Hugsmiðjan

Við erum sérfræðingar í að búa til góða, aðgengilega og farsímavæna vefi og aðstoðum við vefstjórn og rekstur vefsvæða. http://www.hugsmidjan.is

[hugsmidjan]

Við kennum þér allt sem við kunnum

Við viljum hjálpa þér að að læra á nýja tækni, ná meiri árangri og gera þig í leiðinni að verðmætari starfskrafti.

Þróunin á netinu er gríðarlega hröð og mörg fyrirtæki sitja eftir án þess að nýta tækifærin sem eru til staðar. Lærðu að markaðssetja eins og árið sé 2017 en ekki 2007.

Námskeið Vefakademíunnar í haust

Samfélagsmiðlun sem virkar

Náðu forskoti með mikilli útbreiðslu og lægri kostnaði en með hefðbundinni markaðssetningu.

„TAKK! Þetta námskeið var alveg frábært. Ég sat a.m.k. límd í stólnum, nýjar víddir að opnast.“

Google sem auglýsingamiðill - Google AdWords

Vertu sýnilegur þegar það skiptir máli og mældu hvað hver einasta króna skilar þér.  

„Skýrt og mjög hagnýtt námskeið.“

Skrifað fyrir fólk og leitarvélar

Mikilvægasti þáttur í leitarvélarbestun er gott efni. Við kennum bestu aðferðir í vefskrifum og gefum innsýn í það hvernig leitarvélabestun nýtist í skrifum fyrir vefinn. 

„Fróður kennari, gott umhverfi og góðar veitingar.“

Lærðu að nýta Google Analytics

Hættu að giska á hvað virkar og hvað virkar ekki. Lærðu að lesa í gögnin á bakvið vefinn þinn.

„Vel útskýrt, vel farið yfir og góð svör.“

Námskeið Vefakademíunnar eru fyrir vefstjóra, markaðsstjóra, einyrkja og aðra þá sem vinna við vefmál í fyrirtækjum og vilja vaxa í starfi en þau eru einnig fyrir alla þá sem hafa áhuga á að starfa innan þessa geira.  

[hugsmidjan]

Andri Már ráðinn til Hugsmiðjunnar

Andri Már Kristinsson hefur verið ráðinn til Hugsmiðjunnar ehf. þar sem hann mun starfa sem ráðgjafi í stefnumótun og markaðssetningu á vefnum.

Andri er viðskiptafræðingur frá Háskólanum í Reykjavík og hefur yfir tíu ára reynslu af markaðsmálum.

Eftir þrjú ár í markaðsdeild Nýherja hóf Andri störf hjá Google sem sérfræðingur í auglýsingaþjónustu fyrirtækisins, Google AdWords. Í kjölfarið varð hann framkvæmdastjóri vefmarkaðsfyrirtækisins Kansas sem rann saman við markaðsstofuna Janúar árið 2014. Nú síðast starfaði Andri hjá Landsbankanum og bar m.a. ábyrgð á vefmarkaðssetningu bankans.

Andri Már Kristinsson: „Ég er ánægður að vera kominn til Hugsmiðjunnar og er spenntur fyrir að taka þátt í þeim verkefnum sem framundan eru. Stafrænar lausnir gegna sífellt stærra hlutverki í daglegu lífi okkar. Við eigum samskipti, leitum, verslum, horfum, bókum og lærum í gegnum hinar ýmsu stafrænu þjónustur. Hugsmiðjan hefur mikinn metnað að skapa frábært stafrænt efni og verða leiðandi á því sviði en ég trúi því að markaðsmál eigi og muni fyrst og fremst snúast um notendaupplifun í hinum stafræna heimi.“

Andri mun ásamt Margeiri Ingólfssyni leiða nýtt teymi innan Hugsmiðjunnar sem mun veita þjónustu í markaðssetningu á netinu og við stefnumótun í vef- og markaðsmálum.

Ragnheiður Þorleifsdóttir, framkvæmdastjóri Hugsmiðjunnar: „Ráðning Andra til Hugsmiðjunnar er liður í efla til muna það teymi sem sinnir stefnumótun og markaðssetningu á vefnum fyrir okkar mikilvægustu viðskiptavini. Það er mikil eftirspurn eftir þessari þjónustu og við erum því virkilega ánægð með liðsaukann. Framtíðin er björt hjá Hugsmiðjunni með öflugt starfsfólk á öllum sviðum vef- og markaðsmála.“

[hugsmidjan]

Ratað í Analytics-skóginum

Við þekkjum öll Google Analytics skýrslutólið og notum það náttúrulega á hverjum einasta degi til að kafa ítarlega ofan í það hvað notendur okkar eru að gera á vefnum, enda einfalt og þægilegt.

Eða, svona næstum…  

Meinið með Analytics er að þar er verið að birta svo margs konar upplýsingar sem hægt er að rýna í frá svo ólíkum sjónarhornum, að viðmótið hefur með tímanum orðið það flókið að varla glyttir lengur í skóginn fyrir trjám.

Hönnuðirnir hjá Google eru reyndar að kynna nýja viðmótsnálgun á Analytics skýrslurnar sem mun seytla inn hjá okkur notendum á næstu vikum (og einhver atriði sem þeir nefna hafa þegar skotið upp kollinum). Vonandi verður sú yfirhalning til bóta og þessi fyrstu skjáskot af nýju viðmóti lofa góðu.

En þó viðmótið batni breytir það því ekki að það krefst yfirlegu og skipulagningar að draga fram réttu gögnin. Þar er í raun aðalspurningin hvað átt er við með „réttu gögnunum“ – trúlega eru það þær upplýsingar sem eru okkur mikilvægastar á hverjum tíma, en stundum sjáum við auðvitað ekki fyrr en eftir á hvað hefði verið gagnlegt að vita aðeins fyrr…

Þá getur verið gott að fá óháðan aðila á borð við Hugsmiðjuna til að fara yfir gögnin; taka út núverandi mælingar og uppsöfnuð gögn, kanna hvort eitthvað þurfi að laga uppsetninguna auk þess að stilla upp sérunnum skýrslum eða mæliborðum (e. dashboard) til að auðvelda reglulega eftirfylgni.

Fyrir utan það að fylgjast með beinhörðum sölum (þar sem um slíkt er að ræða) má nota Analytics mælingar og skýrslur til að fylgjast með atriðum á borð við;

Að hvaða efnisorðum eru notendur að leita inni á okkar vef og á hvaða síðum eru þeir staddir þegar þeir fara í innri leitina?

Hvaðan eru nýir gestir að koma inn á vefinn okkar? Eru einhver markaðssvæði eða áhrifavaldar í t.d. ferðamennsku sem vefnotkun gefur vísbendingar um áður en sú umferð fer að skila sér í beinum viðskiptum?

Hvernig getum við með sjálfvirkum hætti reynt að aðgreina notkunartölur ólíkra notendahópa og kallað fram sjálfvirkar skýrslur um hegðun þeirra mikilvægustu?

Loks getur verið gagnlegt að nýta Google Analytics sem „söfnunartól“ fyrir upplýsingar sem tengjast vefnotkun en leiðir ekki sjálfkrafa af dæmigerðum síðuflettingum.

Sem dæmi má nefna Eplica einingu sem er víða í notkun og birtist notendum sem einföld spurning neðst á síðum: „Var þetta efni gagnlegt? Já | Nei“.  Sú eining nýtir sér event-tracking í Google Analytics til að senda þangað tilkynningar, auk þess að safna innsendum athugasemdum innan Eplica.

Með því að setja upp mæliborð fyrir þau gögn getur vefstjóri með einföldum hætti haft yfirsýn yfir það á hvaða síðum notendur eru líklegastir til að svara, annað hvort jákvætt eða neikvætt, og fengið sjálfkrafa sendar skýrslur til dæmis á tveggja vikna fresti.

Heyrðu endilega í okkur og kannaðu hvort við eigum ekki til þau leiðsögutæki og/eða stórvirku trjáklippur sem gagnast þér til að rata betur um þinn hluta Analytics-skógarins.

[hugsmidjan]

Stefnir efnið í óefni?

Það eru glettilega margir vefir sem standa frammi fyrir áskorunum við að skrifa og viðhalda efni vefjanna; bæði textum og myndefni.

Þetta á sér í lagi við þegar unnið er að heildarendurskoðun vefja, annað hvort í umfangsmikilli tiltekt eða hreinlega í endurhönnun alls vefjarins. Þá vill það reynast yfirþyrmandi verkefni að fara yfir núverandi stöðu og ýmist taka til í því sem til er eða vinna nýtt frá grunni.

Stundum felst áskorunin í því að upprunaleg hönnun og uppsetning vefsvæðisins gerði ráð fyrir ákveðnum efnistökum sem annað hvort eiga ekki við lengur eða sem reynslan hefur leitt í ljós að notendum reynist erfitt að vinna samkvæmt.

Námskeið um vefskrif

Í ljósi þess hvað þetta brennur á mörgum héldum við núna í október mjög vel sótt námskeið í Vefakademíu Hugsmiðjunnar um vefskrif sem hlaut nafnið Skrifað fyrir fólk og leitarvélar.

Þótt ekki sé raunhæft að gera efni sex tíma námskeiðs skil í svona stuttri grein má nefna að sú nálgun sem við unnum út frá þar byggi á svokallaðri efnisstefnu. Efnisstefna getur verið mis ítarleg milli vefsvæða, en í örstuttu máli má segja að í henni sé reynt að skjalfesta svör við spurningum um það við hverja er verið að tala og hvað ætlunin er að segja við þá.

Fyrir þá sem þekkja til vefstefnu má segja að efnisstefna sé eitt af fylgigögnum hennar og kafar dýpra í efnismálin, byggt á forsendum og markmiðum vefstefnunnar.

Vinnu við efni byggt á efnisstefnu má svo lauslega skipta í þrjá fasa:

Greining og mat á núverandi stöðu

Hönnun og útfærsla efnisstefnu

Efnisvinnsla byggð á fyrirliggjandi efnisstefnu

Ferlið þarf ekki að vera flókið og í sumum tilvikum eru ekki endilega skýr skil á milli tveggja fyrstu fasanna. Einnig hefur það að vinna hið raunverulega efni í fasa 3 óhjákvæmilega í för með sér þörf á endurskoðun þeirra forsenda sem lagt var upp með.

Loks er það reynslan úr ferlum hugbúnaðargerðar sem sýnir að betra er hugsa svona ferli sem hringferil frekar en línulegt. Þannig er eðlilegt að brjóta verkefnið upp í smærri einingar, endurmeta reglulega stöðuna og aðlaga efnisstefnuna eftir því sem fram vindur.

Aðkoma Hugsmiðjunnar

Við getum að sjálfsögðu aðstoðað við efnisvinnslu, allt frá greiningu á núverandi stöðu til þess að fullvinna einstaka texta og myndskreytingar.

Reynsla okkar af því að byggja efnisvinnslu á nálgun efnisstefnu hefur verið mjög góð og hefur auðveldað bæði okkur sjálfum og okkar viðskiptavinum að kortleggja hver núverandi staða er, hvers konar greiningar og skjölunar er þörf, og hvers konar efnistýpur er um að ræða í hverju tilviki fyrir sig.

Þar sem góður vefur er samhangandi heild er eðlilegt að mótun efnisstefnu hafi áhrif á til dæmis uppsetningu veftrés og mögulega framsetningu tiltekinna lykilsíðna. Því nýtist teymisnálgun Hugsmiðjunnar sérstaklega vel þegar kemur að endurskoðun vefefnis, þar sem við búum yfir sérfræðingum í efnisvinnslu, myndrænni framsetningu, viðmótsforritun og öllu öðru sem viðkemur notendaviðmóti og birtingu efnis.

Heyrðu endilega í okkur

[hugsmidjan]

Markaðssetning árið 2016, ekki 2006

Það dylst engum hvað máttur samfélagsmiðla er í dag mikill. Landslagið hefur breyst, nú kemur mesta traffíkin inn á vefi fyrirtækja af samfélagsmiðlum og að sama skapi eiga notendur miklu auðveldara með að hafa áhrif á ímynd fyrirtækja.

Við hjá Hugsmiðjunni vitum hvað samspil vefja og samfélagsmiðla er gríðarlega mikilvægt og höfum að undanförnu unnið að því að efla samfélagsmiðladeildina okkar með ráðningum, námskeiðum og samfélagsmiðlaráðgjöf til viðskiptavina.

Samfélagsmiðlar eru orðnir eitt mikilvægasta markaðstæki fyrirtækja því þar leynast tækifærin til að ná til fólks. Þeir sem læra að virkja rétta miðla á réttan hátt geta öðlast gífurlegt forskot og útbreiðslu með margfalt lægri kostnaði heldur en með hefðbundinni markaðssetningu.

Gögn frá þessum miðlum má auðveldlega nota til að búa til markvissara efni og auglýsingar sem skila talsvert meiri árangri en áður var mögulegt með hefðbundinni markaðssetningu.

Við bjóðum upp á samfélagsmiðlaráðgjöf sem felur m.a. í sér:

Mótun samfélagsmiðlastefnu í samvinnu við þig og þitt fyrirtæki,

markhópagreiningu,

framleiðslu á efni,

umsjón með birtingum,

daglega umsýslu,

mælingar,

tengingar við áhrifavalda / vinsælar fígúrúr,

reglulegar skýrslur með yfirliti yfir árangur, 

eftirfylgni.

Samfélagsmiðlar eru stórkostlega öflugt tæki og henta vel hvort sem fyrirtæki eða einyrkjar eru að reyna að selja vöru eða koma ákveðnum málstað á framfæri.

Heyrðu í okkur í síma 5 500 900 og fáðu nánari upplýsingar um samfélagsmiðlaráðgjöf Hugsmiðjunnar. 

Samfélagsmiðlun sem virkar!

Vefakademía Hugsmiðjunnar heldur hið sívinsæla námskeið Samfélagsmiðlun sem virkar, en aðsóknin á þetta námskeið hefur verið frábær og hvert sæti setið.

Þar er m.a. kennt að móta samfélagsmiðlastefnu sem ber sýnilegan árangur fyrir fyrirtækið, farið er yfir dæmi um notkun á samfélagsmiðum sem eru til fyrirmyndar og kynntir eru eiginleikar og tækifæri helstu miðla.

Næsta námskeið verður haldið daganna 3. og 10.maí frá kl 13:00 - 16:00. Nú er fullt á námskeiðið en þú getur skráð þig á biðlista.

[hugsmidjan]

Spennan magnast

Starfsmenn Hugsmiðjunnar [email protected]

Við getum ekki annað en verið hæstánægð með það að 4 samstarfsaðilar okkar hljóta 5 tilnefningar til Íslensku vefverðlaunanna 2015. Til hamingju og takk fyrir ánægjulegt samstarf!

Í þau 10 ár sem Íslensku vefverðlaunin hafa verið haldin á vegum Samtaka vefiðnaðarins hafa samstarfsaðilar Hugsmiðjunnar fengið verðlaun á hverju ári. Við erum stolt af þeim árangri og ekki síst að fá að starfa með metnaðarfullum aðilum.

Viðskiptavinir Hugsmiðjunnar sem hljóta tilnefningarnar eru í 4 flokkum:

Aðgengilegir vefir

Háskólinn í Reykjavík

Framkvæmdasýsla ríkisins

Non-profit vefir

Bréf til bjargar lífi (Amnesty)

Opinberir vefir

Ísland.is

Fyrirtækjavefir

Háskólinn í Reykjavík

Þetta árið er nokkuð jöfn dreifing á vefstofum og öðrum þjónustuaðilum sem starfa með þeim sem hljóta tilnefningar. Það sýnir okkur að samkeppnin eykst með hverju árinu og lyftir það vefbransanum á enn hærra plan. Á annað hundrað verkefni voru send inn í þetta skiptið og veitt eru verðlaun í heilum 15 flokkum.

Sjáumst í Gamla bíó á föstudaginn.

[hugsmidjan]

Hesíov!

Starfsfólk Hugsmiðjunnar [email protected]

Niðurstöður úttektarinnar Hvað er spunnið í opinbera vefi 2015? (HESÍOV) voru kynntar á UT-deginum 26.nóvember síðastliðinn. Þetta er í sjötta sinn sem úttektin er gerð síðan 2005.

Við hjá Hugsmiðjunni erum stolt af því að viðskiptavinir okkar áttu 4 af 5 stigahæstu ríkisvefjunum og 2 af 5 stigahæstu sveitarfélagavefjunum. Það er okkur mikil hvatning.

Allt frá upphafi hefur verið nokkuð góður stígandi í heildarniðurstöðunum milli úttekta - og enn má greina bætingu frá síðustu úttekt, þótt hún sé lítil. Einkunnir fyrir Þjónustu og Innihald hækka eilítið, Nytsemi stendur í stað og Aðgengi fatlaðra versnar.

Þessi litla bæting er viss vonbrigði, ekki síst sökum þess að svarhlutfall var með lægsta móti í þetta sinn, eða 74% miðað við um 79% svörun 2013 og aukningu frá 85% upp í 92% á árunum 2005–2011. Þetta er þrátt fyrir virka eftirfylgni þar sem þau sem áttu eftir að svara voru ítrekað hvött til þess.

Það veltir upp þeirri óþægilegu spurningu hvort áhugi á úttektinni sé hreinlega að minnka.

Ef áhuginn er að minnka, hverju er þá um að kenna?

Er það dvínandi metnaður? ...eða ofmetnaður?

Eru kröfur um hagræðingu og sparnað að bitna á vefmálunum og ráðamenn stofnanna feimnir við að sýna afturför hjá sér?

Valda sparnaðarkröfur því að vefstjóri sinni ekki úttektinni vegna annarra brýnni verkefna?

Er tiltrúin á úttektina sem gagnlegt mælitæki að minnka?

Ofmetnaður eða metnaðarleysi verða líka að teljast ódýrar skýringar – allavega verðum við ekki vör við það meðal okkar viðskiptavina. Internetið og vefurinn eru löngu orðin ómissandi þættir í daglegu lífi okkar Íslendinga og engri stofnun dettur lengur í hug að vera án sæmilegrar vefsíðu og halda úti lágmarks þjónustu á netinu. Framfarir eru líka slíkar allt um kring að það er erfitt að ofmetnast.

Þótt flestar stofnanir reyni að spara og skammti oft vefmálunum of lítinn pening, að okkar mati, þá verður fyrsti möguleikinn að teljast ólíklegur þar sem mesta þátttakan var einmitt árið 2011, stuttu eftir Hrun þegar niðurskurðurinn var hvað harðastur.

Auðvitað hefur peningaskortur og forgangsröðun vefmála áhrif á gengi stofnana í svona úttektum og skýrir mögulega hversu lítil bætingin er milli síðustu úttekta, en eru trauðla lykilskýringar á lækkandi svarhlutfalli.

Jafnframt ættu vefstjórar að geta fundið tíma í að svara spurningunum í úttektinni – jafnvel þótt önnur verkefni séu aðkallandi. Þátttakan er fremur einföld, og mjög rúmur tími gefinn. Þess utan ætti lág einkunn einmitt frekar að nýtast metnaðarfullum vefstjórum til að knýja fram meira fjármagn og breytta forgangsröðun innan sinna stofnana.

Það skilur eftir spurninguna um tiltrúna. Hvort þessi úttekt, sem hefur markvisst verið haldið lítið breyttri frá 2005, sé á einhvern hátt að verða úr sér gengin. Hvort hún sé að verða barn síns tíma, eða hafi einhverju leyti skilað hlutverki sínu. Hvort mögulega þurfi að stokka þetta upp og taka einhverja aðra nálgun – að öllu leyti eða að hluta.

Það er vitað að aðstandendur úttektarinnar munu leggjast yfir þessar spurningar á næstu misserum og leita svara. Nauðsynlegt er að spyrja þennan hóp sem hefur dregið úr þátttöku sinni, en einnig kanna afstöðu þeirra sem tóku þátt.

Við hjá Hugsmiðjunni veltum vöngum yfir þessu þessa dagana. Við erum full af hugmyndum varðandi framþróun HESIOV, og erum tilbúin að deila þeim ef þess er óskað.

P.S. við skrif þessarar færslu rákumst við á þessar glærur frá 2010, þar sem við rýndum í hvað vantaði í mælikvarðana og hverju væri e.t.v. ofaukið. Sumt hefur verið lagfært, en flestar vangavelturnar eiga jafn vel við í dag.

Eldri blogg um úttektina:

Hvað er spunnið í opinbera vefi 2015 (24. júlí 2015)

Hvað er spunnið í opinbera vefi 2013 (18. sept. 2013)

Um mat á aðgengileika opinberra veflausna 2011 (24 Jan 2012)

[hugsmidjan]

Leikandi, listrænir og léttfættir Hugsmiðjuliðar

Starfsfólk Hugsmiðjunnar [email protected]

Hvernig hljómar það að kíkja á spunasýningu, útitónleika, ljósmyndasýningu og allsherjar dansmaraþon og Karnival á Klapparstíg á Menningarnótt? Einstaklega vel í okkar eyrum! Nokkrir starfsmenn Hugsmiðjunnar ætla að leggja sitt af mörkum að gera Menningarnótt enn áhugaverðari og skemmtilegari.

Arnór Bogason, vefforritari og spunameistari mun taka þátt í spunamaraþoni í Þjóðleikhúskjallaranum frá kl 14:00-22:00. Arnór verður í sýningu sem hefst kl 16:30.

Hrafn Thoroddsen, vefforritari, aðgengishönnuður, gítarleikari og söngvari mun spila á Menningarnæturtónleikum X977 og Bar 11 með Ensími.

Jón Frímannsson, vefhönnuður og ljósmyndari mun sýna verk sín á ljósmyndasýningu Félags filmuljósmyndara á Íslandi á Fiskislóð.

Margeir Steinar Ingólfsson, ráðgjafi, stjórnarformaður og dj, auk Óttars Sæmundsen, ráðgjafa og bassaleikara koma fram á dulmögnuðu Karnivali á Klapparstíg. Hugsmiðjan stendur við bakið á þessum viðburði og skorum við á alla að kíkja á Karnivalið sem og hina viðburðina.

Auk þess ætlar Kristrún, textagerðarnörd að sprikla hálft maraþon í Reykjavíkurmaraþoni Íslandsbanka.

Getur ekki klikkað.

[hugsmidjan]

Hvað er spunnið í opinbera vefi 2015?

Starfsmenn Hugsmiðjunnar [email protected]

Nú á haustmánuðum fer fram úttekt Innanríkisráðuneytisins Hvað er spunnið í opinbera vefi 2015? Í ár verða 263 vefir ráðuneyta, stofnana og sveitarfélaga skoðaðir.

Í fyrsta sinn verður framkvæmd sérstök úttekt á öryggi vefjanna. Sú úttekt hófst í júlímánuði og verða vefirnir skannaðir með tólum sem koma auga á veikleika sem gætu leynst í öryggi þeirra.

Við hjá Hugsmiðjunni erum ánægð með þessa nýjung. Öryggi vefja viðskiptavina er okkur hugleikið og leggjum við áherslu á að Eplica kerfið sé traust og svari kröfum viðskiptavina okkar. Nýjasta útgáfan af Eplica hefur farið í gegnum lagfæringar á mörgum atriðum sem tengjast öryggismálum, auk þess hefur orðið bylting í rit- og myndvinnslu.

Sem fyrr verður gerð úttekt á innihaldi, nytsemi, aðgengi, þjónustu og lýðræðislegri þátttöku. Úttektin er ágætis áminning fyrir stofnanir og fyrirtæki að viðhalda vefjum sínum og uppfæra þá í takt við nýjustu strauma og stefnur í vefmálum.

Úttektin dregur upp góða mynd af stöðu rafrænnar þjónustu á Íslandi og sýnir glögglega hvar við stöndum hvað varðar virkni sem styður við rafrænt lýðræði á opinberum vefjum. Almennt hefur þróunin í þessum úttektum verið jákvæð, þó hafa vefir sveitarfélaganna rekið lestina í stigagjöf.

Niðurstöður úttektarinnar verða kynntar á UT deginum í nóvember. Við vonum því að allir séu að setja sig í stellingar fyrir haustið. Ekkert nema bjartsýni og tilhlökkun ríkir innan herbúða Hugsmiðjunnar fyrir komandi mánuðum. 

[hugsmidjan]

Íslenskir vefir skora hátt

Starfsmenn Hugsmiðjunnar [email protected]

Fyrr á þessu ári voru 238 evrópskir vefir kannaðir með tilliti til aðgengis fyrir fatlaða og voru þrír íslenskir vefir meðal 20 efstu. Vefur Tryggingastofnunar ríkisins var í fjórða sæti, Ísland.is í því sjötta og Samgöngustofa í því nítjánda. Við hjá Hugsmiðjunni erum afar stolt af því að vera samstarfsaðili allra þessara vefja.

Könnunin var unnin á vegum verkefnisins Evrópskt internet fyrir alla (EIII). Markmið EIII er að vefir og önnur stafræn þjónusta nái til allra Evrópubúa með því að ryðja úr vegi þeim hindrunum sem takmarkað aðgengi vefja veldur og bæta jafnframt notendaupplifun allra.

Samkvæmt könnun frá árinu 2013 á vegum framkvæmdastjórnar Evrópusambandsins uppfylla einungis um 10% af opinberum vefjum í Evrópu lágmarks aðgengiskröfur. 

Við höfum ekki sambærilegar mælingar fyrir Ísland, en vitum þó að hér er staðan mun betri, þökk sé framsýni íslenskra brautryðjenda og þeirrar áherslu sem lögð hefur verið á þessi mál undanfarin ár. Til dæmis hefur aðgengi fyrir fatlaða á opinberum vefjum verið metið reglulega síðan 2005 og aðgengisvottun ÖBÍ og Sjá ýtt undir sýnileika aðgengismála almennt.

Síðustu þrjú ár hefur verið sérstakur verðlaunaflokkur fyrir aðgengilegasta vefinn á Íslensku vefverðlaununum. Af þeim 15 sem tilnefndir hafa verið í þeim flokki eru 11 unnir af okkur hjá Hugsmiðjunni og verðlaunahafarnir öll 3 árin eru samstarfsaðilar okkar. 

[hugsmidjan]

Lagerinn, Nils og róbótinn Nína

Þórarinn Stefánsson [email protected]

Við höfum áður fjallað um API samskipti (sér í lagi vefþjónustur) á Hugsmiðjublogginu. Ein spurning sem við höfum þó ekki beinlínis svarað er hvað gerir API nálgun betri heldur en beintengingar kerfa.

Fyrir þá sem ekki þekkja hugtökin snýst API (application programming interface) um formleg samskipti kerfa, til dæmis vefverslunar og undirliggjandi vörukerfis. Vefþjónustur eru eitt afbrigði af API og snýst um að nota „tungumál vefsins“ til samskipta milli ólíkra kerfa.

En hvers vegna að flækja málin með API samskiptum þegar forritari væri miklu fljótari að skella saman kóða sem tengist beint inn í gagnagrunn vörukerfisins og sækir þau gögn sem þarf?

Mig langar að reyna að svara því með smá samlíkingu.

1. Lagerinn

Ímyndum okkur dæmigert fyrirtæki þar sem ýmsar nauðsynjavörur á borð við ritföng, verkfæri og öryggisbúnað starfsmanna eru geymdar í lagerherbergi. Til þess að allir starfsmenn finni það sem þá vantar eru allar hillur og hirslur vandlega merktar og mikil áhersla lögð á að öllu sé skilað á réttan stað.

Tveir starfsmenn eiga reyndar í leynilegu stríði um það hvort heftarar flokkist sem verkfæri eða ritföng. Annar færir heftarana í verkfærahilluna við hvert tækifæri og hinn færir þá aftur í ritfangahilluna.

Bókhaldari fyrirtækisins sér um að panta vörur eftir þörfum og starfsmenn skrifa í þar til gerða möppu hvað þeir sækja sér svo hann geti fylgst með birgðastöðunni. Bókhaldarinn er að vísu með sjaldgæfa útgáfu af lesblindu og þess vegna má bara skrifa í möppuna með bláum penna.

Þegar nýr starfsmaður tekur til starfa kennir yfirmaður viðkomandi á lagerinn; hvar varningur sem tengist hennar hlutverki er, hvernig á að skrifa í möppuna og hvern á að láta vita ef eitthvað vantar. Dag einn uppgötvar bókhaldarinn að hann les betur grænan texta heldur en bláan og þá er skellt upp útprentuðu A4 blaði: „Allar færslur í birgðamöppuna skal nú færa með grænum penna!!!“

Af tillitssemi við nýráðna dvergvaxna smiðinn eru nagla- og skrúfupakkarnir færðir úr efstu hillunni í þá neðstu og annað A4 blað bætist við: „Athugið að allar festingar (naglar og skrúfur) á að geyma neðstu hillu“.

Eina helgina tekur svo velviljaður skjalastjóri að sér (óumbeðið) að raða öllu í stafrófsröð og breyta hillumerkingum. Þegar kemur að tómum möppum getur hún ómögulega ákveðið hvort þær ættu að raðast undir „M“ (möppur) eða „B“ (bréfabindi) og gefst loks upp á verkefninu. Eftir það er varningi frá A-M raðað í stafrófsröð, en öllu öðru eftir gamla kerfinu.

2. Nils

Eftir sautjánda starfsmannafundinn í röð þar sem kvartað er yfir umgengni um lagerherbergið tekur framkvæmdastjórinn til sinna ráða. Sett er upp afgreiðsluborð framan við lagerinn og nýstúdentinn Nils fær það hlutverk að afgreiða lagervörur til starfsmanna.

Útbúið er einfalt eyðublað sem starfsmenn fylla út og rétta Nils. Hann skottast svo inn á lagerinn, sækir það sem um er beðið og skráir sjálfur í birgðabókhaldið. Milli erinda dundar Nils sér við að umraða á lagernum þannig að vörurnar sem oftast er beðið um séu geymdar næst dyrunum. Hann ræðir það hvorki við kóng, prest né skjalastjóra – heldur breytir bara jafnóðum.

Þegar bókhaldarinn gefst endanlega upp á möppunni með handskrifuðum færslum og fer yfir í voðalega fínt Excel skjal þarf engum að kenna á nýju skráninguna nema Nils.

3. Róbótinn Nína

Þegar Nils klárar svo hagfræðinámið í kvöldskóla þykir ekki annað boðlegt en að hækka hann í tign. Í hans stað kemur róbót af tegundinni Nina 9000.

Fyrir starfsmenn breytir þetta í raun engu. Þeir fylla út sama eyðublað og áður, rétta yfir sama afgreiðsluborðið og með vökvadrifnum tjakklyftum Nínu er hún tvöfalt fljótari að sækja skrúfupakka heldur en Nils.

Til að nýta betur fjárfestinguna er ákveðið að færa sjoppu starfsmannafélagsins líka undir yfirráð Nínu. Útbúið er nýtt eyðublað fyrir sjoppupantanir og Nína fer létt með að afgreiða gos og hraunbita gegn því að skanna starfsmannapassa viðkomandi.

4. Tæknitengingin

En hvernig tengist þessi hugljúfa saga upphaflegu spurningunni um kosti API viðmóts umfram reddingar: Hvers vegna að leggja vinnu í að útbúa vefþjónustu-API ofan á vörukerfi þegar forritari gæti alveg eins sótt gögnin beint í gagnagrunn kerfisins?

Auðvitað myndi enginn ráða lagerstjóra fyrir tveggja eða þriggja manna fyrirtæki. En eftir því sem starfsmönnum fjölgar og flækjustig fyrirtækisins eykst getur komið að því að sagan hér fyrir ofan eigi við. Á sama hátt er örugglega fljótlegt að forrita tímabundna reddingu en það er ekki endilega besta leiðin til lengri tíma litið.

Ef áðurnefnd vefverslunin er þjónustuð af utanaðkomandi aðilum þarf að opna aðgang viðkomandi að gagnagrunninum, kenna þeim á uppbyggingu hans og láta vita af öllum breytingum. Ef eitthvað breytist í gagnagrunninum; til dæmis nöfn á gagnatöflum eða ef skipt er úr einu gagnagrunnskerfi í annað, þarf að fara yfir allan þann kóða sem grunninum tengist og uppfæra hann eftir þörfum.

Vel útfært API-viðmót er sambærilegt við eyðublöðin hans Nils; svo lengi sem þau eru óbreytt skiptir engu hver tekur við þeim né hvernig vörum er raunverulega raðað í hillurnar.

Í nútíma kerfishönnun er það lykilatriði að halda skýrum skilum milli kerfishluta, þannig að það hafi ekki áhrif á allt kerfið (og ytri tengingar) ef í ljós kemur að betra væri að geyma nagla og skrúfur í neðstu hillunni.

[hugsmidjan]

Spennandi tímar hjá SVEF

Starfsmenn Hugsmiðjunnar [email protected]

Aðalfundur Samtaka vefiðnaðarins var haldinn síðastliðinn miðvikudag þann 27.maí. Á fundinum var í stuttu máli farið yfir stefnumótun og ákveðið að auglýsa eftir framkvæmdastjóra í 50% starf eins fljótt og auðið er. Einnig var ákveðið að gera þyrfti meira í því að opna samtökin betur og hafa fleiri viðburði. Talað var um að SVEF ætti að vera „viðburðamaskína“ fyrir fólkið í bransanum. Það er því óhætt að segja að það sé spennandi ár framundan hjá SVEF.

Einnig var kosið í stjórn. Markús M. Þorgeirsson tók við formannsembætti af Rósu Stefánsdóttur. Þeir sem sitja áfram til eins árs eru Ólafur Sverrir Kjartansson, Tinni Sveinsson og Ragnheiður H. Magnúsdóttir. Þeir sem voru kjörnir nýir inn til 2 ára eru Jonathan Gerlach, Benedikt D. Valdez Stefánsson og Örvar Halldórsson.

Eftir aðalfundinn voru þrír fyrirlestrar þar sem fjallað var um stöðu vefverslunar á Íslandi og gátu bjórþyrstir Svef-arar fengið sér nokkra kalda á meðan. Fyrirlesarar bjórkvöldsins komu frá Póstinum, Heimkaup og skór.is.

Einar Geir Jónsson, forstöðumaður þróunar hjá Póstinum fjallaði um stöðu og horfur í vefverslun á Íslandi. Einar fór ofan í töluleg gögn og sýndi fram á að vefverslun á Íslandi væri komin mun skemmra á veg en í löndunum í kring þrátt fyrir að netnotkun sé almennt mikil á Íslandi. Um 79% af þeim Íslendingum sem versla á netinu a.m.k. einu sinni á ári, versla erlendis. Gríðarlega mikil verslun fer því beint til útlanda í stað þess að versla við íslenskar vefverslanir og taldi hann að auka þyrfti traust almennings á íslenskum vefverslunum.

Einar kynnti einnig nokkrar nýjar leiðir í heimsendingu sem Pósturinn er að fara í til að bæta þjónustu sína. Auk þess er ætlunin að einfalda verðskrá fyrir póstsendingar töluvert. Loks sagði Einar frá því að stofnun samtaka íslenskra vefverslanna sé í startholunum. Mjög áhugavert verður að fylgjast með þeirri þróun.

Frá Heimkaup kom Guðmundur Magnason framkvæmdastjóri, með vangaveltur um það hvers vegna Íslendingar versla svo lítið á netinu. Heimkaup er stærsta íslenska vefverslunin en er í þriðja sæti yfir stærstu vefverslanir á Íslandi, á eftir Ali Express og Amazon.

Samkvæmt heimildum Guðmundar eru Íslendingar eina þjóðin í Evrópu sem verslar meira af erlendum netverslunum heldur en innlendum. Það sem skiptir höfuðmáli í þessu samhengi að sögn Guðmundar er góð þjónusta, gott vöruúrval og gott verð. Kenning hans var sú að íslenskar vefverslanir séu hreinlega ekki að bjóða upp á alla þessa þætti.

Pétur Þór Halldórsson, forstjóri skór.is tók undir orð Guðmundar að verð og vöruúrval séu aðaltriðin en einnig að vefirnir njóti trausts meðal fólks. Vefverslunin skór.is leggur mikið upp úr því að bjóða góða þjónustu, að taka öll símtöl strax og svara viðskiptavinum strax á Facebook og í tölvupósti.

Mikið var um spurningar á viðburðinum og mikill áhugi fyrir efninu. Það sem kom hvað mest á óvart meðal fólks var hve lítil áhersla væri á notendaupplifun hjá þessum tveimur stærstu vefverslunarvefjum. Guðmundur og Pétur Þór voru nánast sammála um það að notendaupplifun sé ekki atriði sem skiptir máli og hefur því ekki farið í forgang á vefjum þeirra. Þeir töldu að það skipti í raun engu máli hve flottir vefirnir væru þegar verð og vöruúrval vefverslana er almennt ekki í lagi.

[hugsmidjan]

„Hefði átt að gúggla betur, gerði það ekki“

Starfsmenn Hugsmiðjunnar [email protected]

Miðvikudaginn 20.maí fór fram áhugaverður hádegisfundur um markaðssetningu á netinu á vegum Ský sem bar skemmtilegu yfirskriftina „Ég hefði átt að gúggla betur, gerði það ekki.“

Atli Fannar Bjarkason, ritstjóri Nútímans var fyrstur með erindi um markaðssetningu á netinu. Hann fjallaði um ummæli Sveinbjargar Birnu Sveinbjörnsdóttur við Kastljósið, en flestir muna eftir poppsmellinum sem hann lét búa til úr þeim. Það sem Atli Fannar gerði var að hann stökk á augnablikið og með hjálp samfélagsmiðla fékk myndbandið gríðarlega útbreiðslu og umtal.

Atli Fannar velti því einnig upp hvers vegna fleiri fyrirtæki væru ekki að nýta sér málefni líðandi stundar til þess að vera sýnilegri og skapa sér rödd á einfaldan og oft á tíðum ódýran hátt. Að sögn Atla Fannars sýndi þetta stutta myndband vel hvernig miðill Nútíminn vill vera. Miðill sem skapar sér tækifæri úr atvikum líðandi stundar með því að hafa kjark til að hugsa út fyrir kassann og fjalla um hefðbundnar fréttir á skemmtilegri hátt en við erum vön frá hefðbundari fréttamiðlum. Atli Fannar sagði einnig frá því hvernig hann notar samfélagsmiðla á mjög árangursríkan hátt til að dreifa innihaldi Nútímans.

„Það brýtur náttúrulega ekki allt internetið en þú vinnur ekki í lottó án þess að vera með.“

Andri Már Kristinsson frá Landsbankanum var næstur með erindi um notkun samfélagsmiðla í markaðsstarfi. Þegar kemur að markaðsefni á samfélagsmiðlum þarf að hugsa um hvernig efni nær til fólks. Það er undantekningalaust efni sem vekur upp tilfinningar hjá fólki, býr yfir sjónrænni framsetningu, er stutt, hnitmiðað og hægt að skoða í síma jafnt og í tölvunni. Andri sýndi einnig áhugaverðar tölur um að Snapchat sé orðinn næststærsti samfélagsmiðillinn á Íslandi skv. Gallup.

Bjarki Pétursson frá Zenter steig einnig á stokk og fjallaði um email marketing. Nýjar kannanir sýna að email marketing sé enn árangursríkt markaðstæki. Hæfileg tíðni tölvupósta, ávinningur, markhópagreining og viðeigandi skilaboð eru þeir þættir sem skipta máli og byggja upp traust meðal viðskiptavina að mati Bjarka. 

Loks var okkar eigin Snorri Páll með erindi um tilgang tölfræðinnar og bauð upp á léttar æfingar fyrir hugann. Samkvæmt Snorra er fyrsti vísir að lykiltölum vefsins sá að taka saman lista yfir allar aðgerðir eða verkefni sem notandi þarf að geta leyst á vefnum og merkja við þau atriði sem hjálpa við að taka ákvarðanir í rekstri. Snorri talaði einnig um mikilvægi gagnrýnnar og greinandi hugsunar í að túlka göng. 

Hann Snorri Páll verður með námskeið í Vefakademíunni næstu tvo fimmtudaga, 28.maí og 4.júní um hvernig á að nýta Google Analytics og læra að lesa í gögnin á bak við vefinn. Við hvetjum sem flesta til að kynna sér það.

Að lokum sendum við ykkur sólríkar kveðjur og vonum að sem flestir séu að hjóla í góða veðrinu. Er ekki alveg að koma sumar?

[hugsmidjan]

Hjólaóðir fjandar

Starfsmenn Hugsmiðjunnar [email protected]

Á morgun hefst átakið hjólað í vinnuna og starfsfólk Hugsmiðjunnar ætlar að sjálfsögðu að taka þátt.  

Hjólaáhugi Hugsmiðjufólks er mikill og höfum við haft þann háttinn á síðustu ár að fá hjólaviðgerðarmann á hverju vori til að standsetja hjól starfsmanna eftir veturinn og segja má að við séum því til í slaginn. Hugsmiðjuhjólið er líka á sínum stað fyrir þá sem eru ekki með hjólið sitt með sér en þurfa að komast stutta vegalengd á fund. 

Sturtuvandræði þekkjast ekki hér því við erum svo heppin að hafa sundlaug í garðinum, Sundhöll Reykjavíkur, og nokkur sundmiðakort til á staðnum ef fólk vill skella sér í pottinn eftir góðan hjólatúr. Sundfundir eru líka ljómandi skemmtilegir ef fólk vill rabba saman í öðru umhverfi en vant er.

Við hvetjum sem flesta að taka þátt í þessu með okkur því að sagt er að ráðlagður dagskammtur hreyfingar sé 30 mínútur og bara alls ekkert vitlaust að fá þá hreyfingu með því að hjóla eða ganga í og úr vinnu.

VIð trúum því að auknar hjólreiðar geri samfélagið okkar skemmtilegra, rólegra og barnvænna.

Að lokum. Það er alveg með ólíkindum hvað maður kemst langt á hjóli á korteri.

[hugsmidjan]

Fyrsta sinnar tegundar á Íslandi

Starfsmenn Hugsmiðjunnar [email protected]

Þá er loksins komið að því! Bókin um vefinn er komin í verslanir. Af því tilefni verður slegið upp í útgáfuhóf í Eymundsson Skólavörðustíg á fimmtudaginn þann 19.mars kl 17:00.

Þessi bók er fyrsta sinnar tegundar á Íslandi. Aldrei áður hefur verið tekin saman svo greinargóð lýsing á vefstjórn og starfi vefstjórans.

Bókin um vefinn

Bókin um vefinn er hugsuð sem handbók fyrir þá sem starfa við vefstjórn, bæði reynda vefstjóra sem og nýliða í vefumsjón. Raunin hefur verið sú að vefstjórar hafa setið á hliðarlínunni þegar kemur að fræðslu í vefgeiranum, jafnt hérlendis sem erlendis. Þörfin fyrir fræðslu er því mikil þar sem vefstjórnendur fá yfirleitt vefi í hendurnar án nauðsynlegrar þjálfunar og fræðslu.

Sigurjón Ólafsson, höfundur bókarinnar, er eldri en tvævetur þegar kemur að vefmálum. Hann hefur unnið við vefstjórn frá árinu 1997, kennir við Háskóla Íslands og rekur eigin vefráðgjöf, Fúnksjón þar sem hann miðlar einnig fróðleik um vefmál. 

Hugsmiðjan hefur lengi haft áhuga á því að aðstoða við að mennta betur fólkið sem sér um vefstjórn því starf vefstjóra verður sífellt umfangsmeira og flóknara. Þegar Sigurjón nálgaðist okkur í Hugsmiðjunni með þessa bók í huga, tókum við hugmyndinni fagnandi og gerðum það sem við gátum til þess að styðja við gerð hennar.

Hugsmiðjan hefur verið í samstarfi með Sigurjóni frá haustinu 2013 þegar við settum á laggirnar Vefakademíuna. Markmið hennar er að bjóða upp á fjölbreytt námskeið sem fræða vefstjóra og aðra sem koma að vefmálum. Sigurjón hefur kennt fjölmörg af þessum námskeiðum og hafa þátttakendur verið ánægðir með þá þekkingu og reynslu sem hann hefur miðlað.

Við hvetjum að sjálfsögðu sem flesta til mæta á fimmtudaginn og fagna þessum áfanga með Sigurjóni.

[hugsmidjan]

Arnór til liðs við Hugsmiðjuna

Starfsmenn Hugsmiðjunnar [email protected]

Það er okkur sérstök ánægja að kynna til leiks nýjasta liðsmann Hugsmiðjunnar, Arnór Bogason. Arnór er svokallaður einhyrningur en hann er þessi sjaldgæfa og skemmtilega blanda af grafískum hönnuði og forritara.

Arnór er útskrifaður grafískur hönnuður frá Listaháskóla Íslands og er langt kominn með BSc gráðu í tölvunarfræði frá Háskólanum í Reykjavík. Hann byrjaði hér sem sumarstarfsmaður og kemur til með að starfa hjá okkur sem vefari.

Það er mikill fengur að fá Arnór í hópinn og bjóðum við hann hjartanlega velkominn!

[hugsmidjan]

Sérhæfir sig í skrifum fyrir vefinn

Starfsmenn Hugsmiðjunnar [email protected]

Þetta er hún Kristrún, hún er í starfsnámi hjá okkur í Hugsmiðjunni í tengslum við lokaritgerðina sína í meistaranámi í Hagnýtri ritstjórn og útgáfu við Háskóla Íslands. Hún ætlar í ritgerð sinni að fjalla um efnisstefnu (e. Content strategy) og efnismarkaðssetningu á vef og þá þróun og vakningu sem hefur orðið innan vefgeirans í þeim málum.

Hún er fyrsti starfsneminn sem kemur til okkar í tengslum við textagerð og skrif á vefinn og hefur hún m.a. verið að rýna í vefi viðskiptavina Hugsmiðjunnar. Hún er jafnframt sú fyrsta sem ákveður að sækja um starfsnámsstöðu hjá veffyrirtæki í sínu námi og tökum við því fagnandi. 

Við trúum því að ekki sé hægt að gera almennilegan og aðgengilegan vef nema að efnið á honum sé algjörlega í lagi. 

Kristrún er búin að koma sér vel fyrir og ætlar að vera hjá okkur í nokkrar vikur í viðbót. Hún hefur sjarmerað okkur algjörlega upp úr skónum og það er heldur betur lærdómsfullt fyrir okkur hin að hafa svona "efnisnörd" til taks.