'Wag Mo Akong Bitawan

▫️🟡 orihinal na mga tula 🟡▫️ 🟢SPOTIFY : https://open.spotify.com/show/67wcJcjfknPdKuKXdgvo5U?si=r0x6FxN3TFuccyo4rXgQ_A 🟢 🔴[email protected]🔴 🟣IG: @wmabph🟣 Spoken Word Versions available now on Spotify and Apple Podcast

[wmab]

Spoken word versions available on SPOTIFY 🤗

I-click lang ang link sa baba para mapunta sa WMAB page sa Spotify. 🥰

Para sa inyo pong lahat ito. Salamat po sa patuloy na pag suporta! 🥰

Also available on Apple Podcast ( Wag Mo Akong Bitawan )

Wag Mo Akong Bitawan - DM

Original Tagalog Spoken Poetry

[wmab]

At kung napanaginipan mo man s'ya, managinip ka na hindi tila para kang papel na tutupi sa sulok. Dahil ang tunay na pag-ibig ay hindi ka susubukin para pagtaksilan at lisanin ang sarili mo dahil sa salimoot. Hindi ka titiisin hangang sa lumukot. Kahit. Kailan.

–Wag Mo Akong Bitawan (WMAB)

[wmab]

PAREHO LANG

Wag mo akong tatanungin kung marahas bang maituturing ang hindi ko pagtanggap sa mga pansamantalang bagay na hindi naman sa akin, dahil pareho lang tayo—nais magkaron ng mga permanenteng pwesto pero hindi mapakali sa iisang lugar.

Takot magpa-iwan kasama ang mga di kilalang mga kamay—pareho lang tayo. Hindi magawang umakbay sa sikatan ng araw pero matapang na naghuhubad ng pananggalang pagsapit ng gabi.

Walang puwang ang totoong kaligayahan para sa katulad nating mga mapagpanggap. Nanglalansi ng mga madaling tumanggap ng mga ligaw na salita; nagbibigkas ng mga gustong marinig ng tainga; naglalatag ng makikinang na mga bagay sa mata ng mga tanga; nagtatagumpay sa pagdaraya; kunwang nagmamahal sa ngalan ng takot sa pag-iisa.

Masyadong malakas ang kaway ng tubig sa dagat para magpatianod ng walang bitbit na pang-angkla—pareho lang tayo. Hindi magbababa ng baraha hanggat di siguradong panalo. Mabibilis na mga kamay at mabibilis na mga bibig, para hindi na pumasok pa ang pagdududa. Pareho lang tayong ang kilalang libangan ay mangolekta ng mga ligaw na isip at damdamin.

Alam ko, dahil pareho lang tayo. Kinang lang ng bawat minuto ang gusto at hindi ang liwanag ng bukas. Mga pantapal sa pahilom nang mga sugat ang tanging kailangan sa ngayon, at hindi ang pangmatagalang kanlungan. Wag mo na akong tanungin kung paano ko nalaman. Pareho lang tayo.

.

.

.

.

-Wag Mo Akong Bitawan (WMAB)

[wmab]

Para sa'yo. Na nakaaalala lang kung hindi kayo magkasundo.

[wmab]

Bagong taon na. Usad ka na. May bago na sya. Magbago ka na.

[wmab]

Panaginip, ku'nin kaya kita sa panaginip?

[wmab]

Paalala bago matulog: Patawarin ang sarili.

—WMAB

[wmab]

Naaalala pa rin kita. Sa mga ilaw na 'di pumapayag umandap. Malungkot man, pilit kikislap.

Andyan, biglang wala 'pag kurap. Katawanan, pumaram isang iglap.

Malumanay na hanging yumayakap. Laging nasa likod para tumatag. Lumipas lang ng gan'on kaagad.

Akala ko ay sagot ang masanay para 'di na maghanap

Mali.

Naaalala pa rin kita.

.

.

.

—Wag Mo Akong Bitawan (WMAB)

[wmab]

Kaaway man o kabati, nawa ay makatulog tayong lahat ng mapayapa at matiwasay ngayong gabi.

–WMAB

[wmab]

Sa pagsapit ng kadiliman. Halimbawa mang hahampas ang ulan at tsaka papalo sa kalupaan, wag naman sanang gawing sukdulan—kung pupwede sana ay maging marahan.

—Wag Mo Akong Bitawan (WMAB)

[wmab]

IHIP SA TULOS

Natutupad sila. Mga hiling mula sa pinatay na kandila. Kaya't magmadali. Magtulos ka ng higit sa doble ng 'sang dosena.

Magluksang taimtim para sa yumaong pag-asa ng bayan. Mas matindi daw ito kaysa kulam. Humiling sa usok ng kandilang hinipan.

Litanyahan ng mga awiting mas maingay pa sa pang-barang na bangaw. Mainit na hininga ang ipambato sa nagkukumawala at malulutong na tungayaw. Pinatay na apoy mula sa sinindihang ilaw. Isa-isahin mo ang pangalan nilang kampon ng matatakaw.

Upusin ang pagkit ng pinaghalo-halong dasal, panalangin, at ritwal. Inaman ang nasa, tsaka i-usal. Magsimula ka sa tagapamahala, tagapagbatas, hanggang kinatawang hinalal.

Lahat ng nakinabang. Pati kamag-anakan. Wala nang prinsipyong pag-uusapan. Magbara sana sa lalamunan. Mula panganay hanggang sa ka-apo-apuhan. Mautas nawang tuluyan. Mabilaukan nawa sa pagkagahaman.

Magluksa para sa bayan. 'Wag kalimutang samahan ng maalab na kagustuhan. Wala namang pagpipilian. Maniwala na lang sa kwentong bayan. Baka maipaghiganti ng pamahiin ang sambayanan. Sanay naman na sa pangakong walang laman. Kaya't magmadali. Humanap na ng mga kandilang pwedeng mahipan.

.

.

.

-Wag Mo Akong Bitawan (WMAB)

[wmab]

Kung alam mo lang kung gaano ko kagusto na hawakan ka.

[wmab]

Ma, tatlong taon na ang lumipas. Pero ang sakit pa rin. Ilang araw bago yung araw na 'to yung mga panahong di ko na alam gagawin ko kasi, unti-unti mo na kong nakakalimutan. Hindi ka na nagsasalita. Halos hindi mo na ako kilala. Ikaw yung may sakit, ikaw yung nakahiga, ikaw yung may sugat, ikaw yung may iniinda, pero parang ako yung unti-unting namamatay.

[wmab]

Tangina naman, universe. Pag magjojoke ka wag naman sana masyadong dark. haha.

[wmab]

Mapapabunto ka nga ng hininga. Dahil sa hindi mo pagka-dala sa lahat ng mali mong gawa. Kahit sino magbabato ng dibdib sa lupa. Dahil napatunayan mong sa huli, sa lahat ng desisyon mong mali at halos wala ni isang tama, di ka talaga natututo. Pilipino ka nga.

.

.

.

-Wag Mo Akong Bitawan

[wmab]

'Wag kang masabik sa mga alam naman kung paano ka mahahanap. Kung hindi makita, malamang hindi nag-aapuhap. Kung gusto man, pihadong sasabihin ang balak. Walang tanong—sadya agad. Kung hindi mahagilap, siguradong di nag-aasam. Kung hindi humaharap, walang ihahayag, malamang. 'Wag tumalunton kung walang banaag. 'Wag kang masabik sa mga hindi ka hangad.

—WMAB

[wmab]

Makalat na mesa. Natuyong kape na nagmantsa na sa tasa. Siper ng bag na hindi naisara. sala-salabat na kableng nagdudugtong sa mga gusto at mga sana. Gan'on pa man, kahit na masakit sa mata, kahit na parang di malirip na dawagan ang lahat ng dala, magaan sa dibdib, dahil nar'yan ka.

.

.

.

—WMAB

[wmab]

MATALIK NA KAIBIGAN ANG KABIGUAN

'Wag mong pasilungin ang siphayo na parang matalik na kaibigan. Itaboy mo. Kung magpumilit, magmarakulyo kang parang puyat na ayaw ng kakuwentuhan.  Pagmaktulan mong gaya ng puristang nadulutan ng kapeng ubod ng tabang.

Ipaalam mong hindi ka ubrang pamalagian. Hindi s'ya kinagigiliwan.

'Wag syang lalapit.

At kung magsumiksik at sa'yo taimtim na mamamanhik, tumanggi kang madali.

Dahil ang kabiguan ay parang kaibigang matalik. Dumadantay sa'yong balikat. Sumisilong kapag ang lahat sa'yo ay tahimik.

.

.

.

—Wag Mo Akong Bitawan (WMAB)