#tugmaan

[mga-antigong-salita]

sa pagmamasid

Balanse Isang makabuluhang puwang Na siyang kulang sa ugnayan Ng bawat nilalang

Baluwarte ng mga sakim at arogante ang lugar na aking kinalakhan Pataas-taasan ang siyang larong nakasanayan

"Sinuswerte" Rinig kong bigkas Ng aking kaparte, Hindi man lang inintindi Kasalukuyan kong pighati

Ganyan naman lahat sila Walang pumapakumbaba Lahat gusto nauuna Kaya ang hirap-hirap Mamuhay sa lupaing hindi malaya Ang hirap-hirap, Mamuhay na palaging taya.

[iskoliwa]

‘Brod’

Kahit walang nalalaman

Basta “iba” ang pormahan

T’yak na may paggagamitan

Sa ngalan ng kapatiran

Iyabang ang kayamanan

Kahit ‘di pinaghirapan

Imahe ay alagaan

Sa ngalan ng kapatiran

Bugbugin man ang katawan

Murahin mo pa’t tadyakan

Hindi naman papalag ‘yan

Sa ngalan ng kapatiran

Matatapang sa suntukan

Lalo’t higit sa barilan

Kahit na magkapatayan

Sa ngalan ng kapatiran

Lusot sa kawalang’yaan

Dahil may kapangyarihan

Dinamay ang karamihan

Sa ngalan ng kapatiran

Galit daw sa kabaklaan

Pero ang katotohanan

Sarili’y tinataguan

Sa ngalan ng kapatiran

Kanilang katalinuhan

Tunay bang para sa bayan?

Mandaraya sa halalan

Sa ngalan ng kapatiran

Meron pa bang kahulugan

Kanilang pinaglalaban?

Kahit walang paglaanan

Sa ngalan ng kapatiran

Bisyo ng kalalakihan

Itong sangganong samahan

Totoong walang iwanan

Sa ngalan ng kapatiran

_____________________________________________________________

Ang tulang ito ay naglalayong kondenahin at labanan ang anumang uri ng karahasan sa loob at labas ng Pamantasan. Higit na kailangang kondenahin ang walang habas na pagkakalat ng lagim at panggugulo ng mga savage fraternities na umaastang diyos sa loob ng Campus. Dahil sa pagsisinungaling, pagnanakaw ng karangalan, panggugulo sa resulta ng mga bilangang panghalalan, at pagpatay dulot ng hazing (hindi lamang sa loob ng campus ngunit lalo na sa korte, kapulisan, opisina ng pamahalaan, etc.), makikita ang kakulangan ng mga ganitong uri ng samahan sa pagbibigay ng kabutihang panlahat. Huwad ang samahang nag-aasam ng kapayapaan habang nauuhaw naman sa dugo, pananakit, sexism, at pananakot.

[her-drafts-blog]

Samahan mo ako sa pinakamalapit na kanto, may bibilhin ako— isang kahon ng posporo. Papangalanan ko ang bawat palito. ‘Yung huling piraso, tatawagin kong 'tayo’. 'Yung tayo na minsang sinindihan ng mapaglarong tadhana. 'Yung tayo na minsang pumaloob sa pag-ibig na nagbabaga. Sa ilalim ng liwanag na panandalian, pinili nating kalimutan ang takot na bumalot sa katauhan at sumabay sa apoy na nag-iindakan. Ngunit sa huli, nilisan din ito. Mainit ang ating pag-ibig— at tayo ay napaso. Pero, saglit, dahil, mayro'n akong napagtanto: Mali ako. Mali ako, dahil, ako lang ang posporo, at ikaw ang apoy na sa akin ay kumokonsumo. Ikaw— apoy na mapangsindak! Ayaw maubos ng iyong liyab, patuloy ka sa pag-indak. Ginawa mo akong entablado. Sana'y manatili ka hanggang matapos ang nakakaantig na musiko. Sana'y manatili ka bago maubos ang aking upos. Ngunit, nauna kang mawala kaysa sa ritmo. Nilisan mo ako, hindi ka umabot sa dulo. Tulad ng usok na nagmula sa'yo, mabilis kang naglaho. Ikaw ang apoy na umangkin sa akin. Ako ang posporong nagsilbing patunay sa ating munting sandali. Hinanap kong muli ang liyab mo, ngunit aking napagtanto…. “Aanhin mo pa ang nasindihang posporo?” At sa matagal na panahon, buong akala ko sabay nating pinilas ang huling yugto ng ating kwento pero habang isinusulat pala natin ito, ay sinusunog mo. — v.m.

[mga-antigong-salita]

2. Ang Bahay na Pula

Puno ng lagim,

Ang gabing madilim.

Damang-dama, bago pa man ang takipsilim,

Lumilitaw ang impit na takot na pilit kinikimkim.

Tirahang umaagos ng pagdurusa,

Tahanan nga ba kahit hindi na inaabot ng umaga?

Nasambit na lahat ng baong panata.

Ngunit tila'y ang bukas 'di na darating pa.

Bunga ng pagsasamantala,

Siya'y naghihinagpis at nagdurusa.

Mata'y nagmimistulang pulang rosas na paunti-unting nalalanta.

Buong pusong umaasa na: buhay niya'y tapusin na.

Patuloy ang kanyang pagkakabilanggo sa sariling mga dugo,

Pero sa wakas! Dumating ang isang araw'y natapos din ang gulo.

At nagsimula ulit ang mga paglalakbay na naudlot.

Mga pulang rosas at ang pawang walang katapusan na sigalot, ay madilim na alaala na lamang ng kahapon.

(YES: Inspired by the real Bahay na Pula in Bulacan.)

[iskoliwa]

‘Energy Drink’

Itong inuming makulay

Pampalakas sa matamlay

Sa sagad-butong pagkayod

Katawa’y ‘di mapapagod

Isip ay buhay na buhay

Liksi at bilis ay tunay

Dalawang araw nang gising

Antok ay ‘di dumarating

Galing sa ahas ang lakas

Lason ay ‘di makatakas

Parang toro kung kumilos

Tila halimaw sa unos

‘Pagkat dapat na sulitin

Sa konting oras bawiin

Perang mahirap kitain

Sa bagong droga’y utangin

Bakit mo pinabayaan

Ang manggagawa mo, Bayan?

Silang lumikha ng yaman

Bakit bulsa’y walang laman?

Sa kakarampot na sahod

Bagong buwis ay sinuyod

Tuhod ay ‘di na maangat

Bagsak pang mga balikat

Ang sistema’y babaguhin

Mga uri’y wawasakin

Energy drinks ay inumin

Pang-aapi’y pabagsakin! 

[mga-antigong-salita]

ayaw kong pangunahan ka,

pero sige ito na.

- ‘wag ka sanag mabigla, ah?

masaya akong nakilala ka.

pero sana ‘wag mo akong layuan.

‘wag mo rin sanag isipin na isa itong biruan.

kaya, tanggapin mo sana ang aking kahilingan.

wala nang mas makakapagpaligaya sa’kin 

kundi ang iyong pagkunwaring -

hindi mo ako napakinggan

nang sinabi ko sa’yo ito ng walang pag-aalinlangan.

dahil takot akong masaktan.

at alam kong darating ang panahon na.

ikaw rin ang mang-iiwan.

kaya sige na, ‘wag ka nang mabahala.

salamat at dumating ka.

[iskoliwa]

Kami

Kami “raw” ay walang silbi

Kami “raw” ay mga tamad

Nagwawaldas ng salapi

At nagsasayang ng oras

Kami “raw” ay palaasa

Kami “raw” ay reklamador

Pampabigat sa lipunan

Babayaran kung eleksyon

Kami “raw” ay tanga’t bobo

Kami “raw” ay nag-aadik

Ang hanap ay basag-ulo

Kasamaan ay ihasik

Kami “raw” ay mga tambay

Kami “raw” ay makakapal

Hindi marunong mahiya

Sa mga taong mayaman

Ngunit may pagkakamali

Ang matapobreng pagtingin

Opinyong tinadtad ng “raw”

Kilala niyo nga ba Kami?

[iskoliwa]

Nagkangitian

Bawat kalsadang nilalakaran

May taong hindi namamalayan

Tulad ng aral ng Kasaysayan

Napakahirap na matandaan

Ang mga mukhang nagpapalitan

Sa mga kalyeng dinadaanan

Sa bulungan at mga sigawan

Ay mayro’ng hindi maiiwasan

Magkakaiba man ng pangalan

May natatanging ‘di karaniwan

Mangingibabaw sa karamihan

Dalawang taong nagkatinginan

Mga labi ay nagkangitian

Nagbunga ng mga kahulugan