ძალიან დიდი ხნის განმავლობაში მჯეროდა, რომ არ არსებობდნენ ადამიანები, რომელთაც თხემით ფეხამდე შეეძლოთ შენი გაგება, იდეური ზრუნვა, სიყვარული, სიმშვიდის და თავისუფლების მოცემა, მოგზაურობა შენთან ერთად თქვენივე გამოგონილ სამყაროში და დროის შეგრძნების გარეშე ჩაკარგვა იქ. არ მჯეროდა, რომ ამ ყველაფერს შესაძლებელი იყო ერთ ადმიანში მოეყარა თავი მანამ, სანამ არ აღმოვაჩინე უკან დაბრუნებული პატარა პრინცი, რომელიც გულიანად იცინის, კითხვებზე პასუხს ბოლომდე თითქმის არასდროს გცემს და მუდამ თავის შორეულ ვარდზე ზრუნავს, რომელსაც ვერასდროს ვნახავ. მას არ უყვარს, როცა მოთვინიერებულია, თუმცა თავად უყვარს შენზე ზრუნვა, თან ისე, შეუძლებელია ეს შენს სულს არ უხაროდეს. არ უნდა ბევრი პასუხისმგებლობა, რადგან მას თავისი პლანეტა აქვს მოქმედი თუ ჩამქრალი ვულკანებით და ერთი ულამაზესი ვარდით, რომელიც მთელ მის სამფლობელოს თავის ელფერს ჰფენს. ერთადერთი, რაც დაგრჩენია ისაა, რომ მოასწრო ზრუნვა, ჩახუტება, ყველაფრის გაკეთება, რაც ხელგეწიფება, თქმა თუ მიცემა მისთვის, რაც კი შეიძლება თვის დაუსრულებელ მოგზაურობაში გამოადგეს, რადგან როდის რა წამოუვლის თავში, ვერ გაიგებ, შეიძლება არც გითხრას და წინა დღით დაგემშვიდობოს. ზუსტად ისე, როგორც წინაზე. გეტყვის, რომ ასე უკეთესია, მაგრამ შენ ვერ გაიგებ, რადგან დედამიწელი ხარ. მერე დაჯდები და ბავშვივით იტირებ, ამითაც ვერ მოითქვამ გულს და ბოლოს უბრალოდ ისე ჩაიხუტებ მასზე მოგონებებს გულში, რომ ისინი შენი საკუთრება გახდებიან, შეისისხლხორცებ და ყველგან თან ატარებ, თუმცა ამას შენს გარდა ვერავინ მიხვდება და ეს იქნება ყველაზე ლამაზი რამ, რაც კი შენს საკუთრებაში ყოფილა.
ამჯერად ვარსკვლავბიჭუნამ დიდხანს მოისურვა დარჩენა და ვინ იცის, იქნებ სულაც არ უნდა წასვლა, მაგრამ თუ მაინც მოუწევს, ხომ შეიძლება უკანაც კი დაბრუნდეს ხოლმე. საოცარია, რა მალე გაყვარებს თავს და აღგაფრთოვანებს თვისი სისადავით, გრძნობათა სინაზით, მზრუნველობით, იდეებით, იდუმალებით და მუდამ თბილი ხელებით. ყოველ ჯერზე, როცა მის გვერდით აღმოჩნდებით, თქვენ ნახავთ, როგორ იწყებს დედამიწა ვარსკვლავივით კიაფს, თქვენი სული კი სიცილს.
მას შეუძლია ჯადოსნურად გააჩეროს დრო და სამუდამოდ იქ დარჩენა მოგანდომოთ, სადაც სამოგზაუროდ წაგიყვანათ. განახებთ ახალ ადგილებს, ძველებს კი ახლებურად დაგანახებთ, გაგასინჯებთ ახალ გემოებს, ემოციებს და შეხებებს. თავიდან შეიძლება მოგეჩვენოთ, რომ ის თქვენთან ურთიერთობს, მაგრამ მალევე აღმოაჩენთ, რომ ის ისეთივე ბავშვია, როგორიც თავად იყავით ოდესღაც და ახლა მხოლოდ მას ესაუბრება. მისი სულის კოცნა კი გიღიტინებთ და ძველებური, ლაღი სიცილი გიბრუნდებათ. დამერწმუნეთ, თუ ოდესმე თქვენც ჩემსავით გაგიმართლათ და ერთხელ მაინც შეხვდით მას, მიხვდებით, რას აღვწერდი და ამაზე უარს ვერც თქვენ იტყვით. აი ნახავთ, როგორ მოგინდებათ გულში თბილად ჩაიკრათ და თქვენს მკლავებში მოასვენოთ, დააძინოთ, მოუაროთ და დაიცვათ ყველა იმ ბინძური, ბოროტი ენერგიისგან, რაც გარშემო შეიძლება არსებობდეს ამ პლანეტაზე.
მიუხედავად თქვენი დიდი პატივისცემისა, მაინც ბავშვური ეგოიზმი დაკრავს ჩემ ფიქრებს და სულაც არ მინდა მისი ვინმესთვის გაზიარება. არ მინდა ამ სამყაროში რომელიმე თქვენგანის შემოშვება, თუმცა როგორც უკვე ვთქვი, პატარა პრინცი საკმაოდ ჯიუტია, ხანდახან ბუზღუნებს კიდეც და თუ მას თქვენ მოეწონეთ მეგზურად, მე წინ ამას ვერ აღვუდგები და კეთილ მგზავრობას გისურვებთ.
მე ყოველთვის მიყვარდა ვარსკვლავების ყურება, თუმცა ახლა მხოლოდ ერთის დანახვას ვცდილობ და ველოდები როდის აჟღარუნდება ხოლმე. ვიმედოვნებ, ისევ მალე გამოჩნდება და ერთად შევუდგებით ახალი ამბების ქსოვას. 🌟
