Mainstream blabla. Scheiss doch uf en Titel.
„Wah, i weiss nid obi das ahlegge söll, het doch eh scho Jede“, „OH die SCHUE sind so geil und i mues sie ha, bevor sie jede Andere het“ oder „Ja nei ich han die Musik mal gern kha aber jetzt nüme, will die Band/deProducer ufeimal berüemt worde sind und etzt loseds alli“
Jaja de Mainstream, mier kennend ihn alli. Und doch wüssemer eig garnid genau was de Mainstream überhaupt isch. I meine bedenkt me, dass wenn öppis nid Mainstream isch – also „Hipster“ – und es denn vo allne Hipsters übernoh wird, isches das was vorene nid Mainstream gsi isch, Mainstream und es isch nümme „cool“. Jetzt was passiert mit dem, wo vorene Mainstream gsi isch? Isches nümme Mainstream, will etzt öppis anderes Mainstream isch oder isches immerno Mainstream, will eimal Mainstream immer Mainstream? Oder chame nachdem öppis Mainstream gsi isch und es denn nümme Mainstream isch wieder bruche ohni das einem gseit wird, me isch Mainstream? Oder ischme immerno im Mainstream wennme Sache brucht oder ahleit wo mal Mainstream gsi sind? Schlussendlich stellt sich die allesnentscheidendi Frag: Isch de Mainstream würklich uncool und muesme degegeschwimme oder chanme au mitem Mainstream schwimme?
So und mini Antwort dezue isch: DAS ISCH AAAALLES BULLSHIT! Schlussendlich chunnts genau drufah was du ahlegge willsch und wie du umelaufe willsch, nämlich basierend uf dini subjektive Präferenze. Das huere Gelabere vowege Hipster und Mainstream und all de Scheiss isch doch eifach nur zum kotze! Legg doch eifach das ah was du willsch, lauf so ume wies dier passt und fertig. Klar lebemer inere Konsumentegsellschaft und jede mues zeige waser het und jede mues en guete Idruck bi allne andere mache, aber schlussendlich, muesch du ganz allei demit klarcho, wer du bisch und wie du umelaufsch.
En Kolleg hetmer letschtens es guete gedankliche Input geh. Er het gseit, was isch wennmer (theoretisch) ganz allei im Wald ufgwachse während und denn ine Grosstadt cho würed und mier chönnend üs alles kaufe, was mer wennd. Wär no interessant z’gseh, was i ichaufe wür, wäri nid jede Tag demjetzige soziale umfeld usgsetzt woni jetzt bin. I wür sehrwahrschinlich das kaufe, was mier persönlich passt, unabhängig devo was grad „In“ oder was „Hipster“ isch oder was „Mainstream“ isch. I han denn gmerkt, dass wenn i in en Lade inegahn, ich sofort devo beiflusst werde, wasi mal irgendwo gseh oder wasi irgendwo kört han, dass das und das isch geil und das und das scheisse isch. Drufabe hanni mier vorgno eifach min Kopf z’leere und denn eifach in de Lade ine z‘gah und denn die Sache ah z‘luege, woni würkli vo mier us gern ahhetti. I bin zum Schluss cho dass das au en absolute Scheiss isch und nur sehr begrenzt funktioniert. Wieso? Will es eigentlich scheissegal isch, was mier für Sache ah hend, willmer die Sache au nur ahleggend, zum üsem soziale umfeld öppis z’zeige. I meine für was sind Kleider da? Demit mer warm hend und nid nackt umelaufe müend. Spielts e Rolle, wie die Kleider usgsehnd? Überhaupt garnid! I chönnti mit markelosem wissem T-Shirt und wisser Hose und wisse Schue umelaufe und de zweck, wo mini kleider hend, isch erfüllt. Mier benutzend Kleider jedoch nid zweckmässig, sondern mier benutzend sie als Statussymbol, mit Kleider ordnet me sich i und zeigt, dassme au en Teil vo dere Gsellschaft isch. Und hey, das isch au GUET so! Wo’s denn aber ufhört isch das verbissene Sueche und Mache nach neue Sache wo Niemert besitzt oder ahhet oder wasauimmer.
Ah isch ja au egal i verlüre mi wiedermal in so komische Gedanke über menschliches Verhalte, wo nieneds hifüerend. Leider isch s’menschliche Wese recht kompliziert und willmer so viel sind isches nid eifach irgendwas use z’finde, speziell als so en normalsterbliche Nicht-Verhaltenspsycholog, wie ich es bin.
Chlini Anekdote zum Schluss: Letschtens bini amne Donnstig im Usgang gsi (ONDAG biatch!) I bin spontan vomene Kolleg gfragt worde obi chume und i bin gange ohni gross nah z’denke. Spöter in de Bar stelli fescht, dassi es Tanktop ahhan. D’Bar isch nid so volle gsi also isches mier scheissegal gsi. Ufeimal chunnt so en Typ daher, woni scho länger kenne, aber nie gross mit ihm was z’tue kha han und er seit : „Eh was willsch du mit dinem Tanktop da eh was hesch z’Gfühl bisch en harte Siech oder was eh?“ Er isch bsoffe gsi und i kennen, i han gwüsst er isch nid uf Konfrontation us und will nur blöd tue, aber glich hets iwas in mier drin usglöst. Nid irgendwie es Beduure, dasi s’Tanktop ahgleit han, sondern e Wuet. Es hetmi u huere hässig gmacht, dassme nid eifach miteme Kleidigstuck eis go trinke chan ohni dasme grad iwie inen Topf inegworfe wird, dassme sich ufspiele will, oder dasme Muckis zeige will, dassme zeige will was füren härte Siech meh isch ET CETERA. I has ahgleit, willi wohl drin fühle und nid willi irgendöppertem irgendwas bewiese will. Ufem Heiweg bini denn aber zum Schluss cho, dasses würkli en Scheiss bringt sich drüber ufz’rege. Aber es hetmer ufzeigt, dass einem – oder zumindischt mich - d Meinige vo de andere unbewusst beiflussend. Und das isch ebe NID GUET!
Okayokay beruuuhige. Aber chömmemer mal zum Schluss. I bin eifach dere Meinig: Legg eifach das ah in dem du di wohl fühlsch. Bhalt in dinem Kopf, dass de einzig Mensch, wo sich mit dinem Ussehe würklich abfinde mues, du bisch! Und was z’soziale Umfeld ahgaht. Du wirsch sowieso beurteilt und inen Topf inegworfe, egal wie du di ahleisch oder was du ustrahlsch, warum sich also en Kopf drüber mache? Moralapostel Ende. ~N
gamechangershow
germansingergirl
amandla