小弟既 blog, 自從比阿女霸佔左九成之後, 都冇乜出過「痱滋人生活」既 post。 除左係阿女太得意, 太受歡迎之外 <--- , 主要原因係8年既痱滋生活, 任何事都已變得枯燥無味!!
但今次呢件事, 真係唔講唔得, 因為呢件事簡直令人髮指!!!
-----------------------------------------------------------------------------------------
事緣小弟剛剛又去完印度孟買呢個鬼地方餵蚊。 對上一次去, 只係將自己鎖左係間房48小時, 除左身上發出異味之外, 亦開始有d "muroomsh" 生出黎 (陳一讀mushroom係咁讀架!!)
所以今次第一晚去到, 我決定單人疋馬, 出去呢個鬼地方闖一闖!!
-----------------------------------------------------------------------------------------
之前問好晒d 「差姐」附近有咩好食, 其實黎黎去去都係得個幾間, 因為其他個d, 我諗佢地都唔敢介紹我去, 萬一食完痾住番黎, 去邊度搵條茂利黎開工呀??
最後揀左一間叫 Spice Tree 既餐廳。差姐話坐 auto rickshaw, 5分鐘就可以去到, (rickshaw即係泰國d tuk tuk)
一出酒店, 問左幾架都唔知間餐廳係邊, 最後問左個瘦孟孟, 仲帶眼鏡既哥哥仔, 佢居然識路, 梗係飛身上車啦!! 一上車, 佢就一輪咀講埋d 唔咸唔淡既英文, 唯一我聽到既, 就係 "return trip"。 我心諗, 你方唔係又想屈我比埋回程錢之類既欺詐手段咩.......是但啦, 2個零港紙, 當我毫夠10蚊比你又點話~~~
大家如果心水清既, 我依家個blog張background相, 咪就係個條哥哥仔個背影囉!! 見唔見到左手面有個「錶」咁既野呀??? 佢地其實好勻真架, 唔似泰國佬, 一上車就昆到你落車!! 我心諗, 最多咪比你係個錶到做手腳, 呃咪比你呃多十零蚊, 算罷啦, 當我捐比你個仔女讀書啦~~~
係咁易解釋下個咪錶。 左邊有3個「大字體」既 digit, 我估係 "蚊" 位; 後面有 3個「小字體」既digit, 我估係 "毫子位"。 記住, 大家要完完全全清楚明白以上既排位, 先明白今次事件既結果!!!
-----------------------------------------------------------------------------------------
話咁快5分鐘過左, 我見到個錶跳左兩次變成 $120, 咪係銀包拎定$10出黎先啦, 費事到時比佢見到我有幾舊水係身, 老笠我咪大劑??
去到餐廳門口, 都仲係$120, 算罷啦, 就比大o拿o拿 $8.8佢做貼士, 當供埋佢個女讀大學啦!!!! 我都算係慈悲為懷啦卦??
轉身落車, 條尤仔係度口up up, 眼尾悄到佢落車跟埋黎, 梗係第一時間飛身入間餐廳啦!!! 點知佢係唔係嫌屈我唔夠, 想黎窮追猛打架??
入左餐廳, 條尤仲開門伸個頭入黎講左一輪野。我當然梗係當冇事發生, 一支箭標左入去。
-----------------------------------------------------------------------------------------
食食下野, 覺得有d唔對路, 好似記得差姐同我講過, 撘 rickshaw 要10零蚊先黎到個喎, 點解今次 $1.20 咁抵小?? 越諗越知自己癩野, 就叫個經理埋黎, 問佢:「究竟 rickshaw上面個錶, 大字係 1位定係 10 位呀??」
經理用佢純正既印度口音 + fing 下fing下個頭咁答我:「Sir, that's the 10th DIGIT!!」(真係唔明, 典解d印度人講野個頭要 fing fing下呢??)
噢~~~!!~~~~!! 個下簡直係我人生中最慚愧既一刻, 因為我無啦啦「打劫」左個司機!!! 人家可能就係差個兩蚊, 累到佢個女讀唔到大學, 咁我呢世人就真係抬唔起頭做大人啦~~~~ 食乜Q「偉哥」都冇用啦~~~
再者, 我侮辱左12億中國人民, 因為呢個司機自此之後, 就會周圍同人講, 中國人坐車唔哪比錢架!!!
你話, 呢件事大家聽到之後, 係唔係都覺得令人髮指, 恨不得黎o趙我一獲呢?? 麻煩請致電 173-173-173 向我既「豪放火辣俏秘書」約個時間先啦, 收費每6秒6毫。
