Xa podedes inscribirvos no que presumiblemente será o último rastrexo da tempada, o I Rastrexo IES María Soliño de Cangas. Celebrarase o vindeiro 5 de novembro a partir das 21:00 h. Para apuntarvos, deberedes premer aquí e cubrir a inscrición. Animádevos e participade!
[+INFO: I Rastrexo IES María Soliño]
O Concello de Mondariz organiza para o vindeiro sábado 10 de setembro, unha proba de orientación nocturna na marabillosa contorna do río Tea, na que os participantes deberán percorrer unha distancia variable e tentar localizar, coa única axuda dun mapa, unha serie de puntos nun tempo determinado. Ademais terán que superar unha serie de probas variadas tentando acumular o maior número de puntos posibles, sempre co obxectivo principal de gozar da natureza á vez que se fai deporte.
A participación no Orienta-Tea será por equipos, que se deberán inscribir previamente desde o 17 de agosto ata o 8 de setembro. Os equipos estarán formados por un mínimo de 2 persoas ata un máximo de 5. O evento, debido ao seu carácter nocturno e a esixencia dalgunhas probas, non é apto para menores de 13 anos. O custo da inscrición é de 8,00 euros por persoa.
Os equipos participantes deberán presentarse o día da proba na Praia Fluvial do Val, en Mondariz, ás 20:30 horas.
A Asociación de Veciños A Lavandeira, de Rebordáns (Tui), organiza a Andaina Nocturna da Santa Compaña para o venres 2 de setembro. A saída será ás 22:00 horas do Parque do Montiño en Rebordáns. Constará de cinco quilómetros de percorrido con dificultade baixa e con sorpresas polo camiño. Ao remate haberá chocolate con rosca e queimada para os participantes. A inscrición ten un prezo de 6 € por persoa e os nenos de ata 12 anos poden asistir de forma gratuíta, acompañados dun adulto. Os interesados, podédesvos anotar ata o 1 de setembro nos seguintes tfnos.: 660 682 365 - 676 538 772 – 655 666 062.
II Andaina Terrorífica de S. Mateo “O Circo do Terror”
II Andaina Terrorífica que terá lugar o vindeiro sábado 20 de agosto na parroquia de San Mateo de Oliveira, no concello de Ponteareas. Arrincará desde o Centro Cultural de San Mateo a partir das 22:00 horas e constará de 7 quilómetros de percorrido, con xogos aterradores non competitivos. Ao remate da mesma haberá sorteos entre todos os participantes.
O prezo da inscrición é de 3 e 5 euros para nenos ata 10 anos e adultos, respectivamente. 1 euro irá destinado á Asociación de nenos e nenas con diabetes de Galicia (ANEDIA).
Máis información e reserva de praza vía whatsapp no tfno. 676 882 393 ou a través do seu perfil de Facebook Andaina San Mateo.
San Pedro de Batalláns acollerá o vindeiro 15 de agosto o seu primeiro rastrexo infantil
O Rastrexo San Pedro organiza o vindeiro luns, día 15 de agosto, a partir das 17:30 horas, o 1º rastrexo infantil "A loita non é para os covardes". O percorrido polos montes da parroquia será de aproximadamente cinco quilómetros e poderán participar nenos de 6 a 15 anos en grupos de entre 5 e 10 persoas, entre os que debe haber dous adultos. As inscricións xa están abertas, podendo anotarse a través do enderezo electrónico [email protected] ou ben a través de whatsapp no número 680 934 513. O prezo da inscrición é de 2 euros por nenx.
A Comparsa Cicklón organiza o sábado 27 de agosto a súa terceira andaina 'Noche del Terror'. Partirá desde a explanada do Restaurante Eiras, no Rosal, a partir das 22:00 horas, facendo un percorrido polos camiños máis inhóspitos da parroquia, que estarán repletos de sorpresas relativas á temática. “Unha nova ruta que vos levará ao máis profundo das tebras”, segundo indican os organizadores.
O prezo para participar é de 5 € por persoa (inclúe chocolate e rosca). Só se necesita roupa cómoda, unha lanterna e ganas de pasalo ben. O evento é apto para todos os públicos.
Máis información e reserva de praza nos tfnos. 617 867 797 - 647 229 975 ou na páxina de Facebook Comparsa Ciklón.
A localidade ourensá de Arcucelos, en Laza, acolle o vindeiro sábado, día 20 de agosto, a celebración da terceira edición do 'Arcucelos Fantasma'.
O evento comeza ás 23:00 horas e, no seu transcurso, os asistentes participarán nun percorrido guiado por tres rúas deshabitadas do pobo nas que se recrean escenarios de diferentes películas de terror. É recomendable acudir en grupo e presentarse algún tempo antes da apertura para sacarlle o máximo partido á experiencia. A entrada custa 3 €.
A iniciativa está organizada pola Asociación Arcucelos Fantasma e no seu desenvolvemento participan activamente ao redor de 70 persoas.
Que recordos nos trae a humilde lanterna de petaca, esa que reinaba por enriba de todas ata hai pouco tempo. Gustaríanos recuperar a esencia de antano e para iso propoñémosvos un reto: seriades capaces de participar nalgún rastrexo utilizando unha destas lanternas? Demostrade que sodes rastrexadores de cepa e non necesitades da tecnoloxía led para estar á altura.
Hola buenas, queria saber si este año no hacen el rastrexo de Fozara? Gracias
É unha verdadeira incógnita! A estas alturas ninguénse pronunciou ao respecto e todo fai indicar que probablemente non se celebre,pero… tampouco o descartamos. En Fozara todo pode pasar, e nos próximos díassairemos definitivamente de dúbidas. Esperamos que nos sorprendan!
DEFINITIVAMENTE, ESTE ANO 2016 QUEDARÉMONOS SEN RASTREXO DE FOZARA [Confirmado o 25 de xullo]
O I Rastrexo de Vigo “Os Superheroes”, celebrado o pasado 28 de maio na zona de Cabral, foi unha auténtica decepción, non chegou nin sequera a rozar as expectativas que se xeraron entorno ao mesmo.
Aqueles que non participastes, non vos deixedes enganar polas fabulosas fotos que poden verse na súa páxina de Faceboook. Aí todo o mérito é dos participantes, que se curraron uns disfraces de infarto, todo o contrario que os membros da organización, que non se curraron nada. Se cadra si, unha promoción moi coidada e rechamante, un cebo que nos atrapou a todos. Se alguén pensa que con algo bo tivemos que quedarnos, xa lles digo que con pouca cousa. Os únicos beneficiarios aquí foron os artífices que deron forma a esta lucrativa maquinaria. Todos os demais somos os prexudicados. Se o único propósito deste rastrexo era facer unha boa caixa, conseguiron sobradamente o desexado. Iso si, sempre e cando unicamente houbese este propósito, descartando calquera outro posible. Porque se había certa intención de ofrecer un bo entretemento ao público, aínda que fose un pouco, quedáronse lonxe. Moi lonxe. Conseguiron manter en suspenso este feto ata que nos demos conta da tónica que ía manter despois de varias probas. Que digo varias, despois da primeira. E se había algún iluso dentro desta maquinaria de billetes que pensaba que este rastrexo podería impresionar a alguén, os seus prognósticos fracasaron estrepitosamente. O que prometía ser o evento do ano, con permiso dalgúns, non fixo máis que acentuar o declive dos rastrexos. Si, o declive, estamos a sacrificar a calidade pola cantidade e iso non trae nada bo, á vista está.
Durante o percorrido non vimos nada novo, salvo unha especie de dobre circuíto que non merece a pena explicar. Na saída, unha heroína que deduzo quería parecerse a Catwoman dicíanos -Esto no es lo que parece-, e tanto que non, nunca unha frase tan curta foi tan reveladora. Probas insulsas e pouco participativas. Refritos doutros refritos. Queredes exemplos? Buscar a parella dun calcetín entre un monte miúdo de calcetíns. Só un pode facelo mentres o resto mira. Pero isto que é? Esquivar unha fila de conos zigzagueando cunha carretilla e transportando a un compañeiro. Vaia despregamento! Unha sopa de letras de superheroes. Impresionante malgaste de orixinalidade! E así unha tras outra ata oito. Sen desafíos, sen ambientación, sen lugares singulares, con que nos quedamos? Coa temática? Pois tampouco. Os auténticos e únicos superheroes de verdade que apreciamos foron os participantes, que ademais de ir perfectamente caracterizados aguantaron estoicamente ata o final, dando a nota de cor.
En definitiva, se existise un manual de como organizar un rastrexo, creo que non o lerían, pisaríano. Fomos testemuñas dunha humillante velada. Vendéronnos un produto mediocre como caviar de primeira categoría. E o peor de todo é que deixaron aos rastrexos polo chan. Que pensarán aqueles que participaron por primeira vez? Aos que non tiñan referencias, igual púidolles parecer aceptable, que o dubido, pero aqueles que xa sabían algo, vendo isto crerán que os rastrexos estaban moi sobrevalorados, e en parte poderán ter razón, pero o certo é que aínda quedan algúns bos de verdade, de seguir así cada vez menos. Está claro que deste rastrexo non nos levamos nin unha triste imaxe que poida perdurar na nosa memoria. Nin unha acción que nos puidera emocionar un pouco. Quedámonos unicamente coa cordialidade e o bo rolo dos voluntarios que presentaban as probas, só faltaría que fosen uns ogros! Organizadores e demais familia deste despropósito, se creedes que o fixestes ben pensade: se isto é todo o que puido ofrecer o I Rastrexo de Vigo, que nos pode ofrecer calquera outro rastrexo?
Espero que pronto se volva a recuperar a verdadeira esencia de antano, cando por unha inscrición simbólica pasábalo de medo, con decenas de figurantes, probas variadas e infinidade de sorpresas. Desde Rastrexo A Fondo propoñemos que as inscricións se abonen ao finalizar o rastrexo, así desa forma soamente aventuraranse a organizar aqueles que teñan a vontade de ofrecer un entretemento á altura do que cabe esperar. Xa sei que ninguén o fará, pero aí queda iso.
Carreiras de obstáculos, a moda que percorre España e agora Galicia
Son a nova moda no mundo do deporte. Cun carácter lúdico-competitivo, as carreiras de obstáculos esténdense rapidamente pola xeografía española chegando, como non podía ser doutra forma, tamén a Galicia.
Correr ata a extenuación, brincar entre as pedras, subir muros e escaleiras, meterse en estanques de auga xeada, cargar con sacos de area, arrastrarse baixo aramados e chegar á meta con lama ata nas orellas. Son as carreiras de obstáculos. Unha moda que se estende por España á velocidade da luz. Hainas de produción nacional: Eternal Running, Bestial Race, Farinato Race, etc, e importadas, como a famosa Spartan Race ou a máis recente The Mud Day. Na nosa terra existen varias, sendo a Gladiator Race a máis coñecida. Todas teñen en común un carácter lúdico-competitivo. Algúns participantes prepáranse para gañar, mesmo para competir fóra das nosas fronteiras, pero a maioría cólgase o dorsal para pasar un bo momento.
Son carreiras que adoitan realizarse en zonas de campo, en plena natureza. Contan con distancias de entre 5 e 20 quilómetros ás que hai que engadir os numerosos obstáculos dispostos ao longo do percorrido, entre 15 e 30. O obxectivo destas novas competicións é crear un ambiente salvaxe, onde se pon a proba a resistencia, a fortaleza e a coraxe. O importante non é tanto o tempo que se realice, se non o reto persoal por superala e a diversión. Nalgúns casos, como na Mud Day, o formato de participación xeral é por equipos de 4 corredores. En resumo, é toda unha aventura que está a enganchar a miles de mozos e non tan mozos dispostos a desprazarse longas distancias para participar nalgún destes eventos.
Apetécevos pasar unha xornada levantando pedras, arrastrando rodas e chapoteando nun lamazal? Pois que saibades que nos próximos meses Galicia acollerá varias carreiras deste estilo, as cales vos mostramos a continuación:
Gladiator Race Pontevedra. O 4 de xuño, por segundo ano consecutivo, volverá á cidade do Lérez para facer gozar a todos os gladiators dos diferentes obstáculos e dificultades que terán preparados. Poderedes escoller entre varios niveis de dificultade adaptados á forma física de cada un.
Gladiator Rocket: é o nivel 1, conta con 6 km e 21 obstáculos cheos de emoción, adaptado a aquelas persoas con nivel físico básico.
Gladiator Warrior: este nivel 2 conta con máis de 11 km e supera os 30 obstáculos, con barreiras que poñerán a proba a vosa capacidade física e mental.
Gladiator Kids: ideal para gozar en familia dunha proba de obstáculos. Realizaranse percorridos entre 500 m e 1 km onde os nenos terán que ir acompañados dun pai, nai ou titor e superar cada un dos obstáculos que se atopen.
Se vos atrevedes, podedes inscribirvos ata o 30 de maio premendo aquí. Os prezos a estas alturas son un pouco elevados, oscilan entre os 15 e 39 euros.
Grand Prix Race Edition. O concello de A Veiga, na provincia de Ourense, será escenario os vindeiros 24 e 25 de xuño dunha proba onde deporte, diversión e traballo en equipo é a filosofía desta competición, inspirada no espírito do popular programa de televisión dos anos 90 e coa que se busca premiar á localidade "máis en forma" de España. A proba consiste nun circuíto de seis quilómetros no que se intercalan diferentes obstáculos naturais e artificiais, ademais de probas de equilibrio, habilidade e axilidade mental que os participantes deberán resolver contra-reloxo e coa axuda dos demais compañeiros de competición.
Para participar no Grand Prix é necesario formar un equipo mixto de entre 6 e 12 integrantes, que representará ao lugar de residencia da maioría deles, desde un barrio ou parroquia ata unha gran cidade, decidindo cada equipo a demarcación xeográfica que quere defender.
O Grand Prix celebrará o 24 de xuño a proba dos participantes menores de 18 anos, na que poderán participar nenas e nenos de 8 a 12 anos na categoría Junior e de 13 a 17 anos na modalidade Promesas. Nestes casos, os equipos poderán estar formados por entre 4 e 8 integrantes, que se enfrontarán a un circuíto máis curto e adaptado ás súas condicións. A proba de adultos terá lugar o sábado, 25 de xuño.
As inscricións poden formalizarse na web do evento, www.elgrandprix.es, estando limitada a participación a 100 equipos na versión adulta.
Samurai Xtreme Race. Celebrarase o sábado 2 de xullo no Lago de As Pontes, situado na localidade coruñesa de As Pontes de García Rodríguez. Esta proba desafía aos participantes á conquista de obstáculos extremos e terreo duro, sendo unha carreira de 7 km de distancia coa saída e a meta situadas na praia do mesmo lago. Os obstáculos repartiranse por todo o percorrido cunha separación máxima entre eles de 500 metros. A carreira partirá desde o sur da praia do Lago, pasará por terreos cedidos por Endesa ao Concello e penetrará na zona propiedade de Endesa. Todo o percorrido discorrerá por unha contorna natural con vistas espectaculares ao Lago das Pontes. Na Samurai Xtreme Race tamén hai sitio para os máis pequenos, os nenos de 4 a 13 anos poderán gozar ao mesmo tempo que melloran a súa actividade física da Samurai Junior Race, que se desenvolverá nas zonas verdes á beira da praia do lago.
O prezo da inscrición varía á alza a medida que se achega o día da carreira. Ata o 31 de maio poderedes inscribirvos a partir de 35 €. (Premede aquí)
Heroican Race. “Esta é esa aventura que estabades a buscar, un percorrido cheo de desafíos que poñerá a proba o voso valor. Poida que a xente non comprenda por que o facedes. Só os Heroes ou Heroínas entenderano. Non volo pensedes máis? ACUDIDE Á CHAMADA!” Así é como presentan esta carreira, que se celebrará en Ribadeo, Lugo, o sábado 3 de setembro e onde os participantes terán que completar un percorrido de 8 km e 30 obstáculos, que poñerán ao límite a súa pericia, a súa destreza e o seu valor. Incluída na OCR Teams League 2016 sendo puntuable para o Campionato de España por equipos.
Se queredes participar, ata o 30 de xuño poderedes inscribirvos a partir de 30 €. (Premede aquí)
Desafío Boot Camp Vigo. A praia de Samil acollerá o 1 de outubro e por segunda vez, esta carreira de obstáculos que tivo na súa estrea en Vigo máis dun milleiro de participantes, e que nesta edición é clasificatoria para o Campionato de Europa de Obstáculos. A proba, que se desenvolverá nas categorías Xtreme e Race, destaca pola combinación das superficies de praia, asfalto e monte nun mesmo percorrido e por desenvolverse en “lugares exquisitos” para visitar, ademais de incluír unha coidada selección dos obstáculos, mantendo o efecto sorpresa no corredor. O circuíto constará de 8 km e 26 obstáculos. Tamén haberá un Desafío Boot Camp Kids, pensado nos máis pequenos, para que compartan a experiencia dos maiores e demostren que hai un gran futuro neles.
As inscricións pódense facer en www.desafiobootcamp.com e en www.championchipnorte.com. Ata o 6 de xuño poderedes inscribirvos a partir de 24 ou 28 euros segundo a categoría que escollades.
Lembrade que o importante é divertirse e compartir a experiencia con amigos ou compañeiros de aventura. Animádesvos?
Este domingo 29 de maio celébrase a I Carreira pola Integración en Vigo. Será na contorna do Club Náutico de Vigo e trátase dunha carreira pensada para todas as idades e para gozala dunha maneira lúdica. Consistirá nun circuíto urbano de 2,5 km onde teredes que superar numerosos obstáculos como unha montaña de pneumáticos, piscina de escuma, guerra de cores, labirinto de cordas, balóns de humor amarelo, camiñar a cegas, corpo a terra… haberá ademais unha zona musical e xogos de colaboración.
En paralelo á carreira poderedes gozar dunha xincana deportiva, do photocall interactivo con redes sociais, talleres e xogos de sensibilización, muro dos desexos, animación musical, pintacaras… e descubrir a Feira da Solidariedade, un espazo con varias casetas de diferentes entidades sociais que conforman o Proxecto ENKI onde se dá a coñecer o seu traballo, os colectivos que presentan e o importante labor que realizan diariamente. Estará dispoñible de 11 a 14 horas.
29 de maio | de 10 a 14 horas
Inscrición: 7€ adultos / 5€ persoas con diversidade funcional e menores de 10 anos. Á venda en Ataquilla ou de maneira presencial na sede de Afundacion en Vigo
Coa chegada do verán, os montes ferven de actividade durante as “cálidas” noites ó acoller infinidade de rastrexos. Xuño ofrécenos nin máis nin menos que sete eventos ben espallados pola nosa xeografía, dos que algúns xa esgotaron as súas prazas mentres que outros aínda manteñen aberta a inscrición. Imos repasalos!
O primeiro sábado do mes celébrase o II Rastrexo de Piñeiro, o cal estará ambientado na película “Divergente”, un mundo futurista onde a sociedade está dividida en diferentes faccións baseadas nas virtudes humanas. Podedes inscribirvos ata o 20 de maio a través do correo [email protected] indicando o nome do equipo, nº de participantes, nome do capitán, ademais dun tfno. e enderezo electrónico de contacto.
O venres 10, avalado polo éxito obtido o ano pasado, chega a 19ª edición do rastrexo máis lonxevo de todos, o Rastrexo de Xinzo. Se queredes participar só tedes que inscribirvos enviando un correo a [email protected] indicando o nome do equipo, nome completo do representante, xunto cun tfno. e enderezo electrónico de contacto.
O sábado 11 a cita é en Mosende, para gozar do II Rastrexo da Costeira. Polo que se pode apreciar no cartel, os Xogos Olímpicos serán a temática imperante. Inscrición a través do correo [email protected] ou [email protected]. Tamén a podedes facer de forma presencial no bar da comisión de festas de venres a domingo en horario de 19:30 a 1:00 h.
Para o terceiro finde do mes, o do sábado 18, a oferta duplícase:
Por unha banda, en Tui nace un novo rastrexo que pretenderá ofrecer unha aventura ao estilo Indiana Jones. Trátase do I Rastrexo de Paramos, ao que podedes inscribirvos a través do correo [email protected] indicando o nome do equipo e do capitán, número de participantes e un tfno. de contacto.
Doutra banda, Couso celebra o seu segundo rastrexo do ano. Inscrición a través do correo [email protected] indicando o nome do equipo, nº de compoñentes e tfno. de contacto.
Para rematar, só nos quedan por mencionar os dous rastrexos que poñerán a guinda final a este mes de xuño e que contan coa inscrición pechada. Son o I Rastrexo de Viladesuso e o IV Rastrexo de S. Pedro de Batalláns, que se celebrarán o venres 24 e o sábado 25, respectivamente.
Para coñecer máis detalles destes e doutros rastrexos, visitade o noso CALENDARIO 2016.
Tui sufrirá unha auténtica mutación ás 23:00 horas do sábado 3 de setembro. As rúas e prazas da localidade serán tomadas por hordas de mortos viventes na que será a segunda Survival Zombie de Galicia, a primeira celebrouse o pasado 21 de novembro en Sada, un evento que ata o de agora percorreu máis de corenta pobos e cidades e que será unha cita obrigada para os amantes dun fenómeno alimentando por series como The Walking Dead.
Este acontecemento consistirá nunha xincana que se desenvolverá durante oito horas, desde as once da noite ata as sete da mañá, na que os participantes deberán recoller pistas e superar diferentes probas que os acheguen ao obxectivo final e, sobre todo, tentar sobrevivir mentres os zombis tratan de atrapalos. Se isto ocorre, os xogadores terán a opción de pasar polo set da organización e someterse a unha caracterización para comezar a xogar no papel de morto vivente.
Nesta ocasión, o evento adquire un matiz diferente debido a que se trata dunha edición especial, na que WRG, a empresa organizadora, recreará unha apocalipse na época medieval por causa da Peste Negra que azoutou Tui e Valença en 1348.
As entradas para este real game, no que segundo a organización xa participaron máis de 50.000 persoas en España, están á venda por prezos que oscilan entre 10 e 30 euros segundo o papel que asuma cada participante. Podedes conseguilas de dúas formas:
A través das páxinas web wrg.entradium.com ou survivalzombie.es
Nos puntos de venda habilitados en Tui:
Game Over (Rúa Mondoñedo, Nº 4 Baixo)
Espazo Lector Nobel (Rúa Augusto Gonzalez Besada, Nº 10 Baixo)
[+INFO: survivalzombie.es/evento e facebook/survivalzombie]
germansingergirl
romaincrisis
origamiaround
turnnoffyourmind
jbbartram-illu