الخميس اللي فات كنت في جرين بلازا (مول تجاري للناس و الحبيبة غالبا) مع اتنين صحابي محمد تركي و ايهاب، تركي كان عاوز يشتري جاكت و قعد يلف بينا زي والدتي البتقعد تلف سنين تتفرج، المهم اخيرا دخلوا محل و انا وقفت استني برا تحت عامود نور و كنا طالعين من الكلية و يوم طويل و الساعة 8 و تأتي الافكار علي بالي.
“انا تعبان اوي عاوز اروح، تركي طول اوي، حروح….بس البيت فاضي مفيش حد هناك، و مفيش زي زمان غدا انا جعان جدا، بابا بقاله تلت اسابيع من ساعة ما اتوفي و ماما مش عاوزة تقعد في البيت علي طول عند جدي و بطلت تطبخ و علي طول بتبكي”
“انا دلوقتي gpa 3.2 و في النازل يا عالم لحد كام، فين ايام ما كنت 3.8، كانوا يقولوا عليا الnerd بتاع السيكشن😂 مع اني مش بذاكر اوي انا يدوب بركز و بخلص اللي ورايا كنت حاسس ان ليا شخصية الولد الشاطر بس مش دحيح …دلوقتي انا لا بركز ولا بخلص ولا nerd ولا اي حاجة و تلت تربع الدفعة نسوا اسمي _محمد سهل يتنسي_ و دماغي دايما في اودية تانية حتي league of legends كنت بلعبها اكتر ايام التفوق و كنت احسن فيها، دلوقتي انا بفكر اعتزل مشوار مابدأش اصلا 😅”
“انا مصلتش بقالي اد ايه؟؟ انا اصلا صليت الصبح؟؟ طيب يا تري حروح حصلي العشا و لا حنام هلي نفسي من الارهاق؟….انا مقصر جدا….نفسي ابكي…انا يوم ما بابا مات معيطتش مسكت نفسي عشان ماما و ندي…و بغض النظر عن انا و بابا مكناش قريبين و مكناش كويسين سوي الا اني كنت بدأت اتفتحله لأنه فعلا في آخر اسبوعين من مرضه اتغير و انا نسيت كل حاجة وحشة و كل تصرف سيئ ارتكبه….بس هو فعلا ساب مساحة كبيرة فيا….البيت بقي هادي زي القبور تمام….يا رب ارجع اصلي زي الاول، ده انا كنت بصلي السنن في ابتدائي حصل ايه بس”
“بص علي دراعك كده..انت رفيع…باقي العيال دراعهم قد دراعك مرتين، انا ببص علي نفسي في المراية بلاقي اعواد قصب 😂 يوم ما كنا بننقل الشقة الجديدة كنت بشيل حاجات هبلة صناديق و كدة، ابن عمتي شال البوتجاز…المدرب بتاع الgym كان بيتحايل عليا عشان آكل و في الآخر مكملتش عشان قسمنا اللذيذ بيطلعنا متأخر لدرجة ان انا مبيبقاش فيا حيل اتكلم…طيب ايه العمل ده حتي الوجبات الاساسية مفيش، ده ماما من حوالي 6 شهور و هي عمالة تقلي خفوا المصاريف عشان علاج بابا مكلف و انا اصلا مكنتش بطلب حاجة، يعني آكل بكام في الجامعة النتنة دي؟”
“اسوأ ما في الموضوع اني حاسس بارهاق، بتبلد، مش حقول لا مبالاة لكن بطلع عشرميت مبرر لما اجيب درجة وحشة، و حاسس ان فجأة ظهرتلي مسؤوليات مكنتش بفكر انها تطلعلي دلوقتي، كانت مسؤولياتي كلها تتمحور في الدراسة، من ساعة ما بابا جاله السرطان و حالنا كلنا متدهور، بس دلوقتي بعد ما مات الحمل زاد….نفسي في اجازة او حاجة جديدة حلوة تحصل، ناس جداد كويسين، عاوز تدخل خارجي يكسر الحال ده….بحاول اقنع ماما نجيب قطة و انا حاسس انها بدأت تلين حبة، شايلة هم التنضيف وراها، بس هي حتحب القط جدا لدرجة انها حتنضف وراه و مش حتبقي مدايقة عشان هي حتحبه جدا”
“الولد الصغير اللي بيلعب ده فرحان اوي، لسة قدامه عمر طويل حيلعب و يفرح، ابوه شاله و حطه علي كتفه، انا مش فاكر ان بابا قعدني علي ظهره قبل كدة….انا لو عندي ابن حقعده معايا دايما حعلمه الصح و الغلط، حخليه ولد ذكي زيي كدة مش حخليه مدلع ولا زي باقي الولاد حعلمه يبقي نفسه، يبقي متميز، مش فيمص زي العيال الهبلة بتوع الجامعة، كلهم نماذج متكررة و البنات برضه تقريا بحسهم زي بعض،ناس قليلة بتلفت انتباهي….او يمكن انا ببص بسطحية، الدنيا بقت معقدة، بس انا اصلا من زمان و انا بقول مش عاوز اتجوز بلاش وجع دماغ، بس دلوقتي اهو بقيت احط خطط ازاي حربي ابني، طيب ابني ده اجيبه منين؟ اكفل يتيم؟ و بعدين اتجوز مين اصلا؟ و بعدين الناس بتيجي تحكيلي كلام مش كويس عن بنات و شباب زمايلنا حاجة في منتهي القذارة لدرجة الواحد نفسه اتسدت من الجواز و هي اصلا كانت مش مفتوحة، بس انا مؤمن ان في ناس كويسة برضه، اكيد في واحدة يعني هنا ولا هنا، بس اهم حاجة ميهماش اني رفيع 😂”
تركي اخيرا نادي عليا عشان ادخل المحل، مش عشان خلاص اشتري لا، عشان ياخد رأيي في لون الجاكت، بيقلي انت نمت برا ولا ايه.
الخلاصة: تركي بيتأخر في الshopping، متروحش معاه و هو بيشتري حاجة.
