiging fan it houlik fan Mirck en Dieuke. As opmerking stiet dêrby: "De ouders wonen in De Broek". Wa't de twadde of tredde soan is, is net hielendal dúdlik, om't der by de doop fan Gerben Mircks, op 20 maart gjin jiertal neamd wurdt. Mar om't soan Douwe pas op 6 novimber 1670 doopt wurdt, gean ik der fanút dat hy it tredde jonkje is en Gerben it twadde.

Ansichtkaart De Broek

Mear ynformaasje oer de skiednis fan Broek is te finen yn dit boek en op dizze website:

Op 12 november 1676 binne se ynskreaun yn de Herfoarme Tsjerke fan Eagmaryp-Terkaple. Se binne ynkommen fan De Broek. Hjirûnder de ynskriuwing fan Dieuke en Mirck. "Met attestatie van de Broeck" stiet derneist.

Miskien hat Dieuke Teijes dizze grêfstien wol sjoen yn de Herfoarme Tsjerke fan Terkaple en is se der wol oerhinne rûn. Hy is fan Douwe Roorda (±1601) en syn frou Elisabeth van Borghreeff (±1615). 

Om it lyntsje fan ús Dieuwkes fierder folgje te kinnen, moatte wy fierder mei de jongste soan fan Mirck en Dieuke: Douwe. (wurdt ferfolge yn diel 2)

[mirjam1972]

Dit is myn oerpake Heinrich Franz Wilhelm van Stokkem út Rotterdam. (1895-1968). Ik moast even oan him tinke doe't ik dizze bylden fan Rotterdam seach. Moai om sa efkes yn de wrâld fan myn Rotterdamske foarâlders te sjen. http://nos.nl/artikel/633908-nieuwe-beelden-van-t-oude-rdam.html

Flickr: http://flic.kr/p/dLepRN

[mirjam1972]

Ut de hiele jonge skiednis: myn broerke is juster troud

Juster, 31 maart 2014, is myn broerke Arnold Vellinga troud mei Vera Schaeffer yn it gemeentehûs fan Lansingerland yn Bergschenhoek.

It breidspear yn it gemeentehûs yn Bergschenhoek.

Oandien troch in hiel spesjaal ferske dat foar harren songen waard.

Myn broerke mei syn dochterke Elise Famke Vellinga.

[mirjam1972]

Van Mieren Lobenstein, in aadlike namme?

De oerbeppe van myn oma Catharina Johanna van Stokkem hjit Wilhelmina Elizabeth van Mieren Lobenstein.  Myn oma wie altyd wakker grutsk op dizze namme yn de famylje en fertelde by sawat elke besite dat wy fan adel wiene. As famke spruts my dat wol oan. Ik seach my al yn in  prinsessejurk yn in kastiel sitten mei in grutte biblioteek fansels... 

Dit hie ik dan foar eagen. Kasteel van Loevestein (liket wol hiel bot op Lobenstein dochs?).

Oars as dizze achternamme en de stellichheid fan myn oma wie der neat yn de famylje dat wiisde op in aadlike achtergrûn: gjin rykdom, gjin oerlevere antykstikken of dokuminten, gjin konneksjes en myn oma sei ek gjin 'ijskast' ynstee fan 'koelkast'.

 No't ik wat mear dwaande bin mei myn famyljeskiednis, woe ik hjir wolris wat mear fan witte. Hoe sit dat no mei dy "Van Mieren Lobensteintjes"?

 Wilhelmina Elizabeth van Mieren Lobenstein is yn 1826 berne yn Kralingen. Har heit is Jacobus van Mieren Lobenstein en har mem Antonia Meijer. Jacobus en Antonia trouwe op 25 maaie 1822 yn Schoonhoven. Jacobus is 'metzelaarsknecht'.  Antonia komt yn 1840 te ferstjerren en Jacobus trout foar de twadde kear mei Maria Cornelia Abkenius yn 1841. By de stikken fan dat houlik sit dit stik:

As der al sprake is fan in aadlike konneksje dan is dit in hiel earm tûkje. Dat Jacobus metselersfeint is wie fansels ek al gjin teken yn dy rjochting.

Noch mar in generaasje werom dan. De âlders fan Jacobus. Dat binne Andries van Lovenstijn /Lobensteijn en Johanna van Mieren. Hé... Andries en Johanna krije acht bern. Se hjitte allegear Lobensteijn/Lovenstijn of fariaasjes dêrop, útsein 'ús Jacobus'. Yn syn doopakte stiet dit:

“Den 22. July dito, is gedoopt een kind, zijnde een zoon, volgens opgave van ouders geboren op 
dito, genaamd
 Jacobus van Mieren, waarvan 
vader is Andries Loovenstijn
 en moeder Johanna van Mieren”

Hy hjit dus Jacobus van Mieren, nei syn mem, teminsten sa is er yn it doopregister set, wylst it eins Van Loovenstijn of Lobenstein wêze moast. Syn âlders wiene doe al troud, dus gjin reden om de namme fan de mem te brûken. Letter sil Jacobus dat sels korrizjearre hawwe. By syn trouwen hjit er Van Mieren Lobenstein en ek yn de berte-aktes fan syn bern fiert er dizze namme, al is it wol mei de nedige fariaasje. As er trout mei Maria Cornelia Abkenius stiet er der op, fêstlein yn in akte, dat syn offisjele namme Loovenstijn is en net Lobenstein. 

De bern út syn twadde houlik hjite dan ek allegear Van Mieren Loovenstijn. By de bern út syn earste houlik is in fariaasje oan nammen te sjen:  Van Mieren Lobenstein, Van Mieren Lobensteijn,  sûnder 'Van', mei dûbel o en sels ek Van Mierlobesteijn.

De fierst bekende foarâlder fan Jacobus, Julianus Godtlieb van Lobenstein is berne yn Dútslân (ca. 1735), yn Weimar/Thüringen, nei alle gedachten yn Bad Lobenstein. Hy troude yn 1760 mei Pieternella Schep yn Geertruidenberg.

Bad Lobenstein

Gjin adel dus, teminsten net fan dizze kant. It is mar goed dat oma dit nea witten hat.....