Likhang Retorika

Dito ko ipapaskil ang aking mga nilikha para sa aking sabjek na Filitri sa aking pangalawang taon sa kolehiyo. Maari pong mag-iwan ng mga komento at suhestyon upang aking mapabuti at mahasa ang aking kakayahan sa pagsulat. Maraming salamat!

[parasafilitri]

Ang Pananatili

Natural na sa tao pagiging diskuntento. Siya ay mayroong palaging gustong baguhin at hilingin. Mayroon din sa atin gustong ibahin ang mundo, gawin ito kagaya ng ating pinapangarap. Kung ako ang iyong tatanungin, wala akong gustong baguhin sa mundong ito at hindi ko ninanais na magkaroon ng sarili kong mundo. Bakit? Sapat na ito para sa akin at wala na akong maisip na pwede pang ibahin, tanggalin o ilagay dito. Ito man ay napapaligiran ng mga negatibong elemento, mayroon pa ring kaunting kabutihan kahit papaano na sasalungat dito. May kadilimang bumabalot man, may liwanag pa rin. Itong mundo na mismo ang mundong inaasam ko, ito na ang sarili kong mundo- pinaliligiran ng mga magkaiba at magkasalungat na bagay. Nag-iiba ng kanya sa paglipas ng panahon.

[parasafilitri]

Pangitaing Hindi Kanais-nais

"May mantsa!"- isang katagang may halong taranta. Sa damit o sa sahig, sinisikap nating tanggalin ang pangitaing hindi kanais-nais. Hindi ba ganito rin tayo pagdating sa ating mga sarili? Pinupuksa natin ang mga dumi sa ating katawan at katauhan, pero mas malimit pa nating napapansin ang duming nakakapit sa iba. At kadalasan, ito pa ang una nating napapansin.

Inaamin ko na hindi ako perpekto at meron din akong mga dungis at mantsa na hindi talaga tinatablan ng tubig at sabon. Marami ang nagsasabi na mala-anghel at napakainosente ng aking itsura ngunit sa ilalim nito, napakadami kong nililihim na sukal. Isa rito ang aking matalas na dila na ilang beses nang nakasugat. Tila tumitilos ito kahit hindi hinahasa. Ilang beses na rin akong nakapag-isip ng masama sa kapwa at ilang beses na rin akong nagsumpa, nakapanakit, nagmura at nakapatay ng tao sa aking isipan. At kung ako ay nagkakaroon ng piso sa bawat pagkakataong nagsinungaling ako, hindi ko na kinakailangan na humingi ng pambaon sa aking mga magulang o magtrabaho pagkatapos ng kolehiyo.

Madami pa akong dungis sa katawan, hindi sa pisikal, kung hindi sa pagkatao. Ang mga dungis na ito ay hindi maidadaan sa tago, kung hindi sa paghuhugas at paglilinis. Madami namang mga uri ng sabon at panlinis diyan, baka sakali may tumalab sa akin.

[parasafilitri]

Kalidad, Kayamanan, Katalinuhan

Ano ang mahusay na edukasyon?

Gaano ba ito kaimportante sa sibilasisyon?

Ito ba ay nakasalalay sa paaralan?

Ito ba ay nasa estudyante at sa kanyang natutunan?

Totoo ba na mas mainam sa pampribado,

kumpara sa paaralang pampubliko?

Marami ang sang-ayon na kapag mas mahal ang binabayaran,

mas maganda ang turo at serbisyo ng eskwelehan

Ngunit, paano na ang hindi gaanong biniyayaan?

Na kung minsa'y ang nilalakbay pa ilang ilog at kagubatan?

Makikita ba ito sa nalalaman ng mag-aaral?

Sa kanyang isip, kilos, ugali at asal?

Paano ba natin masusukat ang kalidad ng edukasyon?

Ang ating mga basehan ba ay kaalaman, kayamanan at aksyon?