Uppáhalds uppskriftir leikskólabarna

Velkomin! Hér er að finna uppáhalds uppskriftir leikskólabarna.

[uppahalds]

Kjúklinganúðlur

Jæja, nú dusta ég rykið af þessu bloggi og skelli inn uppskrift frá leikskólanum Austurborg í Reykjavík. Að þessu sinni er um að ræða uppskrift að kjúklinganúðlum sem matráðurinn Vilborg sendi mér. 

Kjúklinganúðlur 1 kjúklingur soðinn

5 pakkar núðlur

2 blóm brokkolí

2 stk papríkur

8 stk gulrætur

1 haus kínakál

1 stk laukur

3 rif hvítlaukur

1 teningur kjúklingakraftur

1 teningur grænmetiskraftur

pipar eftir smekk olía til steikingar

Aðferð

Laukur og hvítlaukur steikt í olíu ásamt kraftinum. kjúklingur tekinn af beinum og settur út í. Kryddað með pipar síðan er soðið af kjúklingi sett út í. Síðan er grænmeti sett út í og látið malla. Núðlur soðnar samkvæmt leiðbeiningum á pakka. Öllu blandað saman. Athugasemdir Haldið þið að ég hafi ekki ruglast í búðinni og keypt frosið spínat í staðinn fyrir spergilkál! Það bragðaðist samt bara vel :) Skammtastærðinar eru heldur stórar það þarf að minnka þær eftir þörfum. 

[uppahalds]

Pizza-fiskur

Sæl öll

Langt síðan ég hef látið af mér kveða hér. Það er svona að ljúka námi, flytja á milli landshluta og hefja störf á nýjum stað, það tekur allt sinn tíma. En hér kemur loksins ný uppáhalds uppskrift, að þessu sinni frá leikskólanum Regnboganum í Reykjavík. 

Pizza-fiskur

Ýsa eða þorskur í bitum

2 hvítlauksrif

1 rauð papríka

1 gul papríka

1 græn papríka

2 msk basilika eða steinselja

1 dós saxaðir niðursoðnir tómatar eða nýjir vel þroskaðir tómatar

Aðferð

Allt grænmetið ásamt tómötunum er maukað saman í matvinnsluvél eða fín saxað og hrært saman. 

Fiskurinn lagður í eldfast mót, grænmetismaukinu hellt yfir, að lokum er osti dreift yfir. 

Bakað í ofni við 200 gráður í ca. 15 - 20 mín. 

Hér er hægt að breyta magni grænmetis sem og tegundum allt eftir því hvað er til hverju sinni.

Athugasemdir

Ég átti smávegis af parmesan osti sem ég bætti við uppskriftina. 

Það er mjög sniðugt að mauka allskyns grænmeti fyrir börn sem aldrei vilja borða papríku, tómata, blómkál og fleira. Það er merkilegt hvað þeim finnst grænmetið gott þegar það er orðið að sósu! Svo má smám saman fara að gróf saxa það meira þegar þau hafa vanist bragðinu. 

Njótið! 

[uppahalds]

Matur gefur mælsku.

[uppahalds]

Indverskur butterchicken

Gleðilegt sumar! Vorið er komið og grundirnar gróa og hér kemur ný uppáhalds uppskrift á vefinn frá matráðinum Teddu á Laufásborg. Tedda hefur gaman að því að kenna börnunum að borða framandi rétti. Eftirfarandi réttur hefur þróast afar vel á leikskólanum og nú er hann í uppáhaldi hjá börnum jafnt sem starfsfólki. Um er að ræða uppskrift að Indverskum butterchicken. Uppskriftin er þróuð með það í huga að einfalt sé að útbúa kryddblöndu daginn áður, láta kjúklinginn marinerast yfir nótt og þar með spara sér vinnu daginn eftir. 

Indverskur butterchicken (fyrir 4-6 manns) Kryddblanda:

4 stk lárviðarlauf mulin í lófanum

1 msk papríkuduft

1 msk kanill 

1/2 msk negull

1 msk kardimomma 

1 msk engifer 

1 tsk chiliduft 

garam masala 2 msk (má sleppa)

1-2 tsk salt

sítrónusafi kreistur 1 stk

AB mjólk 5 dl

700 gr kjúklingalundir eða bitar á beini 

Aðferð: 

Öllu hrært vel saman og kjúklingnum blandað saman við. Látið marinerast í sólarhring eða í þann tíma sem þið hafið.

Setjið kjúklinginn ásamt marineringunni í eldfast mót og steikið hann í ofni í 15-20 mín. 

Sósa:

3-4 msk olía

1-2 stk gulur laukur saxaður

1-2 dósir saxaðir tómatar

Væn klípa af smjöri

1 peli rjómi

1 pakki ferskur, sxaður kóríander

Aðferð: 

Hitið olíuna í potti. Bætið lauknum útí og steikið þar til hann verður glær. 

Hellið tómötunum saman við og hrærið. Lækkið hitann aðeins.

Setjið kjúklinginn útí ásamt vökvanum sem hefur myndast. Hrærið.

Bætið smjör, rjóma og kóríander saman við. 

Meðlæti:

5 dl AB mjólk. 

Setjið eldhúsklút yfir skál og festið með nokkrum þvottaklemmum þannig að strekkist vel á. Hellið AB mjólkinni yfir og látið renna vel af henni. Hrærið af og til í. Þetta tekur kannski 30-45 mín. ef þið hafið nægan tíma, annars er nóg með 10-15 mín. Hún á að verða þykk eins og sýrður rjómi. 

Verði ykkur að góðu!

[uppahalds]

Kanilsnúðar

Í dag var rigning og því þótti mér vel við hæfi að baka kanilsnúða. Það passar svo vel saman; rigning + kanilsnúðar. Finnst þér ekki? Það vill svo skemmtilega til að mér barst ein uppskrift að kanilsnúðum frá leikskólanum Sólstöfum. 

Kanill er af ýmsum talinn minnka blóðsykur, bæta meltingu og vinna gegn sveppasýkingum. Ég sel það þó ekki dýrara en ég keypti það... Hins vegar ber að forðast að innbyrða kanil í miklu magni, þar sem hann inniheldur mismikið af efninu kúmarín sem getur valdið lifrarskaða. Ætli meðalhófið sé ekki vel við hæfi í þessu samhengi líkt og hvað flest annað varðar. 

En hér kemur uppskriftin að kanilsnúðunum:

Kanilsnúðar (ca. 40 stk)

250 g hveiti

1/2 kg heilhveiti

1 tsk salt

200 g smjör

250 ml mjólk

50 g pressuger eða 5 tsk þurrger

Aðferð

Volgri mjólk hellt í hrærivélaskál + 1 tsk sykur + ger.

Smjöri og þurrefnum bætt út í þegar mjólkin er byrjuð að freyða.

Degið hnoðað og látið lyfta sér í 40-60 mín. 

Degið flatt út, penslað og kanilsykri stráð yfir. 

Degið skorið niður í snúða og þeir bakaðir í ca. 10 mín. við 180 gráður. 

Athugasemdir

Í uppskriftinni frá leikskólanum var hvergi minnst á ger, en samt var talað um að láta degið hefast. Hugsanlega hefur bara gleymst að telja upp ger. Því bætti ég sjálf við geri í uppskrifina og breytti aðferðinni svolítið með hliðsjón af öðrum sambærilegum uppskriftum. Ég átti svo reyndar ekki ger þannig að ég notaði lyftiduft í staðinn.... 

Það er örugglega einfalt og gott að breyta þessari uppskrift í pizzusnúða. Þá er kanilsykrinum skipt út fyrir tómatsósu, ost og kannski skinku. 

Volgir snúðarnir brögðuðust virkilega vel ásamt ískaldri mjólk.

[uppahalds]

Cooking is at once child's play and adult joy. And cooking done with care is an act of love.

Craig Claiborne

[uppahalds]

Tandoori sósa

Þessi sósa fylgdi með uppskrift að Indverskum fiskrétti frá leikskólunum Rauðuborg og Sunnuhvoli. En upphaflega kemur hún frá Lýðheilsustöð.

Tandoori sósa

1 tsk Tandoori Masala

1 tsk karrí

1 msk sítrónusafi

1 1/2 msk matarolía

1 dl matreiðslurjómi

Aðferð

Blandið saman og hellið yfir fisk. Gæti trúað að sósan passi einnig vel með kjúkling. 

[uppahalds]

Rúgbrauð

Eitt af uppáhalds brauðum sonar míns er rúgbrauð, smurt með dágóðum slatta af smjöri. Hingað til hef ég keypt rúgbrauð en í gær í varð breyting á, því ég lét loks verða að því að baka eitt stykki. Rúgbrauðið kláraðist nú rétt í þessu, sem teljast sennilega vera góð meðmæli. Rúgbrauðið sem ég bakaði var gert eftir uppskrift frá leikskólanum Ásgarði á Hvammstanga.

Rúgbrauð

2 bollar rúgmjöl

1 bolli heilhveiti

1/2 l AB mjólk eða súrmjólk

170 g síróp

1-2 tsk natron

1 tsk salt

Aðferð

Blandið saman rúgmjöli, heilhveiti, natroni og salti.

Hellið AB mjólkinni (eða súrmjólkinni) og sírópi saman við.

Hrærið saman með sleif.

Svo er hægt að baka brauðið í fernu eða í brauðformi. 

Bakist við 150 gráður í 3 klst. 

Verði ykkur að góðu!

[uppahalds]

Byggbuff

Í kvöld var hér á borðum byggbuff eftir uppskrift frá leikskólanum Sólstöfum Grundarstíg/ Marargötu. Ég sit hér gjörsamlega á blístrinu eftir þennan ljúffenga kvöldverð. Rétturinn er virkilega seðjandi, bragðgóður og hollur. 

Bygg er sú korntegund sem best gengur að rækta á Íslandi. Bygg innheldur betaglúkana sem taldir eru lækka magn kólestróls í blóði.

Uppskriftin var ekki gefin upp í hlutföllum og því blandaði ég hráefnum bara saman eftir því sem mér þótti passa best. Ég skrifa í sviga það magn sem ég notaði. 

Byggbuff 

karföflur (3 meðalstórar kartöflur)

bygg (ca.1 bolli)

hnetusmör (1 stór skeið)

laukur (1 laukur)

krydd (ég notaði engifer og túrmerik)

sesamfræ (1 stór skeið)

kókos (1/2 hálfur bolli)

egg (má sleppa, ég notaði 1 egg)

rúgmjöl/ hveiti (1/2 bolli)

hnetur (1 lúka af söxuðum heslihnetum)

Aðferð

Bygg soðið ásamt lauk og kryddi. Suðutími fyrir bygg ca. 40-45 mín. í hlutföllunum 1. dl bygg á móti 3 dl vatni. Soðið ásamt lauk og kryddi.

Kartöflur settar á suðu þegar suðutími byggs er hálfnaður.

Byggblandan kæld.

Kartöflur flysjaðar og þær blandað saman við byggblönduna.

Hnetusmjör, fræjum, kókos og hnetum blandað saman við. Hrært vel saman.

Bleytt með eggjum, vatni og smá olíu, ef þarf.

Mjöli bætt við, ef þarf. 

Síðan er bollurnar mótaðar, flattar út með hveiti og steiktar á pönnu við góðan hita. 

Borið fram með kotasælu, basmati hrísgrjónum, soyasósu og grænu salati. 

[uppahalds]

Granóla

Jæja, kominn tími til að endunýja múslí-birgðirnar! Að þessu sinni bjó ég til yndislega gott granóla eftir uppskrift frá leikskólanum Tjarnarási Í Hafnarfirði. 

Eftirfarandi granóla uppskrift inniheldur meðal annars haframjöl. En hafrar eru fitulitlir, trefjaríkir og innihalda járn og prótein. Hafrar eru einnig mjög seðjandi.

Ég notaði heslihnetur í uppskriftina. Heslihnetur innihalda prótein, trefjar og E vítamín, svo eru þær líka bragðgóðar. 

Granóla

7 bollar haframjöl

1 bolli hveitikím

1 bolli kókosmjöl

1 bolli sólblómafræ

1 bolli hnetur (má sleppa, en ég notaði heslihnetur)

1/2 bolli púðursykur

1/2 bolli matarolía

1/2 bolli vatn

1 tsk salt

1 msk vanilla

Aðferð

Þurrefnum blandað saman.

Púðurskykri, matarolíu og vatni blandað saman.

Öllu blandað saman.

Sett í ofnskúffu og bakað í ca. 30 mín. við ca. 150-180 gráður. 

Hrært í á ca. 15-20 mín. fresti. 

Ég gæti alveg hugsað mér að búa til helgarútgáfu af þessari uppskrift og blandað saman við hana dökkum súkkulaðispænum :P Svona sunnudags...

[uppahalds]

Eggjalitun

Gleðilega páska! Ég vona að þú sért að njóta alls þess sem gott páskafrí hefur upp á að bjóða, hvort sem það er skíðaferð, súkkulaðiát, göngutúrar, náttbuxnadagur, sundferð, lego eða... bara hvað sem er, sem gleður. Ef þú veist ekkert hvað þú átt að gera í dag en átt fullt af eggjum inni í ísskáp þá er hér uppskrift að náttúrulegum eggjalitum. Stundum gefst nefnilega ekki tími fyrir jóla- og páskaföndur fyrr en hátíðirnar bresta á og ekkert annað krefst athygli okkar. Nú er ég að aðeins að ''svindla'' og nota ekki uppskrift frá leikskólum. Þessar uppskriftir eru samsuða af ýmsum leiðbeiningum sem ég fann á netinu. Sum hráfnin má nota ósoðin. Það stendur í sviga hvað þarf að sjóða. Góða skemmtun! Eggjalitun

1. Komið eggjum fyrir í potti og hellið vatni yfir þau. 

2. Bætið við einni skeið af white vinegar.

3. Bætið við hráefninu sem gefur lit. Þeim mun meira af því þeim mun sterkari litur. 

4. Látið vatnið sjóða, ef þess þarf.

5. Minnkið hitann og látið standa í 15 mín. 

6. Ef þú ert sátt/ur við litinn þá fjarlægir þú eggin úr blöndunni, annars lengir þú tímann. 

7. Ef þú vilt mjög sterkan lit, þá fjarlægir þú eggin úr blöndunni, sýjar litinn í gegnum kaffifilter, leggur eggin aftur í blönduna og lætur standa í ísskáp yfir nótt.

Litir

Blár - Bláber, fjólublár greipsafi eða rauðkál (soðið)

Fjólublár - Rauðvín eða örlítið af soðnu rauðkálsflusi

Lavender - Red Zinger te

Bleikur - Trönuber eða trönuberjasafi

Gulur - Appelsínu- eða sítrónubörkur, kamillute eða grænt te

Appelsínugulur - Chiliduft eða flus af lauk (soðið)

Rauður - Flus af rauðlauk (a.m.k. þremur, soðið), rifsber eða granateplasafi

Gylltur brúnn - Dill fræ

Brúnn - Instant kaffi, sterkt kaffi eða svart te

Grænn - Spínat (soðið)

Gulgrænn - Eplaflus af gulu epli

[uppahalds]

Spínatbaka

Hæ, ég er hérna ennþá! Það er bara búið að vera brjálað að gera upp á síðkastið. En nú er ég mætt aftur til leiks í litla leikskólaeldhúsið, í þetta sinn með uppskrift að böku. 

Mig hefur lengi langað til að baka böku og í dag lét ég loksins verða að því. Fyrir valinu varð spíntabaka að hætti leikskólans Drafnarborgar. 

Spínatbaka

Botninn

200 g smjör

180 g spelt

3 msk kalt vatn

1/2 tsk jurtasalt

 Aðferð

Blandið saman smjöri, spelti, vatni og salti í hrærivél með hnoðara, hrærið öllu saman þar til deigið er jafnt, þétt og sprungulaust.

Gott er að geyma deigið í ískáp i 1-2 klst.

Fletjið deigið út með rúllukefli og þrýsið deiginu í botninn á forminu og upp með hliðum.

(Hér potaði ég í deigið með gaffli og stakk því svo í ofn við 180 gráður í 10 mín.)

Grænmeti og annað hráefni í böku:

1 blaðlaukur, smátt saxaður

500 g spínat, rifið

5 egg

100 g rjómaostur

1 lítil dós kotasæla (200 g)

1 tsk jurtasalt

1/4 tsk hvítur pipar

1 tsk basilikum

2 dl matreiðslurjómi

1 msk chilisósa (sweet and sour)

Aðferð

Dreifið púrrulauki í formið og spínati þar ofan á.

Hrærið saman eggjum, rjómaosti, kotasælu og tilheyrandi kryddum i matvinnsuvél eða hrærivél og hellið hrærunni yfir spínatið.

Bakið bökuna við 170 gráður í 50-60 mín. 

Bakan er borin fram með salati og basilikusósu.

Athugasemdir

Nú ertu kannski að hugsa: ''Ha bíddu blandaði hún saman öllum hráefnunum, það átti ekki að gera þetta svoleiðis!'' Mikið rétt - það á ekki að gera þetta svoleiðis. Ég er bara ein af þeim sem á það til að setja saman Ikea húsgögn og lesa síðan leiðbeiningarnar eftir á. Það sama gildir um uppskriftir, stundum. Það kom samt ágætlega út í þessu tilfelli að blanda öllu saman. 

Ég átti einmana papríku og svartar ólífur inni í ísskáp sem ég ákvað að bæta í uppskriftina. Gera bara góða böku enn betri! Gleðilega páska!

[uppahalds]

At the table with good friends and family you do not become old.

Italian proverb

[uppahalds]

Melónusalat

Á blaðsíðu 50 í Handbók fyrir leikskólaeldhús er að finna sérlega girnilega uppskrift að Melónusalati. Hentar mjög vel sem meðlæti með öðrum mat, heitum eða köldum. Ég hugsa einnig að þetta salat muni passa vel með grillmat í sumar!

Vatnsmelónuplantan er af graskeraætt eins og gúrkur, eggaldin og grasker. Ávextir plöntunar, vatnsmelónurnar, eru yfirleitt á bilinu 3-15 kg að þyngd, en geta orðið yfir 20 kg!

Íssalat inniheldur járn, kalí og fleiri steinefni. Næringarmestu hlutar íssaltsins eru stöngullinn og ystu blöðin. Því skulum við passa að grisja ekki of mikið af kálinu þegar við hreinsum það.

Melónusalat

Íssalat (iceberg)

vatnsmelóna, afhýdd

gúrka

gulrætur

Aðferð

Gufusjóðið gulræturnar í 2-3 mín. til að mýkja þær eða hafið þær með hráar í litlum bitum.

Skerið íssalatið og gúrkuna niður í bita.

Afhýðið melónuna, kjarnhreinsið og skerið í litla bita.

Blandið öllu saman og setjið í skál.

[uppahalds]

Súpubrauð

Ég sauð ekki aðeins súpu í dag, heldur bakaði ég einnig súpubrauð. Hér kemur uppskrift að súpubrauð frá leikskólanum Hvammi í Hafnarfirði.

  Súpubrauð

3 dl hveiti

3/4 dl hveitiklíð

1 tsk sykur

salt á hnífsoddi

1 tsk þurrger

1 1/2 dl volgt vatn

1/2 msk matarolía

Aðferð

Hnoðið allt saman og látið hefast í 30 mín. Athugið að degið má vera frekar blautt. 

Hnoðið degið aftur upp og rúllið í lengjur, skerið í bita og mótið bollur. 

Raðið bollunum á bökunarplötu og látið hefast í 15-20 mín. 

Bakið við 200 gráður í ca. 15 mín.

[uppahalds]

Mexico súpa

Brumhnappar eru farnir að myndast á trjám, nágranninn er farinn að grilla, ærsl í krökkum berast inn um glugga og Lóan er komin. Þetta getur aðeins þýtt eitt - vorið er komið! Tjah það er að minnsta kosti komið vor í hjörtun, ekki satt?

Í dag eldaði ég súpu eftir uppskrift frá Guðrúnu, matráði á leikskólanum Sunnuhvoli. En Guðrún sá uppskriftina í blaði undir yfirskriftinni súpan sem lengir lífið, frá matráði Rimaskóla. Greinilega góð súpa hér á ferð!

  Mexico súpan góða

1 laukur

2 hvítlauksrif, marin

olía

1 dós niðursoðnir tómatar, maukaðir

1 msk kjúklingakraftur

1 msk nautakraftur

1/2 msk rapunzel grænmetiskraftur

1/2 l tómatsafi

1 1/2 tsk kóríander

1/2 tsk chiliduft

1/2 tsk cayenne pipar

1 pk. úrbeinuð kjúklingalæri, brytjuð aðeins smærra heldur en þau eru í pakkanum

1/2 pk. gulrætur, brytjaðar

1/2 l vatn

Aðferð

Mýkjið laukinn í olíu. Bætið hvítlauknum við, hann má ekki brenna.

Tómatsafanum, gulrótunum, kryddinu og maukuðu tómötunum hellt útí ásamt vatni.

Soðið í smá stund til að mýkja gulræturnar. 

Að lokum er kjúklingnum bætt við og hann látinn sjóða í 15-20 mín.

Berið súpuna fram með sýrðum rjóma, muldum tortilla flögum og rifnum osti.

Verði ykkur að góðu!

Athugasemdir

Ég gleymdi að nota kraft, en það kom ekki að sökum því súpan bragðaðist mjög vel.

Það er svo mikill vor-fílingur í mér að ég skipti út tortilla flögunum og rifna ostinum fyrir ferskan kóríander. Mjög gott!

[uppahalds]

Fiskur með kókos og karrí

Sæl öll  Loksins fer að sjá fyrir endann á eldhúsframkvæmdum hér heima. Það er nokkuð kúnstugt að halda úti matarbloggi með ekkert eldhús!  Það er nú meira veðrið þessa dagana. Mars mánuður er oft ansi umhleypingasamur! Við getum þó ekki breytt veðrinu, aðeins viðbrögðum okkar við því. Mín viðbrögð eru að kveikja á kertum og skríða undir teppi :) Í dag skreið ég þó undan teppinu og eldaði fisk að hætti leikskólans Uglukletts í Borgarnesi. 

Fiskur með kókos og karrý (fyrir ca. fjóra)

500 g fiskur

1 dl hveiti

2 msk kókosmjöl

1 egg

1 tsk karrý

1 dl mjólk

salt

pipar

timian 

Aðferð

Öllu hrært saman.

Fiskurinn skorinn í bita og velt upp úr deginu.

Allt sett á pönnu. Gott að nota skeið svo að hluti af deginu komi með.

Steikt á pönnu við góðan hita.

Borið fram með hýðishrísgrjónum og súrsætri sósu. 

Athugasemdir

Á ögurstundu uppgötvaði ég að hrísgrjónin á heimilinu voru búin og því  skar ég kartöflur í báta, helti olíu yfir og kryddaði með salti og pipar.  Mér fannst gott að strá kókosflögum og rúsínum yfir fiskinn. Það er bara vatn í vínglasinu. Mér finnst gaman að drekka úr fínum glösum. 

Ta-da!